Read Achang 1 SAMUEL 18 Bible Online

1 SAMUEL 18 - Achang bible

1 SAMUEL 18

¹Saulo yahge Dawi dye jisgoh. Hauh thang lhyi Saulo dah lo Yonathan dah ehnyet gas Dawi lyis twih las Dawi lyis nyah gungs dyos yah dvyhangteh jyetdap.

²Hauh nyeih lyis Saulo ka nyang lyis shwih toh las nyah uwus yhen pheh ma loh nhang lo.

³Yonathan eq Dawi lyis nyah dyos yah dvyhangteh jyetdap yvmvyah nyah aiq yuk thanghchvp toh goh.

⁴Housoeh nyang nyah dyi eq khyuot las nyah thunk jesdyi yahge sham, lyei, dyichih Dawi lyis dyei.

⁵Dawi gas Saulo nhang ya nhang zis lyis joeui bos bos kuot las ung cho yoh yvmvyah Saulo nyang lyis jeszau kuot nhang. Dawi gas dius jens xikkhonh, Saulo dah zau jens xikkhonh mas nyoqnho yoh.

⁶Housoeh Dawi gas Philisti jens lyis sat masyah tauh los lyis Israel wus khanghmuh mas dah vmesbih jens hwankti lhyi zes das ge, janghau, khvlhank yah gaus gaus yis yis chunghthwe kat, goh las tsain thuq los.

⁷Hauh vmesbih jens lvkhyank masyah dvyuk dvphuk taiq goh zis gas, Saulo sat zis khyoengh khyoengh, Dawi sat zis mons mons, ge.

⁸Hauh dang gas Saulo lyis nhaiq ma tap nhang. Saulo ka, Nyamoq Dawi lyis mons mons, ngos lyis gas khyoengh khyoengh dvge: nyamoq gas Dawi lyis hwankti kuot nhang bah ge goeus, ge svsoh nhaiqyo.

⁹Hauh nyeih masyah nyang gas Dawi lyis noh las lhaink nyeis.

¹⁰Nungs nyeih hau Mangso jyank masyah ma gis dah dyos gas Saulo jyank mas jweh los. Housoeh nyang gas hauh yhen vgungs mas huonh soeu teh mus nyeis. Dawi gas xikpheh teh vgus toenk bat dyei. Saulo dah loq mas lham dvkhvt chi.

¹¹Nyang gas Dawi lyis tyoyvm mas guons tsuk toh das ge nghamh zis yah dvyhangteh, lham yah guons kat. Dawi gas nyah xik masyah aiq lhain jhank tyamp.

¹²Housoeh YHENSAIN ka Saulo yah gang las Dawi yah dvgeh nghuot yvmvyah, Saulo ka Dawi lyis gyuk.

¹³Housoeh las Saulo ka nyang lyis nyah jyank masyah kangh tyamp las, jes dvkhyoengh lyis guon soeu kuot nhang. Dawi eq nyah dius jens lyis moeng shwih zan las,

¹⁴nyang kuot cho dvnganh mas ung cho yoh, khasoeh ge lyis YHENSAIN nyang yah nghuot.

¹⁵Housoeh Saulo ka Dawi dah ung cho she nyvng she nyang lyis zes gyuk los.

¹⁶Nghuot laus eq Israel dius jens dvnganh yahge Yuda jens gas Dawi lyis jyet. Khasoeh ge lyis nyang housoeh teh dah ung cho yoh uhshe soeu dvyuk nghuot.

¹⁷Saulo Dawi lyis taiq zis gas, Ngah lonyi lobes Merab lyis yoeus aq, ngos nvng lyis dyeizo das: nvng ngah nyhenshang womh womh YHENSAIN xiklyis jes dvzan dyei aq, ge. Khasoeh ge lyis Saulo nghamh zis gas, Ngah loq nyah thoq mas ma jweh bas jungh, Philisti dius jens nyang lyis dvsat bas jungh, ge.

¹⁸Dawi Saulo lyis taiq zis gas, Ngos hwankti lomoq yoh bweh das zis gas ngos hank nghuot? Israel mas ngah uwus yhenbang yahge ngos gas cha nghuot, ge.

¹⁹Nghuot laus eq Saulo dah lonyi Merab Dawi lyis dyeizo das shishenh jweh lyis Meholat dius Adriel lyis dyeizo tyamp.

²⁰Hauh thang lhyi Saulo dah lonyi Mikha ka Dawi lyis ngwis. Hauh cho Saulo lyis tsain taiq kyoh las nyang nhaiqtap nyeis.

²¹Saulo nyang taiq zo zis gas, Ngah lonyi lyis Dawi dah lhyik duot nhang lha Philisti jens dah loq mas sat zis xauh bas jungh, ge. Housoeh las Saulo Dawi lyis, Nvng khvnyhik ngah lomoq duot goeus, ge aiq vlhain taiq.

²²Saulo nyah zau jens lyis tying toh zis gas, Dawi lyis heisoeh gauh taiq geh: yoeuh aq, hwankti nvng lyis nhaiqdoeus, nyah zau jens dvnganh eq nvng lyis o, housoeh las gvshih nvng hwankti dah lomoq duot gis oen aq, ge.

²³Nyamoq hauh dang Dawi no mas taiq kyoh. Dawi gas, Ngos teh nyoqnho ngelang ma bos, shohjyen soeu hwankti lomoq duot das zis gas lwis lwis nghuot das lah, ge.

²⁴Zau jens gas Saulo lyis Dawi taiq cho taiq kyoh.

²⁵Saulo ka, Dawi lyis heisoeh taiq aq: Hwankti ka nyah jeswus lyis nhaiqyo bi das xiklyis Philisti dah vthyoh dvxo mha lai las gohtoeu whot ma o, ge. Nghuot laus eq Saulo nghamh zis gas, Dawi gas Philisti jens sat zis xauh bas jungh, ge.

²⁶Saulo dah zau jens hauh dang Dawi lyis taiq kyoh lyis, Dawi hwankti lomoq duot mes nyeis. Nyihwank buisnyeis ma jweh shih lyis,

²⁷Dawi gas nyang eq nyah dius jens eq toq loh las Philisti dius aiq xo sat zis yah nyang hwankti lomoq duot das xiklyis, nyamoq dah vthyoh hwankti jyank jet jet chi los dyei. Housoeh las Saulo eq nyah lonyi Mikha Dawi lyis dyeizo tyamp chah.

²⁸Housoeh YHENSAIN ka Dawi yah nyeis zis Saulo nyvng las seq. Saulo dah lonyi Mikha eq Dawi lyis ngwis.

²⁹Housoeh Saulo ka Dawi lyis zes gyuk las nyah jeswus tsoq duot los.

³⁰Philisti thoenkgus jesdvp jeszan los, nghuot laus eq jeszan khyomp khanghmuh mas Dawi gas Saulo dah gohtoeu zau jens thoq lyis ung cho zes yoh. Housoeh las Dawi nyings svsoh hoeuh los.