Read Achang 1 SAMUEL 19 Bible Online

1 SAMUEL 19 - Achang bible

1 SAMUEL 19

¹Saulo ka nyah lo Yonathan yahge nyah zau dvnganh lyis nyang Dawi lyis sat das cho taiq kyoh toh. Nghuot laus eq nyah lo Yonathan ka Dawi lyis jyet las

²nyang lyis taiq zis gas, Ngah uwus Saulo ka nvng lyis sat das ge xo nyeis: housoeh las gvshih nvng nvpyo jweh shoq jenh zaih lha sam joqyos mas tamh joq aq.

³Ngos gas thuq las nvng nyeis dah pa mha, ngos ngah uwus nvm mas yap las nah cho taiq das. Housoeh ngos seq ya seq zis nvng lyis taiq kyoh das, ge.

⁴Yonathan ka nyah uwus Saulo jyank mas Dawi shot pheh taiq zis gas, Hwankti ka nyah jyeidwis Dawi lyis ma cu bas jungh, nyang nvng lyis cha ma cu. Nyang kuot dah jyehjuh eq nah jyank mas kuh joq.

⁵Nyang nyah kang lhyi ma yu lo Goliat lyis sat las YHENSAIN ka Israel dvnganh xiklyis khyuot yoeus cho zainsmuh kuot dyei zis nvng nyvng las gaus goeus. Housoeh las soe ma bos, shohyos gungs mas Dawi lyis sat las yobos ma bos soeu dah suih yah chamus yobos zangh nhang das lah, ge.

⁶Saulo ka Yonathan dah dang gyo las maukhi zis gas, YHENSAIN dwis nyeis zis yah dvyhangteh nyang xauh shei das zis ma nghuot, ge.

⁷Yonathan ka Dawi lyis khi lha hauh cho dvnganh taiq kyoh. Housoeh Yonathan Dawi lyis Saulo jyank mas shwih los las nyah xikkhonh mas xik pheh teh nyeis.

⁸Hauh thang lhyi jes doms bos lyis Dawi gas Philisti jens lyis thuq zan zis yah nyamoq lyis vboms dom sat las nyamoq gas nyah xikkhonh mas phang.

⁹Saulo ka nyah lham chi lha nyah yhen mha tsung toh lyis YHENSAIN jyank masyah ma gis dah dyos nyah thoq mas los. Dawi gas toenk bat shvpyo dyei.

¹⁰Saulo ka Dawi lyis tyoyvm mas guons tsuk das ge nyah lham yah guons yoeuh. Dawi gas Saulo xikkhonh masyah yoh jhank loh. Hauh lham ka tyoyvm mas loh zuk joq. Dawi eq phang lha hauh nyens lyis luiq los.

¹¹Saulo ka nyang lyis lhom lha nvpyo sat das ge, Dawi yhen mha dius nhang kat. Dawi dah yhensain nyhiq Mikha nyang lyis taiq zis gas, Nvng khvnyens nah kang lhyi ma khyuot yoeus lyis gas nvpyo shei das, ge.

¹²Housoeh las Mikha ka Dawi lyis khomhbaiq masyah gyoh nhang lha nyang yoh phang luiq loh.

¹³Mikha ka gungslho yoeus las jung mas lhain toh lho lha mis phomh toh, uhloms mha beq mauh uhkhoeuq toh.

¹⁴Saulo ka nyah dius jens lyis yah Dawi lyis shwih nhang lhyi nyang nos, ge.

¹⁵Saulo Dawi lyis yoeuh das xiklyis nyah dius doms nhang lha taiq zis gas, Nyang lyis ngos sat das, jung yah ngah jyank mas shwih los geh, ge.

¹⁶Nyamoq wvng loh lyis, yoeuh aq, jung mas gungslho dvkoeuq joq, uhloms mas beq mauh uhkhoeuq khoeuq toh.

¹⁷Saulo Mikha lhyi taiq, Nvng ngah jeswus lyis lhuiq kat las ngos lyis chamus heisoeh mhuih? Nyang luiq loh goeus, ge. Mikha Saulo lyis phuk taiq zis gas, Nyang gas, Ngos lyis yoh phang luiq das xiklyis pangh aq, ma nghuot lyis ngos nvng lyis sat das, ge.

¹⁸Housoeh Dawi phang luiq las Samuel nyeis dah wus Rama pheh loh. Saulo kuot cho dvnganh eq nyang lyis taiq kyoh. Housoeh nyang yahge Samuel gas Naiot mha dvgeh loh nyeis.

¹⁹Saulo lyis taiq kyoh los dah dang gas, Yoeuh aq, Dawi Rama mas dah Naiot mas nyeis, ge.

²⁰Saulo ka Dawi lyis shwih das nyhenshang nyah dius jens lyis nhang. Nyamoq gas Samuel shwih uhshe dah lvpe jens dvphung lvpe pe nyeis yvlyis nyvng lyis Mangso dah Dyos gas nyamoq thoq mas jweh las nyamoq eq lvpe pe nyeis.

²¹Hauh cho Saulo lyis tsain taiq kyoh lyis, nyang gohtoeu nyah dius jens lyis doms nhang. Nyamoq eq vgus lvpe pe nyeis. Saulo somh vlhain nyah dius jens doms nhang lhyi, vkhang bang teh vgus bweh loh.

²²Hauh thang lhyi Saulo nyang nyang Rama pheh loh las Sekhu mas dah jeisdwang zainsmuh mas jweh lyis, Samuel yahge Dawi khamha nyeis lah, ge nyei. Dvyuk taiq zis gas, Nyamoq Rama mas dah Naiot mas nyeis, ge.

²³Nyang hau Rama mas dah Naiot pheh loh. Mangso Dyos nyah thoq mas eq jweh las nyang Rama mas dah Naiot jweh shoq kaiq goh loh.

²⁴Nyah dyi eq khyuot tyamp las Samuel xikkhonh mas lvpe pe zis yah hau dvnyeih dvnyens gonh shohchen nyeis. Housoeh las nyamoq gas, Saulo eq lvpe jens mas bos lhyeh, ge.