Read Achang 1 SAMUEL 2 Bible Online

1 SAMUEL 2 - Achang bible

1 SAMUEL 2

¹Housoeh Hana shvmanh dung zis gas, YHENSAIN ka ngah nhaiqlom mas gauslaus zis yah tyink dyei. Nyang kuot toh dyei goeus gvng mas ngos gauslaus. Ngos ngah khyank goh changh lyis yis. Mangso ngos lyis pangh goeus gvng mas ngos gauslaus.

²YHENSAIN teh gyingshang zis hank ma bos. Nvng mas lai las hank ma bos: ngamoq Mangso teh yoeuh gomh soeu ma yoh.

³Khwank dang vtaiq lo, namoq nhuot masyah moengs zis vthuq los nhang: khasoeh ge lyis YHENSAIN ka seq cho bos dah Mangso nghuot las dius kuot muh dvnganh lyis laiq yoeuh xiq yoeuh nyeis.

⁴Thoeuqzoe jens dah lyei gyau tyamp, thungh lains bang gas yom yah dyichih chih toh, yombos las toenk joq.

⁵Xikpheh jo bang gas, gvshih zonoms xiklyis uhkung kuot: yuot bang gas ma yuot lo. Diusthonh gas lo nyhet lhain khoeu. Lo nyo soeu ka lo ma yoh lo.

⁶YHENSAIN ka shei nhang dwis nhang. Shei mau mas yoh khyoq, yoh dwis toq los nhang.

⁷YHENSAIN ka nyungs nhang, dis nhang: yoh nyhen nhang, toeu eq yoh toeutoq.

⁸Nyang nyungs bang lyis tsohmop masyah, chah bang lyis nyamoq dah yaukyenh shanghsenh masyah toeutoq las zaulo jens yah toh, nyoqnho ngelang bos joqyos dyei: khasoeh ge lyis nyeisjvng dah zains gas Mangso zis nghuot, nyang hauh thoq mas mungkvn toh.

⁹Nyang nyah gyingshang bang lhyi gomh dyei das, lhung bang gas soeng soeng noq yvmas tsingtsam joq das. Khasoeh ge lyis vsainnyang yom yah hank ma yoh ung.

¹⁰YHENSAIN dah jeswus gas khyauh tyamp zis xauh das. Nyamoq thoq mas maukhung mhayah maujau jau das: YHENSAIN ka nyeisjvng goms shoq soetuon das, nyah hwankti lhyi ka yomdyei, nyang khyen toh hwankti lhyi ung cho yoh nhang das, ge.

¹¹Hauh thang lhyi Elkana gas Rama mas joq dah nyah yhen pheh loh lo. Nghuot laus eq Loshang Samuel ka phudyei Eli dah xikkhonh mas YHENSAIN dah muh wons wuq nyeis.

¹²Eli dah lotang ka lo lhung tang nghuot. Nyah zomh YHENSAIN lhyi cha xwe ma nhang,

¹³nghuot ya phudyei bang dius jens jyank masyah yoh sang dah toeuh yah sen dah lyi lyis cha xwe ma nhang. Hauh gungsthaiq dvyuk yuk phudyei las shoh jyauq uhlyis, phudyei soeu dah jyeidwis los, nyah loq mas somh tsuq dah shohjwi chi toh. Shoh jyauq nyeis shih uhlyis,

¹⁴hauh soeu ka jyauq nyeis mha dah shoh lyis tsain thauh las houmha dap los goeu lyis phudyei tang jyank yoeus loh. Hau Shilo mas phudyei cho los kuot dah Israel dvnganh lyis housoeh kuot.

¹⁵Nyamoq coeu ma ngheq dyei shih lyis hau phudyei soeu dah jyeidwis los las, phudyei soeu xiklyis phuot das shoh dyei aq, jyauq goeus zis ma o, shoh jen dvdyei aq eq gyangh ge.

¹⁶Dvyuk yuk nyang lyis, Coeu shih ngheq phudyei bah, hauh thang lhyi nvng o khyvlyis yoeus aq ge laus eq, Ma nghuot, gvshih dyei aq, ma nghuot lyis gas lhuot das, gyangh ge.

¹⁷Housoeh hau phudyei tang ka Mangso xikkhonh mas yaunos zainsmuh kuot: khasoeh ge lyis nyah zomh gas YHENSAIN lhyi phuqsoe cho mha houteh ma phauh ma nyang kuot.

¹⁸Hauh uhlyis loshang Samuel gas gyingshang misyhwiq ephod wuot las Mangso xikkhonh mas muh wons wuq nyeis.

¹⁹Zvn yau zvn nyah ungwes gas dyixing[7] mhauhlo kuot las, zvn yau zvn dah phudyei cho kuot das ge nyah yhensain phoq yah doq loh uhlyis, nyah xiklyis chi loh dyei dyei kuot.

²⁰Eli gas Elkana yahge nyah yhensain nyhiq lyis shvmanh dyei las taiq, Nvng YHENSAIN lhyi kyauh dyei toh dah lo gungsthaiq YHENSAIN ka haih vmesbih lyis lo jens dyei bas jungh, ge. Housoeh nyamoq gas nyamoq nyang yhen pheh loh.

²¹YHENSAIN ka Hana lyis shvmanh las nyang loloeu somh yuk, lonyi aiq yuk doms bos. Loshang Samuel gas YHENSAIN dah muh wons zoh lyis muh mas bes los.

²²Gvshih Eli gas svsoh mang los lyis nyah lotang Israel dius jens lyis kuot cho dvnganh lyis eq, YHENSAIN nyeis dah zvng khomh mas zwi dah vmesbih jens yah yangh nyah lotang yhet goh cho eq dvnganh xauhgyo.

²³Nyang nyah zomh lyis taiq zis gas, Nah zomh houteh zis chamus kuot goh? Nah zomh kuot dah lhung cho lhyi, yuk khanghmuh ngos lyis los taiq kyoh goeus.

²⁴Ngah lotang eh, hou mhayah no tyamp geh! Hauh zis gas YHENSAIN dah dius jens taiq goh nyeis dah ma gis thank cho nghuot.

²⁵Dius dvyuk gas gohtoeu dvyuk lyis cu lhyi, Mangso[8] ka cu dah phung xiklyis mehoq tamp dyei das. Nghuot laus eq dius gas YHENSAIN lhyi cu lhyi ka nyah xiklyis mehoq hank yoh tamp dyei das lah, ge. Nghuot laus eq Eli dah lotang ka nyah zomh dah uwus dang ma gyo: khasoeh ge lyis YHENSAIN nyah zomh lyis sat das ge dye nghamh thyet toh goeus.

²⁶Loshang Samuel gas bes los las YHENSAIN xikkhonh mas eq dius xikkhonh mas eq nyoqnho yoh.

²⁷Mangso dah dius dvyuk Eli jyank jweh los las taiq, YHENSAIN heisoeh ge: Egutu mau Pharao yhen mha nah uwus yhenbang lyis ngos dede thuq xoeuq ma nghuot lhyeh?

²⁸Ngah dah phon thoq mas phudyei cho, xangh ngheq cho, ngah xikkhonh mas ephod wuot las ngah phudyei soeu duot das xiklyis Israel vkoq dvnganh masyah ngos nyang lyis khyen yoeus ma nghuot lhyeh? Israel jens ngheq phudyei jyungshuk dvnganh ngos nah uwus yhenbang lyis dyei ma nghuot lhyeh?

²⁹Ngos ngah dius jyank masyah taiq toh dah phudyei yahge jyungshuk lyis namoq chamus nyoq yoeuh noq[9] goh lah? Eli, nvng ngah dius Israel jens dyei dah jyungshuk mas gis thank zis lyis jo shoq zo nhang zis yah nah lotang lyis ngos lyis chungh das thoq lyis chamus chungh nyeis?

³⁰Housoeh las Ngos YHENSAIN, Israel dah Mangso, nah vnyau, nah uwus yhenbang gas phudyei bang khyvlyis ngah xikkhonh mas vcaiq vto yoh suh das oen lai loh uhlyis dangthoengh toh goeus. Nghuot laus eq, Ngos gvshih doms taiq zis gas, Hauh cho lhyi ngos ma toh lo! Hauh gungsthaiq, Ngos lyis chungh bang lyis kyingh ngos chungh das. Ngos lyis ma phauh ma danh kuot bang gas nyoqnho ngelang bi tyamp das.

³¹Yoeuh aq, nah yhen yahge nah uwus yhenbang dah loyvm jens lyis sat buisnyeis jweh das, houlhyi nah yhen mha mang shoq hank ma yoh nyeis lo das.

³²Israel dius goh koq lyis ngos dyei das shvmanh dvnganh lyis nvng nyoq yoeuh noq[10] das, nvng yaukyenh xauh das, nghuot laus eq nah yhen mha mang dah dius khanhamp eq ma doms bos lo das.

³³Nah yhenbang mas ngos dvyuk nyhet toh shih das, nyang gas phudyei soeu teh ngos lyis phuqsoe das. Nghuot laus eq nyang gas nyoqjet das las nghamhloms cho dvnganh bi tyamp das. Nah lo jens dvnganh gas loyvm yoq lyis shei das.

³⁴Dvnyeih dvm lyis nah lo aiq yuk Hopni yahge Phineha shei lyis, hau zis gas ngos taiq zis dvnganh jyoengh bweh los das cho nvng lyis chixoeuq das.

³⁵Ngah ehnyet chank las lomluk dah phudyei soeu lhyi ngos thuq los nhang das. Ngos khyen hwankti xikkhonh mas vjangh phuqsoe das xiklyis ngos nyang lyis vnyau dyei das.

³⁶Nah yhenbang nyet soeu khanghmuh nyah jyank mas loh las, Ngos ohlhyoq dvtsiq xauh zo das nyhenshang phudyei dah muh dvja ja mas jenh kat aq, ge ngwis, ohlhyoq khyiq lyis o lha, dupaiq zis yah shangphu das, ge.