Read Achang 1 SAMUEL 21 Bible Online

1 SAMUEL 21 - Achang bible

1 SAMUEL 21

¹Dawi gas Nob wus, phudyei Ahimelek jyank mas jweh loh. Ahimelek gas gyuk zis yah Dawi lyis taiq zis gas, Hank eq ma bos, nvng dvyuk kyingh jweh los zis gas chamus lah, ge.

²Ngos lyis hwankti muh dvja kuot nhang kat, ge Dawi phudyei Ahimelek lyis taiq. Nyang ngos lyis taiq zis gas, Haih muh hank lyis eq vseq nhang ge yvmvyah, ngah jyeidwis jens lyis dvjoqyos mas langh nyeis geh, oen xik pheh nhang kat.

³Housoeh las nah jyank mas zonoms dvja ja vjoq lah? Ohlhyoq oeng lhyoq nghuot ya, joq zis cha laus eq dyei kat aq, ge.

⁴Phudyei soeu Dawi lyis phuk taiq zis gas, Ngah loq mas hank eq gis zo dah ohlhyoq ma joq: khvlyens nah dius jens vmesbih yah yhet goh cho ma bos lyis gas, gyingshang ohlhyoq gas joq, ge.

⁵Dawi phudyei soeu lhyi taiq zis gas, jyoengh nyamoq ma bos. Ngamoq senhtyau ma nghuot dah gyung cho suh lyis yangh ngah dius jens vjangh lyi bos vgus tsain gyingshang. Hai senhtyau gyung cho mha ngamoq hauh thoq lyis kha iq shang das lah, ge.

⁶Housoeh las phudyei soeu ka ohlhyoq cauh lyis thaiq oeng lha YHENSAIN xikkhonh masyah yoeus tyamp, hau chixoeuq ohlhyoq mas lai las gohtoeu cha eq ma joq yvmvyah hau gyingshang ohlhyoq nyang lyis dyei.

⁷(Hauh nyeih lyis lomsnoq cho mha kuot chah muh lyis kuot nyeis, Saulo dah yvng yoeuh uhjyung, Edom dius Doeg ge soeu dvyuk houmha nyeis jus.)

⁸Dawi Ahimelek lyis taiq zis gas, Nvng sham lham yoh lah? Hwankti dah muh sunk gyen yvmvyah ngos sham lham cha eq ma xauh yoeus chi, ge.

⁹Phudyei soeu ka, Nvng Ela langhkhau mha sat, hau Philisti phoq Goliat dah sham ka misseh yah thop las ephod nungsthank mas joq, o lhyi ka yoeus chi aq, gohtoeu sham ka ma joq, ge. Dawi gas, Hauh sham teh zis ma joq, ngos lyis dyei aq, ge.

¹⁰Dawi gas Saulo lyis gyuk yvmvyah, hauh nyeih lyis toq las Gat dah hwankti Akhish jyank mas phang loh.

¹¹Akhish dah zau jens nyang lyis taiq zis gas, Hai Dawi ge soeu Israel hwankti ma nghuot lhyeh? Saulo sat zis gas khyoenghsoe, Dawi sat zis gas monssoe ge, nyamoq goh zoh lyis dvyuk dvphuk yhang dyei soeu ma nghuot lhyeh, ge.

¹²Nyamoq dah dang lyis Dawi nyah ehnyet mas comh toh las Gat hwankti Akhish lyis svsoh gyuk yvmvyah,

¹³nyang gas honh soeu guons kuot las nyamoq xikkhonh mas khyam khomh thauh khyet, nyah svkanh gas nyah nhuotmi thoq mas lhyauq joq nhang.

¹⁴Housoeh Akhish nyah zau jens lyis taiq zis gas, Yoeuh aq, haih soeu ka honh soeu nghuot, ngah jyank mas chamus shwih los?

¹⁵Ngos honh soeu ma nyvng ku oen nghamh las, ngah xikkhonh mas honh xoeuq bas jungh ge, hauh soeu lhyi ngah yhen mha shwih los lhyeh, ge.