Read Achang 1 SAMUEL 28 Bible Online

1 SAMUEL 28 - Achang bible

1 SAMUEL 28

¹Hauh gyo lyis Philisti jens gas Israel jens lyis zan das ge nyamoq dah jesphung lhyi tsainh toh. Akhish Dawi lyis taiq zis gas, Nvng yahge nah dius jens eq ngos yah dvgeh jesphung mha bos chah zis jyuk jyuk seq aq, ge.

²Dawi Akhish lyis taiq zis gas, Ngos nah jyeidwis cha yoh kuot zis nvng vlhomuh seq das, ge. Housoeh las Akhish Dawi lyis taiq zis gas, Ngos nvng lyis vjangh yah ngah kang zungh dah zau kuot bah, ge.

³Hauh yoq lyis Samuel shei goeus, Israel jens dvnganh gas kukxi zis yah nyang lyis nyah wus Rama mas nyhop. Saulo eq yius lyis khi bang, gyuiswvng bang lyis dvmau gonh masyah shang tyamp.

⁴Philisti bang eq tsain zain las Shunem mas dvp los thoeng toh. Saulo eq Israel dvnganh lyis tsainh las Gilboa mas dvp thoeng.

⁵Saulo Philisti jesphung lhyi nyvng lyis nyang gyuk las nyah nhaiqlom svsoh nvn nyeis.

⁶Saulo YHENSAIN jyank mas nyei laus eq YHENSAIN ma phuk taiq. Yhetmoq mas eq, doeugoh[45] khyvlyis yah eq, lvpe khyvlyis yah eq ma phuk taiq.

⁷Hauh thang lhyi Saulo nyah jyeidwis jens lyis taiq zis gas, Gyuiswvng vmesbih lyis xo geh, ngos nyang lyis cha kuot das zis loh nyei das, ge. Nyah jyeidwis jens taiq zis gas, Endor wus mas gyuiswvng vmesbih dvyuk nyeis, ge.

⁸Saulo ka gohtoeu dyi wuot zis yah nyah hwankti gungs lyis thaiq tyamp las vbusbih aiq yuk yah dvgeh nyenh lyis hauh vmesbih jyank mas e. Nyang hauh vmesbih lyis taiq zis gas, Cha bweh das zis yius lyis bos nyei dyei aq. Ngos nvng lyis taiq das soeu dah dyos lyis toq los nhang aq, ge.

⁹Vmesbih nyang lyis taiq zis gas, Yoeuh aq, Saulo cha kuot goeus. Nyang hauh yius lyis khi bang, gyuiswvng bang dvnganh lyis hauh mau masyah shang tyamp zis nvng seq. Housoeh ngos shei bas jungh ge, chamus ngos lyis twih khyoq nyeis lah, ge.

¹⁰Saulo nyang lyis YHENSAIN dah nyings mas maukhi lha taiq zis gas, YHENSAIN nyeis zis yah dvyhangteh haih cho mha nvng lyis chah yobos eq ma zangh nhang das, ge.

¹¹Vmesbih taiq zis gas, Ngos nah xiklyis hank lyis khi thuq los nhang das lah, ge lyis nyang gas, Samuel lyis shwih thuq los dyei aq, ge.

¹²Hauh vmesbih Samuel lyis nyvng lyis kaiq ngaus las Saulo lyis taiq zis gas, Nvng ngos lyis chamus mhuih? Nvng Saulo nghuot, ge.

¹³Hwankti nyang lyis taiq zis gas, Ma gyuk noh, nvng cha nyvng, ge. Hauh vmesbih Saulo lyis taiq zis gas, Nyeisjvng masyah mangso toq los zis nyvng, ge.

¹⁴Nyang cha yah doeusgoh, ge lyis nyang gas, Lokhoq dvyuk toq los, dyixing wuot chi ge lyis Saulo ka Samuel nghuot yvlyis soh las, nyang nyeisjvng jweh shoq dupaiq.

¹⁵Hauh uhlyis Samuel Saulo lyis taiq zis gas, Nvng ngos lyis toq nhang zis yah ngos lyis chamus thauqkhyi, ge. Saulo phuk taiq zis gas, Ngos svsoh yaukyenh nyeis. Philisti jens ngos lyis jes los zan. Mangso ngos lyis she tyamp goeus las lvpe yah eq, yhetmoq mas eq ma taiq los lo. Housoeh las ngos cha kuot das zis ngos yoh seq das oen ngos nvng lyis lui, ge.

¹⁶Samuel taiq zis gas, YHENSAIN ka nvng lyis tyamp las nah jeswus nghuot goeus lyis gas ngos lyis chamus nyei shih lah?

¹⁷YHENSAIN ka ngos lyis yah taiq goeus zis yah dvyhangteh nvng lyis kuot goeus. YHENSAIN munghdan nah loq masyah yoeus las nah yhenkyoh Dawi lyis dyei goeus.

¹⁸Nvng gas YHENSAIN dah domsyos ma gyo, Amalek jens yahge nyamoq yoh zis dvnganh lyis ma mhont tyamp. Hauh gvng mas YHENSAIN ka nvng lyis gvshih heisoeh kuot nyeis zis nghuot.

¹⁹Hauh thoq lyis nvng yahge Israel jesphung lhyi Philisti jens loq mas kyauh das. Phvnaq nyeihyo nvng eq nah lo jens eq ngos yah dvgeh nghuot das. YHENSAIN ka Israel dius dvnganh lyis Philisti jens loq mas kyauh das, ge.

²⁰Hauh uhlyis Saulo ka Samuel dah dang gvng mas gyuk zis yah nyeisjvng mas lyang nyang jyangh toh. Nyang yom eq thank, khasoeh ge lyis nyang wom ma zo zis dvnyeih dvnyens nghuot goeus.

²¹Saulo nhaiqlom thank yvlyis hauh vmesbih seq lyis, nyang Saulo lyis taiq zis gas, Yoeuh aq, ngos nah jyeidwis nyhiq kang lhyi ma yu lo nah dang gyo goeus.

²²Housoeh las gvshih ngos nah jyeidwis dah dang jenh gyo dyei aq. Ngos zonoms dvtsiq yoeus los bah, nvng tauh loh lyis yombos bas jungh jenh zo aq, ge.

²³Saulo ka, Ngos ma zo das ge he. Nghuot laus eq nyah jyeidwis jens yahge hauh vmesbih yah nyang lyis tungh zo nhang lha, nyang nyamoq dah dang gyo las nyeisjvng masyah toq las jung mas tsung.

²⁴Hauh vmesbih nyah yhen mha noeulo coeu dvdoeu nyeis. Nyang hauh zis lvnyap sat, sunghso mons eq nis las bicheih ma kat ohlhyoq piq las,

²⁵Saulo yahge nyah jyeidwis jens xikkhonh mas chi los las nyamoq tsain zo. Hauh thang lhyi nyamoq hauh nyenh lyis loh lo.