Read Achang 1 SAMUEL 30 Bible Online

1 SAMUEL 30 - Achang bible

1 SAMUEL 30

¹Hauh thang lhyi somh vnyeih lyis Dawi yahge nyah dius jens Ziklag wus mas jweh los. Amalek jens gas Yuda mautyi pheh los zan las Ziklag wus lyis thyoq. Nyamoq wus lyis ngheq tyamp.

²Wus mas dah vmesbih jens dvyuk lyis eq ma sat sat, dvnganh lyis nyamoq yah dvgeh shwih loh.

³Housoeh las Dawi yahge nyah dius jens wus mas jweh los lyis, nyamoq dah wus ngeh goeus cho yahge nyamoq dah yhensain nyhiq, loloeu lonyi jens gas jons loh goeus cho lhyi los nyvng.

⁴Dawi yahge nyah dius jens gas tsain kaiq ngaus las, ngaus das yom ma bos lo shoq ngaus.

⁵Dawi dah yhensain nyhiq aiq yuk, Yezrel lonyi Ahinoam yahge Naba dah chauhmuh Khamel mas dah Abigai eq tsain gyoms loh.

⁶Dawi eq svsoh nhaiqkuk yaukyenh nyeis, khasoeh ge lyis nyah dius jens gas, nyamoq dah loloeu lonyi jens gvng mas nhaiqkuk las Dawi lyis luk yah chomp doeuh sat das ge sont. Nghuot laus eq Dawi gas YHENSAIN nyah Mangso jyank mas yom yoeus.

⁷Dawi Ahimelek dah lo phudyei Abiatha lyis taiq zis gas, Hauh ephod ngah jyank mas jenh chi los aq, ge. Abiatha eq hauh ephod lyis Dawi jyank mas chi los.

⁸Dawi YHENSAIN lhyi nyei zis gas, Ngos haih jesphung lhyi vchank khat das lah? Ngos nyamoq lyis vduons das lah, ge. YHENSAIN phuk taiq zis gas, Chank khat aq, nvng nyamoq lyis jyoengh duons das, dvnganh doms xauh yoeus das, ge.

⁹Housoeh las Dawi yahge nyah dius khyukxo loh las Besor lvng jweh lyis, dvyhamh gas hauh jeis yvm mas nyeis khoq.

¹⁰Nghuot laus eq Dawi yahge nyeixo yuk gas chank khat loh. Aiqxo ka nyo nyung las Besor lvng ma yoh goeu las nyeis khoq.

¹¹Dawi dah dius dvyhamh gas mhanhdyvp dvjoqyos mas Egutu dius dvyuk nyvng las Dawi jyank mas shwih loh. Nyamoq nyang lyis zonoms gvmtsoh, jeis eq gvmshuk.

¹²Maiphang eq dvlhyoq, zvbiq kyuk aiq jyo dyei las zo thang lhyi nyang soq yoh los: khasoeh ge lyis nyang wom ma xauh zo, jeis ma xauh shuk zis somh nyeih somh nyens nghuot goeus.

¹³Dawi nyang lyis nyei zis gas, Nvng hank yah sen? Khalhye yah los, ge. Nyang taiq zis gas, Ngos gas Amalek dvyuk jyank mas jons mus nyeis dah Egutu loyvm nghuot. Lai loh goeus somh nyeih lyis ngos nos yvmvyah ngah yhensain ngos lyis toh khoq.

¹⁴Ngamoq gas Yuda mautyi pheh nyeis Kherethi bang yahge Khaleb mau lyis zan las Ziklag wus lyis ngheq khoq, ge.

¹⁵Dawi nyang lyis nyei zis gas, Nvng ngos lyis hauh jesphung nyeis yvmas vyoh shwih loh das lah, ge. Nyang gas, Nvng ngos lyis ma sat, ngah yhensain loq mas ma kyauh das oen lha Mangso mha maukhi aq. Housoeh lyis ngos nvng lyis hauh joqyos mas shwih loh das, ge toeuh.

¹⁶Housoeh nyang shwih jweh lyis yoeuh aq, Nyamoq gas Philisti mau yahge Yuda masyah thyoq los dah zisyos hounyhoq gvng mas zo shuk, goh pwe kuot las dvpa gonh dyingh loh.

¹⁷Dawi eq nyamoq lyis nyenhthang mhayah nungs nyenhthang jweh shoq sat, gola-u ji las phang dah loyvm nyeixo mas lai las dvyuk eq ma luiq lo.

¹⁸Dawi gas Amalek yoeus loh zis dvnganh doms xauh yoeus. Nyah yhensain nyhiq aiq yuk lyis eq khyuot yoeus.

¹⁹Dawi loshang logis, loloeu lonyi, zisyos, lhuot loh zis dvkoeuq eq ma nyet lo shoq dvnganh doms xauh yoeus.

²⁰Dawi gas noeu phung, yvng phung dvnganh lyis eq doms xauh yoeus; nyah dius jens gaunyhauq dvnganh nyamoq xik pheh khat loh[46] las, Haih zis gas Dawi dah lvnyhvp nghuot, ge.

²¹Sunk daus las ma yoh chank lo yvmvyah Besor lvng mas nyeis khoq bang aiqxo jyank mas Dawi jweh lyis, nyamoq eq Dawi yahge nyah thang mha chank bang lyis zes das ge thuq los. Dawi eq nyamoq yah nvmtanh xauhgoh las nyamoq lyis jeshuh.

²²Dawi yah loh bang mas lhung bang dvnganh gas, Haih bang yang yah ma loh yvmvyah, yang xauh yoeus dah lvnyhvp mas zis nyamoq lyis cha eq ma dyei das. Nyamoq gas hank eq hank nyang yhensain nyhiq, lo jens shwih las loh bas jungh, ge.

²³Dawi gas, Ngah boekyis eh, yang lyis chank zungh las, yang zan loh dah jesphung, yah loq mas kyauh dah YHENSAIN dvdyei dah lvnyhvp lyis housoeh ma gis kuot.

²⁴Haih cho mha namoq lyis hank gyo dyei das lah? Moeng loh zan bang yoh vgus, zisyos zungh las nyeis khoq bang eq yoh bas jungh, aiq shot yah dvyih yih yoh bas jungh, ge.

²⁵Hauh nyeih masyah khvnyhik jweh shoq houka Israel jens mas lyi bweh joq.

²⁶Dawi Ziklag wus jweh lyis, hau lvnyhvp mas zis nyah buisnoms, Yuda logis jens jyank mas huon lha taiq zis gas, YHENSAIN dah jeswus loq masyah yoh los dah lvnyhvp, namoq nyhenshang jyungshuk lyis yoeuh geh, ge.

²⁷Houka Bethel wus, Yuda mautyi Rama wus, Yati wus,

²⁸Aroer, Sipmot, Eshtemoa wus jens,

²⁹Rakhal wus, Yeramel vkoq bang, Ken vkoq bang,

³⁰Horma, Borashan, Athak wus,

³¹Hebron wus yahge Dawi nyang eq, nyah dius jens eq khau khoq ku dah wus dvkhau yah bang lyis huon.