Read Achang 1 SAMUEL 5 Bible Online

1 SAMUEL 5 - Achang bible

1 SAMUEL 5

¹Philisti jens gas Mangso dah Kwi lhyi yoeus las, Ebeneza masyah Ashdod pheh chi los las,

²nyamoq mangso Dagon yhen mha chi loh las Dagon gungslho nvm mas toh.

³Nvpsangh Ashdod bang toq los lyis yoeuh aq, Dagon gungslho gas YHENSAIN dah Thanghchvp Kwi xik mas, nyeisjvng mas lains gop joq. Nyamoq gas Dagon gungslho lhyi toeu lha nyah joqyos mas doms toh.

⁴Nungsnvp nyamoq toq los lyis, Dagon gungslho ka YHENSAIN dah Thanghchvp Kwi xik, nyeisjvng mas lains gop joq. Dagon gungslho dah uhloms yahge loqwu gas khomh tank thoq mas thyet kih toh las Dagon gungslho vdung dvjoq lo.

⁵Housoeh las Dagon dah phudyei bang eq, Dagon yhen mha los paiq bang eq Ashdod wus mas dah Dagon yhen khomh tank mas khvnyhik jweh shoq ma nang.

⁶Ashdod wus yahge hauh wuxom mha bang lyis YHENSAIN ka than than joeng las dyings jyen[13] nos yah yaudyei.

⁷Heisoeh bweh los zis Ashdod bang nyvng lyis nyamoq taiq zis gas, Israel Mangso dah Thanghchvp Kwi, yah jyank mas ma gis joq lo: nyah loq gas yang yahge yah Dagon phvra lyis nos nhang.

⁸Housoeh yvmvyah nyamoq gas Philisti hwankti 5 yuk gonh lyis khi huom nhang lha taiq zis gas, Yang Israel Mangso dah Thanghchvp Kwi lhyi khasoeh kuot das lah, ge. Nyamoq gas, hauh kwi lhyi Gat wus mas loh toh goh, ge. Housoeh nyamoq gas Israel Mangso dah Thanghchvp Kwi lhyi gohtoeu Philisti wus nghuot dah Gat mas yoeus loh.

⁹Houmha loh toh thang lhyi YHENSAIN ka hauh wus lyis joeng lha mhont, dius ngislo kuhlo lyis yau dyei. Gungs khau mha dyings jyen nyuk nhang.

¹⁰Housoeh las nyamoq gas Mangso dah Thanghchvp Kwi lhyi gohtoeu Philisti wus Ekron pheh dih toh. Mangso dah Thanghchvp Kwi Ekron mas jweh loh lyis Ekron bang kaiq zis gas, Ngamoq yahge ngamoq dius lyis sat das ge, Israel Mangso dah Thanghchvp Kwi ngamoq jyank mas dih los, ge.

¹¹Housoeh las nyamoq gas Philisti hwankti jens khi huom nhang lha taiq zis gas, Israel Mangso dah Thanghchvp Kwi ka ngamoq yahge ngamoq dius lyis ma sat das xiklyis hauh yvlyis nhang kat goh, nyah joqyos mas loh bas jungh, ge. Khasoeh ge lyis Mangso ka than than joeng las hauh wus gonh mas shei shoq xungh dah yomh dyingh joq.

¹²Ma shei dah Philisti jens gas dyings jyen nyuk shangh las nyamoq dah mangso jens lyis pangh aq ge kaiq dung.