Read Achang 1 SAMUEL 6 Bible Online

1 SAMUEL 6 - Achang bible

1 SAMUEL 6

¹YHENSAIN dah kwi Philisti mau mas lhamhmuh nyhet khyvp joq goeus.

²Philisti jens gas phudyei bang yahge hweq kat bang lyis khi lha taiq zis gas, YHENSAIN dah Thanghchvp Kwi lhyi ngamoq khasoeh kuot das lah? Nyah joqyos mas cha yah nhang kat das lah? Ngamoq lyis taiq aq, ge.

³Nyamoq taiq zis gas, Namoq Israel Mangso dah Thanghchvp Kwi nhang kat das lyis vkom ma gis nhang kat. Yobos khyuot jyungshuk dyei chah. Housoeh kuot lyis namoq mas gis los das: Chamus nyang namoq lyis joeng nyeis yvlyis seq das, ge.

⁴Nyamoq taiq zis gas, Nyang lyis dyei kat das dah yobos khyuot jyungshuk gas cha nghuot das lah, ge. Nyamoq gas, Philisti hwankti jens dah sonzoh yah dvyhangteh, xing dyings jyen gungslho oeng koeuq, xing gyuq gungslho oeng koeuq dyei kat chah. Khasoeh ge lyis namoq eq namoq dah hwankti jens eq yomh dvja kyingh dvnos, ge.

⁵Housoeh las namoq mas dah dyings jyen gungslho yahge namoq mau lyis mhont nyeis dah gyuq gungslho kuot chah. Housoeh Israel Mangso dah phunk lyis chungh chah. Hauh uhlyis nyah loq gas namoq yahge namoq dah phvra thoq mas eq, namoq dah maunyeis masyah eq yoeus tyamp mvbeh.

⁶Egutu bang yahge Pharao gas nhaiqlom than teh namoq nhaiqlom cha kuot than toh goh? Nyang nyamoq lyis mauhphoh loqmuh kuot lyis nyamoq kat kat las Israel jens loh ma nghuot lhyeh?

⁷Housoeh las gvshih namoq lhyingh saiq kuot las, koeu ma huon ku, noeulo chang dah noeuzains aiq doeu lyis lhyingh mas tap las, noeulo lyis gas nyah joqyos mas toh geh.

⁸YHENSAIN dah Thanghchvp Kwi hauh lhyingh thoq mas kih lho lha dih kat dah yobos khyuot jyungshuk xingzis kat toh kwi lyis hau Kwi nvm mas toh las lhyingh lyis nyah cho pheh kat kat geh, nyang kyingh loh bas jungh.

⁹Hauh thang lyis lhyingh khapheh loh zis chank yoeuh kat aq. Hauh lhyingh Bet Shemesh wus pheh xoeu loh lyis, Israel jens dah Mangso ka haih yau zainsmuh yang lyis dyei goeus. Housoeh ma nghuot lyis gas nyang yomh nhang kat zis ma nghuot, nyang pheh yah bweh zis dvnghuot cho yang seq das, ge.

¹⁰Dius jens housoeh tsain kuot las noeulo chang dah noeuzains aiq doeu lhyingh mas she tap, noeulo lyis gas zungs mas tsain lhunk toh.

¹¹Nyamoq gas YHENSAIN dah kwi yahge xing dyings jyen gungslho eq, gyuq gungslho eq kat toh kwi lyis lhyingh thoq mas kih.

¹²Noeuzains aiq doeu gas ma las Bet Shemesh cho pheh talhoeu chank yah loqwi loqyos ma-i, dan dan loh. Philisti hwankti 5 yuk eq Bet Shemesh jweh shoq chank loh.

¹³Bet Shemesh wus bang gas langhkhau mha sunghso yhomh nyeis mhayah nghank yoeuh kat lyis Thanghchvp Kwi nyvng kat las svsoh gaus.

¹⁴Hauh lhyingh gas Bet Shemesh dius Yoshua dah yos mas wvng los las lukmuh dvlom joq yvmas no yap joq. Nyamoq gas hauh lhyingh lyis khyop las noeuzains aiq doeu lyis YHENSAIN xiklyis ngheq dyei jyungshuk kuot las ngheq phudyei.

¹⁵Lewi jens gas YHENSAIN dah Thanghchvp Kwi eq, houyah dvgeh xing bos dah kwi eq yoeus las lukmuh lom thoq mas kih toh. Bet Shemesh bang eq hauh nyeih lyis nyang, YHENSAIN lhyi nyoshoq dah ngheq phudyei yahge gohtoeu phudyei yah phudyei.

¹⁶Philisti hwankti 5 yuk moq eq hauh zis nyvng khoq las hauh nyeih lyis nyang Ekron pheh tauh loh.

¹⁷Philisti jens YHENSAIN lhyi tauh dyei kat dah yobos khyuot jyungshuk ge xing dyings jyen gungslho ka Ashdod xiklyis dvkoeuq, Gaza xiklyis dvkoeuq, Ashkelon xiklyis dvkoeuq, Gat xiklyis dvkoeuq, Ekron xiklyis dvkoeuq nghuot.

¹⁸Xing gyuq gungslho 5 koeuq gas Philisti hwankti jens oeng yuk guon dah Philisti wusmuh oeng wus yahge hauh vyvm vwi mas dah wus jens dah gungsthaiq nghuot. Hauh YHENSAIN dah Thanghchvp Kwi kih dah lukmuh lom gas bweh lai loh goeus cho dah kanghjyoeng duot das xiklyis Bet Shemesh dius Yoshua yos mas khvnyhik jweh shoq joq.

¹⁹Gvshih Bet Shemesh bang hau YHENSAIN dah Thanghchvp Kwi khau mha yoeuh yvmvyah nyang nyamoq nyhetci yuk lyis sat. Housoeh YHENSAIN ka nyamoq vbomsdom lyis sat yvmvyah nyamoq kukxi nyeis.

²⁰Bet Shemesh bang taiq zis gas, Hai gyingshang dah YHENSAIN Mangso xikkhonh mas hank yoh yap das lah? Nyang yah jyank masyah we loh das xiklyis nyang lyis hank jyank mas dih kat das lah, ge.

²¹Nyamoq gas Kiriat Yearim bang jyank mas dius nhang lha taiq zis gas, Philisti jens gas YHENSAIN dah Thanghchvp Kwi los doms dih toh goeus, namoq los yoeus geh, ge.