Read Achang 1 SAMUEL 7 Bible Online

1 SAMUEL 7 - Achang bible

1 SAMUEL 7

¹Kiriat Yearim bang gas YHENSAIN dah Kwi los yoeus loh las boms mas joq dah Abinadab dah yhen mha toh. Hauh YHENSAIN dah Kwi lhyi gomh das xiklyis nyah lo Eleaza lyis gyingshang nhang.

²Hau YHENSAIN dah Thanghchvp Kwi Kiriat Yearim mas aiqci zvn nyangh shoq joq. Hauh uhlyis Israel yhenbang dvnganh gas svsoh kuk las YHENSAIN jyank pangh cho dung.

³Samuel Israel yhenbang dvnganh lyis taiq zis gas, Namoq dah ehnyet nhaiqlom dvnganh yah YHENSAIN jyank pheh tauh los geh, namoq gohnyau mangso yahge Astarte gywes nyhiq gungslho jens lyis toh tyamp chah. YHENSAIN lhyi namoq nyang gungs namoq dvnganh kyauh zis yah nyang lyis kyingh phuqsoe nghuot lyis gas, namoq lyis Philisti yomsoq masyah khyuot yoeus das, ge.

⁴Housoeh Israel jens gas nyamoq dah Bala, Ashtarot gungslho lyis tyamp las YHENSAIN lhyi kyingh phuqsoe.

⁵Samuel taiq zis gas, Israel jens dvnganh Mizpa mha zain huom geh, ngos namoq xiklyis YHENSAIN lhyi dung dyei das, ge.

⁶Nyamoq eq Mizpa mha zain huom zis yah jeis kham lha YHENSAIN xikkhonh mas huot, hauh nyeih lyis womkyi lha, Ngamoq YHENSAIN lhyi tyi lha yaunos kuot goeus, ge rhen. Samuel eq Mizpa mha Israel jens lyis soetuon dyei.

⁷Housoeh Israel jens Mizpa mha huom cho Philisti jens xauhgyo lyis, Philisti hwankti 5 yuk Israel jens jyank mas jes toq. Israel jens hauh cho xauhgyo lyis Philisti jens lyis gyuk.

⁸Israel jens Samuel lyis taiq zis gas, Ngamoq dah YHENSAIN Mangso ka ngamoq lyis Philisti jens loq masyah khyuot yoeus bas jungh, ngamoq xiklyis shvmanh malyen dung dyei aq, ge.

⁹Samuel gas nauh shuk dah yvnglo yoeus las YHENSAIN lhyi ngheq phudyei jyungshuk kuot las doeu gonh ngheq phudyei. Housoeh Samuel gas Israel xiklyis YHENSAIN lhyi dung las YHENSAIN gyo yoeus dyei.

¹⁰Samuel hauh jyungshuk ngheq phudyei nyeis lyis Philisti jens gas Israel jens lyis zan das ge los. Nghuot laus eq hauh nyeih lyis nyang, YHENSAIN ka maukhung masyah nyamoq lyis tyi dah maujau jau kat. Nyamoq svsoh uhnungh nungh, gyuk dvn las dungsshih lvnggang phang wuih loh.

¹¹Israel jens eq Mizpa mhayah thuq las Philisti jens lyis vluk Betkha jweh shoq khat zan.

¹²Hauh thang lyis Samuel luk yoeus las Mizpa yahge Shen jo mas cuk las taiq zis gas, YHENSAIN ngamoq lyis gvshih jweh shoq pangh, ge las hauh yvlyis Ebeneza[14] ge nyhink.

¹³Housoeh Philisti jens somh, las YHENSAIN ka nyamoq, Samuel dah caiq thank shoq, Israel mau mas ma doms wvng zan bas jungh ge nyamoq lyis kyoq toh.

¹⁴Philisti jens Israel jyank masyah yoeus toh dah wus Ekron masyah Gat jweh shoq doms dyei. Hauh wuxom eq Philisti loq masyah Israel jens doms xauh yoeus. Israel dius jens yahge Amori jens jo mas eq nyenstap goeus.

¹⁵Samuel eq nyah dvcaiq gonh Israel jens lyis guon.

¹⁶Zvn yau zvn Bethel, Giga, Mizpa mha komh jweh las houmha dah Israel jens dah phyen-goh cho lhyi soetuon dyei.

¹⁷Nyah yhen ka Rama mas joq las, houmha tauh los los kuot. Houmha eq nyang soetuon soeu khyvlyis muh wons wuq. Nyang houmha YHENSAIN xiklyis phon ci toh.