Read Achang 1 SAMUEL 9 Bible Online

1 SAMUEL 9 - Achang bible

1 SAMUEL 9

¹Benyamin vkoq - Aphia vhuh - Bekhorat yhenbang - Zeror nyeilo - Abiel lo Kish ge soeu dvyuk nyeis. Nyang gas dis las zau soeu nghuot.

²Nyang mas Saulo ge vwot yungh las phoqyvm nghuot dah lo dvyuk bos. Saulo ka nyhang lha Israel jens dvnganhmoq gas nyah kohthoq nyhank dvbos. Nyang iq yungh soeu hank ma bos.

³Saulo dah uwus Kish dah mauhlyihzoe tsain dyuk loh. Kish nyah lo Saulo lyis taiq zis gas, Jyeidwis dvyuk shwih las mauhlyihzoe loh xo geh, ge.

⁴Nyang gas Ephraim boms mau yahge Shalisha dvkhau yah xo laus eq mauhlyihzoe ma nyvng. Shalim mau lai lyis eq houmha ma nyeis. Benyamin mau gonh xo lyis eq ma nyvng.

⁵Zup mau mas jweh lyis Saulo nyah jyeidwis lyis taiq zis gas, Yhen pheh tauh lo goh, housoeh ma nghuot lyis ngah uwus mauhlyihzoe lyis ma chiq, yah zomh lyis chiq nyeis das, ge.

⁶Hauh jyeidwis toeuh zis gas, Vmangh lhoq shih, haih wus mas Mangso dah dius dvyuk nyeis. Nyang gas nyoqnho ngelang bos, khasoeh ge lyis nyang taiq dang jyoengh bweh los. Nyah jyank mas loh goh, nyang yah zomh mauhlyihzoe khamha xo nyvng das zis yoh taiq kyoh mvbeh, ge.

⁷Saulo nyah jyeidwis lyis nyei zis gas, Yah zomh nyah jyank loh lyis, nyang lyis cha loh dyei das? Sunghso lhyoq eq dye goeus, nyang lyis dyei das zis cha ma bos, vnghuot lah, ge.

⁸Hauh jyeidwis toeuh zis gas, Ngos ngwis kyvp mhauhlo dvkyvp yoh. Ngos nyang lyis haih ngwis kyvp yoh dyei. Housoeh lyis nyang yah zomh mauhlyihzoe khamha yoh xo nyvng das cho taiq das, ge.

⁹Saulo phuk taiq zis gas, Gis, Loh goh, ge. Housoeh nyah zomh gas gyingshang soeu nyeis wus mas loh. Nyah zomh hauh wus jing mas doq loh lyis, jeis kham loh dah nyelo jens yah xauhgoh las, Haih wus mas nyvng soeu[16] vnyeis lah, ge nyamoq lyis nyah zomh nyei.

¹²Nyang nyeis, ge nyelo jens toeuh. Nyang nah zomh dah xik mha nghuot. Nah zomh lvnyap loh lyis gas, nyang lyis loh nyhi das. Wus khau mha nah zomh wvng loh yah dvyih nyang lyis nyvng das. Khvnyhik nyang wus mas jweh los. Khasoeh ge lyis dius jens jing thoq mas joq phon thoq mas phudyei das nghuot. Khi toh dah dius jens gas nyang ma jweh dvchank ma zo. Khasoeh ge lyis nyang phudyei zis lyis shih shvmanh chah. Nah zomh gvshih loh lyis gas nyang jing ma doq loh shih lyis nah zomh nyang yah xauhgoh das, ge.

¹⁴Housoeh Saulo yahge nyah jyeidwis wus pheh doq loh. Nyah zomh wus khau mha wvng loh nyeis lyis, nyah zomh gas Samuel shvmanh dung joqyos pheh loh das ge nyah zomh suh wvng loh cho pheh thuq los zis lyis nyvng.

¹⁵Nyinaq YHENSAIN Samuel lyis taiq zis gas,

¹⁶Nvpyo gvshih shvhoeu lhyi Benyamin vkoq mas dah dius dvyuk ngos nah jyank mas nhang kat das, nyang lyis ngah dius Israel jens lyis guon soeu khyvlyis nvng coeu juot dyei das. Nyang nyamoq lyis Philisti jens jyank masyah khyuot yoeus das. Ngos ngah dius jens dah khamzo cho lhyi nyvng goeus. Pangh aq, ge nyamoq kaiq thwe lhyi ngos xauhgyo goeus, ge.

¹⁷Samuel Saulo lyis nyvng lyis YHENSAIN nyang lyis taiq zis gas, Yoeuh aq, ngos nvng lyis taiq toh soeu nghuot. Haih soeu ka ngah dius jens lyis guon das, ge.

¹⁸Saulo ka wus khomh nvm Samuel jyank mas ni loh las, Nyvng soeu khamha nyeis, ngos lyis taiq kyoh aq, ge.

¹⁹Samuel Saulo lyis phuk taiq zis gas, Nyvng soeu ngos nghuot, ngah xik pheh shvmanh dung joqyos mas doq loh aq, nah aiq yuk gonh khvnyhik ngos yah dvgeh zo chah, nvpyo ngos nah zomh seq mes zis dvnganh taiq kyoh las nah zomh lyis yhen pheh nhang kat das.

²⁰Lai loh goeus somh nyeih gyo lyis dyuk loh dah nah mauhlyihzoe lyis vnghamh lo, nyvng goeus. Nghuot laus eq Israel dius jens gas hank lyis svsoh o? Nvng yahge nah uwus yhenbang lyis nghuot, ge.

²¹Saulo ka, Ngos gas Israel vkoq mas ngis thank dah Benyamin vkoq nghuot. Benyamin vkoq mas eq ngah yhenbang gas yhaugyen cho nain thank. Nvng ngos lyis housoeh chamus taiq lah, ge.

²²Samuel gas Saulo yahge nyah jyeidwis lyis yvpmuh mas shwih hwank las khi toh bang somhci joqyos yoeus toh kihgus dah vwhomh mas tsung nhang.

²³Samuel gas jyauq soeu lhyi eq, Ngos nvng lyis dyei las gohtoeu toh aq, oen taiq toh shoh chi los aq, ge.

²⁴Jyauq soeu eq khyen toh dah bungssan yoeus las Saulo xikkhonh mas toh. Samuel taiq zis gas, Yoeuh aq, haih shoh gas nah xiklyis nyhet toh zis nghuot. Zo aq. Haih shishenh lyis ngos khi toh bang yah dvgeh zo das xiklyis ngos nah xiklyis nyhet toh. Housoeh hauh nyeih lyis Saulo ka Samuel yah dvgeh zo.

²⁵Nyamoq gas shvmanh dung joqyos masyah wus mas jweh las, nyamoq Saulo xiklyis yhenkhung thoq[17] mas yhetyos sont dyei[18] las,

²⁶nyang houmha yhet. Nungsnvp nyoq nyvng hanh lyis Samuel gas Saulo lyis yhenkhung mha khi lha taiq zis gas, Toq aq, ngos nvng lyis nhang kat lo bah, ge. Saulo eq toq las nyang yahge Samuel dvgeh talhoeu pheh thuq loh.

²⁷Wus thang mha gyoh jweh e lhyi Samuel Saulo lyis taiq zis gas, Nah jyeidwis lyis xik mas loh langh aq oen taiq aq, ge. Hauh jyeidwis loh thang lhyi Samuel tsoq taiq zis gas, Nvng gas dvsoq yap shih aq, ngos nvng lyis Mangso cha taiq zis taiq kyoh das, ge.