Read Alladian KEYUM KERO 1 Bible Online

KEYUM KERO 1 - Alladian bible

KEYUM KERO 1

¹Pílen-ruulendo delo, kerayalumpe Shédíbí taleng emla amongem pílen geto.

²Delo amosi moi-muang atí kamato delokke mílíírupe ito, delokke eerína siyéng teyolo kamoe bííbomto, delokke Shédíke Aide siyéng teyolo gyanggo bomto.

³Delo Shédíbí poto, “Angune kalangka.” Delo arope angune kakai.

⁴Shédíbí angundem kaala gaipe kaato. Delo bí angundem kaamo delok ipansuto.

⁵Shédíbí angundem longe emto delokke kaamodem yue emto. Delo yumelang roe ila de kerayalum longepe ikai.

⁶Delo Shédíbí poto, “Asi aradelo rísuko kalangka delokke de rísude asilok asikonem ipansulangka.”

⁷Dekepe Shédíbí rísuko píla asidem rísu delokke rumkíng lolang teyonglo duupan sumoto. De dekepe ikai.

⁸Shédíbí rísudem taleng emto. Delo yumelang roe ila de longede annyinape ikai.

⁹Delo Shédíbí poto, “Taleng rumkílo duuna aside engkol kolo eedum sulangka delokke moopíe lenlangka.” De dekepe ikai.

¹⁰Shédíbí moopídem among emto, eedumsuna asidem bí siyéng emto. Deme Shédíbí kaala gaipe kaato.

¹¹Delo Shédíbí poto, “Amode, among agí rísulo kasuna, agí ségulok atí-atípe ayé éélen suna ayékana esing kídíem lang atí-atípe amí lensuna nesi-neyang kídíem garsa sumolangka.” De dekepe ikai.

¹²Dekepe ila amongde agí ségulok atí-atípe ayé éésuna esing kídíem lang amí gesuna nesi-neyang kídíem garsa sumoto. Deme Shédí bí kaala gaipe kaato.

¹³Delo yumelang roe ila de longe angumnape ikai.

¹⁴Delo Shédíbí poto, “Talengke rísu delo longem lang yuem ipansudope angun kídíe kalangka. Delokke dekede dítak lokke toodí-yaamo, gédí-ponggo longe kídíem lengkanna iyod kídípe ila,

¹⁵talengke rísulokke angun kídípe bulu ila amongeme angun bidope ilangka.” De dekepe ikai.

¹⁶Delo Shédíbí angun annyiko: angun bojéyana doonyidem longem ngunbom dope delokke angun améyana poolodem yuem ngunbom dope pílento; bí takar emkom píto.

¹⁷Shédí bí angun kídíem talengke rísudelo melíkla, amongem angun bidope delokke,

¹⁸longemla yuem ngunbommola kamuemla angunem ipansudope imoto. Deme Shédíbí gaipe kaato.

¹⁹Delo yumelang roe ila de longede appinape ikai.

²⁰Delo Shédí bí poto, “Asilo turna atíe bojéko kala asi kídíem bííbom langka delokke talenglo pettang kídíe bííbomla rísu delokke arotkon lokke ila arotkon lope yobgoo bomlangka.”

²¹Dekepe Shédíbí siyéng lokke bottena ato-siro kídíem pílenla, asilo turla, asi kídíem bííbomla yonggo bomna deddína ato-siro emlang atí-atípe ina pettang kídíem pílento. Deme Shédíbí kaala gaipe kaato.

²²Delo Shédí bí buluke teyolo utepooroem rulíkla sipe poto, “Nolu ome-oo ola parlangka delokke asi kídí lolang siyéng kídílo bííbom langka, pettang kídíe parla goobyak langka.”

²³Delo yume lang roe ila de longe pilngonape ikai.

²⁴Delo Shédíbí poto, “Amode agí ségulok ilensuna turna ato-siro, simon-sili, eggoona atí-siríelang amongke monkír-tangkír kídíem batlen molangka.” De dekepe ikai.

²⁵Depeila Shédíbí monkír-tangkír kídíem buluke agí ségusupe yésudopelang simon-sili kídíem buluke agí ségusupe delokke amolo eggoona kídíem buluke agí ségusupe yéyinsudope píyinto. Deme Shédíbí kaala gaipe kaato.

²⁶Delo Shédíbí poto, “Kaju, amoso eggoona ato-siro takamke teyololang, simon-sili kídí tabungke teyolo delokke asarlo yobgoona pettang kídí takamke teyololang siyéng kídílo yonggona engo kídí tabungke teyonglo ruutumbomdope, ngolum gesunako, ngoluke mimanglok ngolu taniem pílaju.”

²⁷Depeila Shédíbí agí mimang sulok tanieme pílento. Shédíke mimang sulok bí taniem píto. Milo kolang mimekope bínyim bí pílento.

²⁸Shédíbí bínyike teyolo utepooroem ruulíkdola sipe poto, “Otíng-oyin kala parlangka delokke amosime bííbomla ruutum bomlangka. Siyéng kídílo yégona engo kídí tabungke teyololang asarlo yobgoona pettang kídí takamke teyolo delokke among so yégona turna ato-siro kídí takam teyolo ruutumbomla yébomkalangka.

²⁹Kaatola, nonyike donam-tíínampe idope amí kala ayé ééna esing tabung emlang among so garsana nesi-neyang takamem ngo bidung.

³⁰Delokke amoso eggoona ato-siro kídí takamke legapelang, asarlo yobgoona pettang kídí takamke legape delokke kédéng so yégoona taro tabungke dope-tíípenam legape yayina nesi-neyang tabungem ngo biyinto.” De dekepe ikai.

³¹Delo Shédíbí bíkke pílensunam ato-siro tabungem kaayinla dekeme gaipe kaato. Delo yumelang roe ila de longe de akkénape ikai.