Read Alladian KEYUM KERO 11 Bible Online

KEYUM KERO 11 - Alladian bible

KEYUM KERO 11

¹Kerape tani amoso, agom atelpe pobosula gomuge akam dungai.

²Edílo ami kídíde sanggodanlo magoola yégoodungem bulu Babilon amolo yiibeko mapaala delo dungato.

³Delo bulu pobosuto, “Kaju ngolu itangem edíídope romla ilaju.” Dekepe ila bulu itang píla delokke dekedem gagbomnape mutkyon kato.

⁴Depe ipala bulu manbosuto, “Kaju ngolu doolung luuneko ilenla, taleng telokai píídope ponyuk ekumko molaju; depe imílo ngoluke amíne kayé delokke ngolu tani amoso yépit-yéyit bosumayé.”

⁵Delo RUUTUM bí doolung luune demlang ponyuk ekumdem kaape tokto.

⁶Delo RUUTUM bí poto, “Arope ami kídísi atelpe idung delokke bulu takam agom atelpe pobosudung. Bulu sikepemin iyén; buluke ipe míínamdem ingkuekom itum lamayé.

⁷Kaju, ngolu tokla buluke agom aradelo aní-aní gomugem sobí-soyél sulíkla, bulum tatkén bosu yimadope ilaju.”

⁸Depeila RUUTUM bí bulum tani among sokke rego kéényulo mapit-mayit bosudope ipansumola, bulu doolung luune dem momato.

⁹Depeila delok amínem Babilon emla mínto, kapeila delo RUUTUM bí ami tabungke teyolo aní-aní gomugem sobí-soyélsuto delokke tani among sokke rego kéényulo mapit-mayit bosudope bulume ito.

¹⁰Shemke odong kídíe si: puumu gíronge taknyinape idoem, Shemke dítak língkolo dugríge píídoem, bí Arpakhshadme oto.

¹¹Arpakhshadme orongem Shembí dítak língko pilngoko yéla ome-uem ayoko oto.

¹²Edílo Arpakhshad takying angum kolang takngoko yétodí delo bí Shelahme oto.

¹³Shelahme orongem Arpakhshad dítak língko appi kolang tagumko yéto. Bí abíd ome-ue kom kato.

¹⁴Edílo Shelahbí takying angumko yétodí, delo bí Eberme oto.

¹⁵Eberme orongem Shelahbí dítak língko appi kolang takying angumko yéto, delokke abíd ome-uete kato.

¹⁶Edílo Eberbí takying angum kolang takpi píítodí, delo bí Pelegme oto.

¹⁷Pelegme orongem Eberbí dítak língko appi kolang takying angumko yéto. Bí abíd ome-ue kom kato.

¹⁸Edílo Pelegbí takying angumko yétodí, delo bí Reume oto.

¹⁹Reume orongem Pelegbí dítak língko annyi kolang dítak konangko yéto. Bí abíd ome-ue kom kato.

²⁰Edílo Reubí takying angum kolang taknyiko yétodí, delo bí Serugme oto.

²¹Serugme orongem Reubí dítak língko annyi kolang dítak kínídko yéto. Bí abíd ome-ue kom kato.

²²Edílo Serugbí takying angumko yétodí delo bí Nahorme oto.

²³Nahorme orongem Serugbí dítak língko annyiko yéto. Bí abíd ome-ue kom kato.

²⁴Edílo Nahorbí takying annyi kolang konangko yétodí, delo bí Terahme oto.

²⁵Terahme orongem Nahorbí dítak língko kolang takying kolang konangko yéto. Bí abíd ome-ue kom kato.

²⁶Edílo Terah bí dítak íying kínídko yétodí, delo bí Abram, Nahor, delokke Haranme oto.

²⁷Terahke odonge sipe idung: Terahbí Abram, Nahor delokke Haranke abue delokke Haranbí Lotke abue.

²⁸Haranbí bím olenko Saldian among lokke Ur doolunglo, abu turdung adape sikai.

²⁹Abram lang Nahor bínyi mime bomto. Abramke mime amíne Sarai delokke Nahorke mime amíne Milkah. Milkah bí Haranke ome, delokke Haranbí Iska keeteng abue.

³⁰Saraibí negenpe ila ome-oo kamato.

³¹Terahbí bík oo Abram melang bík oten, Haranke oo Lotme delokke Abramke mimepe inam bíkke nyameng Saraime Babilon among lokke Ur delok gílenbola Kanaan amope gíboto. Bulu Haran moole lope gíríla dungato.

³²Delo Terah bí dítak língko annyi kolang takngoko turpala sikai.