Read Alladian KEYUM KERO 12 Bible Online

KEYUM KERO 12 - Alladian bible

KEYUM KERO 12

¹RUUTUM bí Abramme poto, “No agíke amolok, nok abu ekumlok, nok edung-eranglok lenla; ngok among lengkannamlo gílangka.

²Nom ngo botteruna opín kope imoyé. Ngo nom utepooroem ruulíkla, nok amínem bottemoyé, depe ikolok no utepooro leríng amipe iyé.

³“Séko nome utepooro políkyédí, dem ngo utepooroem ruulíkyé. Delokke séko nome péyédí, deme ngo péyé, delokke nokkelok tani among sokke opín kídí tabunge, ngok utepooroem paayinyé.”

⁴RUUTUM ke pokampe Abrambí gílento delokke Lotkom gímín geto.

⁵Abrambí bíkke mime Sarai melang bík bíro oo Lotme delokke buluke erang tabung emlang Haranlo ami paanam takamem Kanaan amope gílenboto. Edílo bulu Kanaanlo píítodí,

⁶Abram bulu among raadang delok gílang, Shekem ayirlo duuna Moreh lokke kumsuko esing delo pííto. Delo longe delo Kanaan ami kídíe among delo yébomdo.

⁷Delo RUUTUM bí Abramme lengkan sudola poto, “Nok otíng-oyinlo sim among sim ngo biyé.” Depeila RUUTUM bí lengkansunam legape Abram delo rungguko RUUTUM keepe píbito.

⁸Delokke bí Bethel lokke sanggodan díítumlo gíto, delokke bík tombuem Bethelke anggodan delokke Ai doolungke sanggodan pénsamlo holíkpala, RUUTUM keepe rungguko píla, RUUTUM ke amínem yidgeto.

⁹Delokrongem Abram bí among delokke sokkodan, Negeb danpe entoku.

¹⁰Kanaan among delo dírí-kenoe kato. De yagoyape ila Abram bulu Ijipt amope gíto.

¹¹Ijipt amolo píngaduem bík mime Saraime poto, “No mime kamponako.

¹²Edílo Ijipt ami kídíe nom kaayédí, bulu ‘bíkke ménge,’ emla ngom mokala nom turmoyé.

¹³Depeila no ngokke bírme emla manmílo, nok legape ngom turmola aiyope ngom kaarík-tatríksuyé.”

¹⁴Abram buluke Ijiptlo píírodem, Ijipt ami kídíe Saraime kamporupe kaato.

¹⁵Edílo Ijipt lokke ruutum kídíe kaatodí, delo Pharaohme Saraike kampodem bulu popala, mimedem Pharaohke ekum delo langaato.

¹⁶Mime delok legape, Pharaohbí Abramme ai-kampope kaarík-tatríkla, gooru, mér sobén, gado delokke béérang kídíemlang uut simon daadiloope bigulto.

¹⁷Idola Saraike legape RUUTUM bí Pharaoh melang roja ekum delokke ami kídílo pesorunam kinamko melíkto.

¹⁸Delo Pharaohbí Abramme tomla sipe poto, “Kape no ngome sikepe ikan? Mimesi nokke ménge emla kape ngom pomatone?

¹⁹No kape, ‘Bí ngok bírme,’ emla ngome mimepe lamokan? Menape nok mimesim laasula no gígétoku.”

²⁰Delo Pharaohbí ami kídíem políkla, bíkke mimedemla ato-siro tabudem ila bím gílen motoku.