Read Alladian KEYUM KERO 13 Bible Online

KEYUM KERO 13 - Alladian bible

KEYUM KERO 13

¹Ijipt delok Abram lang bíkke mime delokke bíkke bomnam ato-siro tabung delang Lot bulu Negeb amongpe gítoku.

²Abrambí gooru-sobén, arem tadok delokke uun em bojéko bomla miremtuai.

³Negeb delok bí gílangkula Ai kelang Bethel pénsamlo, kerape bíkke tombu hoko moolop delo píítoku.

⁴Delo kerangke píko runggu delo RUUTUM me kumsuto.

⁵Delo Abram kíng gímín gena Lotkom sobéne lang mére bojéko kato.

⁶Depeila bínyi lekope duubosudope among yétade pííram bito, kapeila bínyike simon-silide bojé along bosuto.

⁷Delok teyolo Abramke gooru sobénem kaabomnelang Lotke gooru sobénem kaabomna kídíete lutímínsuto. Delo longe kídí delo Kanaan amielang Perijjit ami kídíe amongdem duubomto.

⁸Depeila Abrambí Lotme pobosuto, “Ngonyike pénsam lolang ngonyike simon siliem kaabomna kídí pénsamlo lumín kabosupe aimang, kapeila ngonyi erang atele.

⁹Nok keraso among tabusi kamanía? Ngonyi yépan bosulape. Nok mííbanamem topongtoka. No lakkédanem toyémílo ngo lakbígem delokke no lakbígem toyémílo ngo lakkém toyé.”

¹⁰Lot kanggo sudola kaatoname Jordan asi toktíng tabude Joar loope asi kala Ijipt among kísape ido, delokke RUUTUM ke etor torgonam among kísape ido. Sim Sodom emlang Gomorrah em RUUTUM ke nyokmo mangadape ibosuto.

¹¹Depeila Lotbí Jordan asi toktíng tabudem toto, delokke Lot sanggodanpe byakla bínyi yépan bosuto.

¹²Abram bí Kanaan amolo duuto, delokke Lotbí yiibe among delokke doolung luune kídílo dungala bíkke tombu ekumem Sodom doolung loope muato.

¹³Sodom lokke ami kídíe atírumana, paab agérlo gértína amipe RUUTUM ke keralo yéto.

¹⁴Lotke duupansurongem, Abramme RUUTUM bí poto, “Nokke dungko delok no línggí-sokko, sanggo-anggoem kanggo sutola;

¹⁵Nok kaanam among tabusim, ngo nomlang nok otíng-oyinem yénam takam legape bisuyé.

¹⁶Ngo nokke otíng oyinem among sokke demul kísape imoyé. Among demul sim saplanade nok otíng-oyin emkom saplayé.

¹⁷No darepla among sime, ape pelang adoope magootoka, kapeila sim nom ngo biyé.”

¹⁸Delokrodem Abrambí bíkke tombuem taala, Hibron ayir lokke Mamrelo duuna Kumsuko esing kako delo dungadola, RUUTUM kelo rungguko píto.