Read Alladian KEYUM KERO 14 Bible Online

KEYUM KERO 14 - Alladian bible

KEYUM KERO 14

¹Babilon among lokke Amraphel rojake longelo, bí lang Ellasarke roja Ariok, Elamke roja Kedorlaomar lang Goiimke roja Tidal bulu;

²Sodomke roja Bera, Gomorrahke roja Birsha, Admahke roja Shinab, Jeboiimke roja Shemeber delokke Belake roja (dem Joar emlate mandung) bulum takame mimak imínsupe gílento.

³Si roja pilngosi magpépe ibosula supakke Sina Siyéng emkunam Siddim Yiibe delo gídumsuto.

⁴Bulu Kedorlaomer rojake rumkílo dítak íying kolang annyikope duupala dítak íying kolang angumnanalo bík mirupe gerepto.

⁵Takying kolang takpinanalo Kedorlaomer bí roja angong magpépe ina kídíem gíbola, Ashteroth Karnaim lokke Rephimme, Ham lokke Jujimme, Kiriathaim yiibe lokke Emimme,

⁶delokke Edom díítum lokke Horith kídíem mimak ila, ikumla, yépol mooruk among abelo duuna Elparan loope monlíkto.

⁷Delokrongem bulu gílat sulangkula, Enmishpat emlate mannam Kadeshpe gílangkula, Amelek doolung kídíem mimak ila, ikumla, Hajajon Tamarlo duuna Ammorit ami kídíemte ikumto.

⁸Delo Sodom, Gomorrah, Admah, Jeboiim delokke Bela lokke roja kídíde buluke maglíngem gíbola Siddim Yiibelo:

⁹Elam, Goiim, Babilon delokke Ellasar kídíke roja appiem roja pilngode mimak imínsuto.

¹⁰Siddim yiibelo alkatarang arung mílí katuai. Edílo Sodom kelang Gomorrahke roja annyide mimak delok dugnyokkupe itodí, arung kídí delo bínyi obung líkkai. Idola abíd roja angumde díítelo dugnyok sanggekai.

¹¹Roja appide Sodom keelang Gomorrah lokke ato-siro tabungem delokke donam-tíínam kídíemte língkutpala enkaku.

¹²Bulu, Sodomlo duuna Abramke bíro oo Lot melang bíkke ekuserang takamemte bomtak sukaku.

¹³Idola amikone dugnyok langkula, Amorit ami Mamreke kumpom esing delokke anínlo duuna Hibru ami Abramme legang takamem popabito. Mamre lang bíkke bíro Eskol delokke Aner bulu Abramke magpépe ine.

¹⁴Edílo Abram, bíkke bíro uem umbomkai emla tattodí,

¹⁵bíkke ekumlo olennam ami kídíem, midum língko angum kolang midum íying kolang píínyiko tomdumsula, yuem mimak iyabomla, bulum ikumla Damaskas línggíng Hobah moolop deloope monlíkto.

¹⁶Depe irodem bí bíkke bíro oo Lot melang bíkke ekuserang kídíem delokke mime kídíemlang ami kídíem aasibotoku.

¹⁷Edílo Abrambí Kedorlaomer melang bíkke roja angong kídíem mimaklo ikumpala aatokudí delo Sabhe yiibe delo (dem roja lokke yiibe emlate mantuai) Sodom lokke roja bím kaaríksupe gíríkto.

¹⁸Delo Melkijedek, Salem lokke roja pelang Kedon Yalumna Shédíke mirípe inabí, ettíng loklang onggur alanglok bomríkla gíríkto.

¹⁹Bí Abramme utepooro agom políkdola poto, “Among talengem pína, Kedon yalumna Shédíbí, bík utepooroem biyar kalangka.

²⁰Delokke nome miru teyolo ikummodope imona, Kedon yalumna Shédíme yidgedung.” Delo Abram, bíkke mirulok paalenkunam ekuserang takam delokke íying sanpegem Melkijedekme bisuto.

²¹Sodomke rojade bím poto, “Ekuserang dem no bomtoka, idola ami kídíem ngom bitokuka.”

²²Delo Sodomke rojadem Abram manto, “Among talengem pína RUUTUM Kedon yalumna Shédíke amínlok ngo pésula podung,

²³nokke enno demangkom leyug rímo delokke ekurang atí bommayé. Demamílo ngomin Abramme mirem motone emla no manyé.

²⁴Ngo agísukepe atí lamayé. Ngok ami kídíe ingkuemdí dotone delo petom ngo irísuyé. Idola ngokke magpéé Aner, Eskol delokke Mamre bulum tarongem laamotoka.”