Read Alladian KEYUM KERO 15 Bible Online

KEYUM KERO 15 - Alladian bible

KEYUM KERO 15

¹Sikesim irongem Abramkíng, RUUTUM ke agome kaarí-kaanyo kolok pííto, “Abram no pesomapeka, ngo nok tamte; nokke amane botteyé.”

²Abram poyansuto, “E RUUTUM Shédí, nok amanem ingkokodí biyén? Kapeila ngo ome-oo kamadada, delokke ngok ekum lokke ruutumem Damaskas lokke Eliejermin ibomyén.

³No ngome ome-oo bimanam legape, ngok abíl konemin ruutumem doge bomyékune.”

⁴Delo RUUTUM me bí podupe tattoku, “Si amisi nok ekurangem yége bommayé, nok agíke ue yégesuyé.”

⁵Delo Abramme RUUTUM bí luyulo lenmopala poto, “Taleng telo kaadusudola takar kídíem hanla domílo hankíto; telok kísape nokke otíng-oyine iyé.”

⁶Abram RUUTUM me míngkesuto, depeila bím RUUTUM bí deena amikope toríksuto.

⁷RUUTUM bí bím poto, “Ngomino nome Babilon lokke Ur doolung lok laalenla, sim amosim yébomdope tomlenna RUUTUME.”

⁸Abram bím poto, “E RUUTUM Shédí, ngo amosim yébomyé emla kapekísa kényén?”

⁹Bí bím poto, “No dítak angum-angumna ruoko, bénbílko, méroko delokke pekí kolang perong ooko ngok keraso bomalangka.”

¹⁰Dekedem Abram bomala pettang kídí kékondem raadanglok papansula, pakétonam tarong eelendem laaríksula, orek annyikope leeto.

¹¹Edílo sogum kídíe simangdem aabomtodí, Abram dekedem monpakla ibomto.

¹²Doonyi uangdelo Abrambí pesola danname ila yagorupe immie iyato.

¹³Delo RUUTUM bí Abramme poto, “No sim arope míílangka, dítak língko appi loope nokke otíng-oyine abílpe ila bulum iréé sinyola, bulu ami amolo magoodola yéyé.

¹⁴Idola bulum ipusilééla ina kídídem ngo edo rayéku, delokke edílo bulu delok gílen yékudí, bulu yagorupe ekuserang kala lenyéku.

¹⁵Idola no agísuedan mijing jingkaklo ai-kampope sila, nok abu buku kídarlo gíyéku.

¹⁶Bulu siirum appinalo so aalatsuyéku, kapeila Amorit kídíke deemang amoe apíngmangada.”

¹⁷Edílo doonyie uala kaamotodí, míkkíe ila, eme írna peking kolang írna meruko adín pakénam kídí pénsam delok gíto.

¹⁸Delo longe delo RUUTUM bí Abramkíng daapong ibosudola sipe poto, “Nok otíng-oyin kídíem, Ijipt among lokke rísulok ila bottena korong Euphrateske pénsamso duuna,

¹⁹Kenit, Kenijjit, Kadmonit.

²⁰Hittit, Perijjit, Rephaim,

²¹Amorit, Kanaan, Girgashit delokke Jebusit among kídí sim ngo biyé.”