Read Alladian KEYUM KERO 16 Bible Online

KEYUM KERO 16 - Alladian bible

KEYUM KERO 16

¹Abramke mime Saraibí, bím atí ome-oo obimato. Saraibí Ijipt lokke Hagar emnam pakneko kato.

²Iname, Abramme Sarai sipe poto, “RUUTUM bí ngom ome-oo omadope inamem no kaasudung; no paknedem mimepe laatoka, depe imílo bíkkelok, ngo ome-ooko paalado.” Delo Abrambí Saraike agomem tatbito.

³Kanaan amonglo takying kope Abramke duudoem, bíkke méng Saraibí Ijipt mime Hagarme, Abramke éémépe laabito.

⁴Abramke Hagarme éémépe bomrongem, bí koo gela, ane ruutum Saraike teyolo adum-ale ibomto.

⁵Depeila Sarai Abramme poto, “Ngok teyoso imemnamde nokkelo kakalangka. Ngo nom éémépe, ngok paknem bito. Edílo bí koo gekadí, delo kape bí ngom adum-ale ibomkan? RUUTUM bí ngonyik pénsamlo aro-aromangem kaabi kalangka.”

⁶Idola Abram Saraime poto, “Kaatola, nok paknede nok alag lomin duune. Nok míngkorpe no bím itoka.” Depeila, Saraibí Hagarme atímape ebín-ebon ibomla, bí dugnyok gekai.

⁷Shur doolungpe gína bedang delokke korong rojíkkolo RUUTUM ke kotoki kone Hagarme kaaríksula,

⁸sikepe íngkíto, “Saraike pakne Hagar no, ingkolokda aaton delokke ingkoloda gídakne?” Delo bí poyansuto, “Ngok ane ruutum Sarai kelok dugnyok gedung.”

⁹RUUTUM ke kotokide bím poto, “Nok ane ruutumlo aalat sulangkula, bík rumkílo duulangkuka.”

¹⁰RUUTUM ke kotokide sikepe poto, “Nok otíng-oyinem, ngo sanam yimadupe mití-maglíngpe imoyé.”

¹¹Delo RUUTUM ke kotokide bím potoku, no kooko gedung; dem ookope oyé. No bíkke amínem Ishmael emlangka, kapeila nokke ankíla kapnamem RUUTUM bí tatbito.

¹²“Bí moonam gado kísape yéla, bí ami mirupe, amie bík mirupe iyé, delokke agíke edung-erang lokkete mootepe yéyé.”

¹³Hagar agíem íngkísuto, “Ngo arope Shédíme kaala, bím kaarongemte turla yédunaya?” Depe míípala, bím lupona RUUTUM dem bí sipe poto, “No kaana Shédíko.”

¹⁴Depeila Kadesh kelang Berod raadalo duuna déérung dem, Birlahairoi[1] déérung emkai.

¹⁵Hagarbí Abramme ooko obila, delok amínem Ishmael emto.

¹⁶Abramke dítak íying píínyi kolang takkéko idoem, Hagar Ishmaelme oto.