Read Alladian KEYUM KERO 17 Bible Online

KEYUM KERO 17 - Alladian bible

KEYUM KERO 17

¹Edílo Abramke dugríge, íying konang kolang dítak konang todí, delo RUUTUM bí, Abramme lengkansudola poto, “Ngomin Miram yalumna Shédíbí, ngok agomem tatla deenampe yélangka.

²Ngo nokkíng daapong ibosula, nome yagorupe parmoyé.”

³Delo Abram lebíng konídola kumsuto. Delo Shédíbím potoku,

⁴“Kaatola, ngok daapongem nokkíng ibosuto, no mití-maglíng opín kídíke abupe iyé.

⁵Nok amínem Abram emyimape, Abraham emyéku, kapeila ngo nom mití-maglíngke abupe imoyé.

⁶Nom ngo yagorupe parmola, nokkelok ngo opín kídíem kalenmola, nokkelok roja kídíete lenyé.

⁷Ngokke daapongem, ngonyike pénsam lolang nok otíng-oyin loope, agínpe iyar bompenam daapongpe imoyé, delokke nokkelang nokke méélam otíng-oyin keepeteng, ngo Shédípe iyé.

⁸Delokke nokke supakke yégongko among sime, nomlang nok otíng-oyin kídíem, sim takam Kanaan among sim agínpe bomyar bomdope ngo biyé, kapeila ngo nokkelang buluke Shédípe iyé.”

⁹Abrahamme Shédíbí poto, “No agísuelang nokke méélamke otíng-oyin kídíe, ngok daapong sim siirum-siirum loope bomyar langka.

¹⁰Simoko nolang nokke méélamlo, nok otíng-oyinke bomyarpenam ngok daaponge: noluke aralo milokong tabungde dínbíng iyodsuyé.[2]

¹¹Nolu agí adínlo dínbíng iyodsuyé, simoko nokkela ngokke pénsamlo daapong iyode.

¹²Longe píínyina ojingem dínbíng iyodyé, delokke sime siirum-siirum loope, noluke agí osunam oo kídíemlang noluke mootelok laala agíke ekumlo duubonam delokke luyulok langaanam abíl milokong tabunge iyargela iyodsuyé.

¹³Si nokkelang ngok pénsamlo, ibosutonam turyarna daapong iyodem kaananape iyé.

¹⁴Ingko milokongedí agíke dínbíngem iyodsumayéne, bím ngokke amikope sanyimayé, kapeila ngokkíng bí daapong iyodem igemang.”

¹⁵Delo Shédí Abrahamme potoku, “Nokke mime Saraime, Sarai emyimape supak kelok ila, Sarah emla mínlangkuka.

¹⁶Ngo bím utepooro rulíkto, bíkkelok ooko olenmoyé; delokke ngokke utepooro agomlok bí opín kídíke anepe ila bíkke otíng oyin kídí aralok roja kídíe lenyé.”

¹⁷Delo Abraham lebíng konídola, migmue among danlo idola ngilla mííto, “Dítak língkona ami ngolang, takying konangna mime kooko ododín?”

¹⁸Depe mííla, Shédíme Abraham poto, “E, dekemílo Ishmaelme nok kangkolo yémotoka.”

¹⁹Shédíbí bím poto, “Ma. Nokke mime Sarahbí ooko geyé, no bím Isaak emla amínem mínlangka. Bík otíng oyinloope turyarna daapongem ngo bíkkíng ilíkyé.

²⁰Ishmaelke legape ngo nom tatbito. Kaatola, ngo bík teyolo utepooro ruulíkla bojéko ome-uem kamola parmoyé, delokke bí roja íying kolang annyike abupe ila bím opín bottenakope imoyé.

²¹Idola Isaakke teyolo ngok daapongem ibosuyé, bím lunnyingke toodílo, sikena longelo, Sarahbí oodem oyé.”

²²Agomem poyin bosurodem, Shédíbí Abrahamke keralok gíkaku.

²³Depe irongem Shédíke pokampe, Abrahambí edung-erang lokke milokong tabungemla Ishmaelme, delokke olennam emlang renam milokong abíl takamem delo longe delo dínbíng iyodyinto.

²⁴Abrahamke dínbíng iyodsudo delo bí takying konang kolang dítak konangko ido.

²⁵Ishmaelme dínbíng iyoddo delo bík dítage takying kolang tagumko ido.

²⁶Delo longepak delo Abrahamlang bík oo Ishmael bínyi dínbíng iyodsuto.

²⁷Delokke bík edung-erang lokke milokong tabungemla olennam delokke renam milokong tabung emteng dínbíng iyodyinto.