Read Alladian KEYUM KERO 18 Bible Online

KEYUM KERO 18 - Alladian bible

KEYUM KERO 18

¹Longe raadang kolo, tombu eyab keralo Abrahamke duudungem, RUUTUM bí Mamre lokke kumsuko esing kolo lengkansuto.

²Abraham kaatoname midum angumko, bík anínlo dagdupe kato. Edílo bí bulum kaatodín, delo bí bík dungko delokke gíríkla amonglo pelala kumto.

³Bí lupoto, “Noluk keralo ngom ayang kaapaatumílo E Ruutum, ngom gíbong mayika,

⁴ngom asiko laabimoi, delo nolu alem arbínsula, esing rumkíngso apéétoka.

⁵Noluke béérang keraso aabinam legape, ngo dopenam anyongko itabiyé. Delo nolu dola-tííla, noluke gígosupe gísudokupe.” Bulu bím poyansuto, “Aiyé, nok pokampe itola.”

⁶Delo Abrahambí tombulo menape aalangkula Sarahme poto, “No menape tírkak angumkope gairuna atalok laala burla goona ettínglok ito.”

⁷Delo Abraham gooru alung delo lomala, ngella gairuna rubílko umla béérangem bito; delo béérade keenyupe lombomkai.

⁸Depe irodem bí gakír, dohi delokke keenyunam adín emla abíd donam kídíem buluke keradelo lengabito. Buluke doduem, bí esing rumkíng delo buluke anínlo dakto.

⁹Bulu bím poto, “Nok mime Sarah bí ingkolo?” “Bí tombu arang esi,” emla bí poyansuto.

¹⁰Delo RUUTUM bí poto, “Silo kísana moodílo, ngo lekoda lunnying aayéku, delo nok mime Sarahbí ooko oyé.” Dem agomdem bík méélam delo, tombu eyablo dakla, Sarah tatsito.

¹¹Abrahamla Sarah bínyi mijing eejo bosudobong.

¹²Dem tatla, Sarah agíe ngilsula posuto, “Ngok miloe mijila, ngote eejola irodem, ngo erapnamko kayé adadí?”

¹³RUUTUM bí Abrahamme poto, “ ‘Ngo eejokai, kape kísa ngo kooko gelayé adan,’ emla kape Sarahbí míísula ngilkane?

¹⁴RUUTUM ke ilamanam kadunia? Lunnyingke sikena moodílo ngo aayéku, delo Sarah bí ooko oyé.”

¹⁵Delo Sarah pesola topaksula manto, “Ngo ngilmang.” Idola bí manto, “Ma. No arope ngilto.”

¹⁶Delo ami kídíde gerep langkula Sodompe kaasuto delokke Abraham, bulum yamlík mínpe gímín geto.

¹⁷RUUTUM agísue posuto, “Ngo ingko kodí ipe emla idudí, dem ngo Abraham keelok rumnyokmayé.

¹⁸Kapeila Abrahamke otíng-oyine, bottena opín kope iyé, delokke tani amongke opín kídíe, Abraham keelok, utepooro rulíknamem paayé.

¹⁹Ma, kapeila bíkke ome-ue, bíkke otíng-oyin loope, RUUTUM ke bedalok yédope delokke ingkuedí deene delokke aine, dekeme poyilsula ikolok, ngokke pésunamem bíkke teyolo, ngo ipíng líkdope bím ngo tomlensuto.”

²⁰Delo RUUTUM bí poto, “Sodom kelang Gomorrahke piyyange bottekai,

²¹ngokkíng píína piyyang agomde aroedí, aromangedí, ngo gíla kangkíyé.”

²²Delo midum annyide delok gílenla Sodompe tokto, idola Abrahambí RUUTUM kíng asoope dakmín geto.

²³Delo Abraham aaníndola poto, “No arope deena amiem, atímanalo nyoktak sumoyénía?

²⁴Míngkítoka, doolung elo midum íying pilngoko deena amie kadung emmílo, buluke legape dooludem, mesiimape nyokmoyénía?

²⁵Atímana amilo deena amiete nyoktak sumonam agérde, nokkelok mooteng daklangka. Demamílo, de deenem atímanalo akampe míílíkname. Nokkelok dekena ségue mooteng daklangka. Tani among takamem kebang lubinade deenampe ipe aiyé.”

²⁶Delo RUUTUM bí poto, “Sodom aralo midum íying pilngoko, deena amiem paayémílo, buluke legape Sodomem, ngo nyokmomayé.”

²⁷Abraham poto, “Ngo nok keralo atí popemane, kapeila ngo kédéng lok pínam taniko, iname ngokke sikepe aapí bottepe íínam sim, no ayang bilangka.

²⁸Míngkítoka, midum íying pilngo ayanpe midum íying appi kolang pilngoko kamílo, buluke legape dooludem nyokmo yénía?” RUUTUM poyansuto, “Midum íying appi kolang pilngo legape, ngo nyokmomayé.”

²⁹Lekoda Abraham íngkítoku, “Midum íying appiko kamílo?” Bí poyan suto, “Midum íying appi legape, ngo imayé.”

³⁰Abraham lekoda potoku, “E Ruutum, no marmapeka, ngo lekoda ííyéku, midum íying angumko kayémílo?” Bí poyan suto, “Midum íying angumko paamílo, ngo imayé.”

³¹Abraham lekoda potoku, “Ruutum nok keralo sipe aapí mirampe ponamem ayang bilangka. Míngkítoka, midum íying annyiko kamílo?” Bí poyan suto, “Midum íying annyi legape ngo nyokmomayé.”

³²Abraham lekoda íngkítoku, “E Ruutum, no marmapeka, ngo sim agom atel sim íngkí poyéku. Míngkítoka midum íyingko kamílo?” Bí poyan suto, “Midum íyingko kamílokom, buluke legape ngo nyokmomayé.”

³³RUUTUM bí dekepe Abraham kíng lupo manmo ibosurodem, bí gíkaku delokke Abrahamte bíkke dungkolo gísutoku.