Read Alladian KEYUM KERO 19 Bible Online

KEYUM KERO 19 - Alladian bible

KEYUM KERO 19

¹Edílo teyong kotoki annyide yumedem Sodomlo píítodí, delo doolung delokke yabgo luuyab delo Lot bí duudo. Edílo Lot bí, bínyim kaatodí, bí gerepla, gíríkla, migmoe gubadola poto,

²“Ngok ruutum kídía, nonyike béérang ekum danpe gíkén biyika. Nonyike alem arbínsula, yoh sim doobila, nyampoke roem nonyike gítípe gílangka.” Bínyi poyansuto, “Ma, ngonyi yoh sim bedaso yégoyé.”

³Idola bí bínyim yagorupe manbomla, bínyi bíkke ekum delo aabito; bí bínyim donam-tíínam delokke ettíng ibila, bínyi dola-tííla ito.

⁴Idola bínyike kedamang adape, Sodom lokke ami kídíe, yaamé mijing emmape, tabunge ekumdem gargong aabomto.

⁵Lot me bulu tomla poto, “Siyumke, nokkíng ami aana kídíde ingkolo? Ngolukíng bínyim laalento.” Bulu bínyim atímape ibosupe emla depe emto.

⁶Delo Lot, bík méélamlo eyabem sittum sulíkdola, buluke keralo lendola bulum

⁷lupoto, “Sikepe atímape imapeka, bíro kídía, nolum ngo rogudung.

⁸Kaatola, ngo ami ketbo sukímana ome annyiko kadung, bínyim ngo nolum laalen biyé. Bínyike teyolo noluke míínampe itoka, idola ami annyi sim atí imapeka, kapeila, bínyi ngokke miboe delokke ngo bínyim mosisuyé.”

⁹Idola bím bulu luto, “Daggéto, no mibo miying amino, ngolum kebang lubipena amino séko? Bínyim pemílo, nom ngolu pakyape atímape iyé.” Delo bulu Lot me ralnampe nííbomla eyabdem níípén tatape ibomkai.

¹⁰Idola midum annyide Lot me gagla huapalangkula, eyabem sittumto.

¹¹Delo bínyi luyudelo níngana ami kídídem mikma moyinto; depeila bulu buluke aradelo tummín bedín sula, eyabem memta goto.

¹²Delo ami annyide Lot me poto, “No so abíd amiyang kadun? Nokke oo, makbo, ome demangkom doolung araso ali-atod kadun? Bulum sokke laalentoka;

¹³kapeila, doolung sim ngonyi nyokmoyé, legade, sok ami kídar sokke piyyang gusore RUUTUM ke keralo botte alongkai, depeila RUUTUM bí ngonyim luune sim nyokmodope melíktung.”

¹⁴Depe pokolok, Lot gílenla bíkke magbopena kídíem poto, “Menape, sokke gígélape, kapeila RUUTUM bí sim nyokmoyé.” Idola magbopena kídíde, bím luberdung emla mííto.

¹⁵Roh rokom rodem, teyong kotoki annyide Lot me pogapdola poto, “Menape darepla nok mime emlang ome annyiem delokke so duuna kídíem, gíbola lomlentola, demamílo doolung sim gukolo nolumte gutak supelo.”

¹⁶Idola bí mííne-mííngoto. Idokom RUUTUM bí ayangkolok, teyong kotoki annyide bímla bík mime delokke ome annyidem alaglok gagla doolung luyu delo gílen boto.

¹⁷Bínyike luyu lenbo rongkudem, “Noluke yénam legape dugnyok getola; kangkut sumapeka delokke yiibedan loote tekí-teyang kamapeka, díítum danpe duksa langka, demamílo nolumte gutak suyé” emto.

¹⁸Delo Lot bí bínyime poto, “E ngok ruutum kídía, ngolum depe imomayika;

¹⁹nonyike béérange, nonyike kangkolo ayanampe ikai delokke nonyike ayange ngok yénamem mopítla lengkandung. Ngo dííte telo duksa lamang, nyokmopene ngom píípula, ngo sipelo.

²⁰Kaatola, e doolung esi dugpísuladope aníndung, delokke doolung esi améng nako, ngo elo gílayé delokke elo ngok yénamem ipít sulayé.”

²¹Bí poyansuto, “Aiyé, ngo tolíkdung. Nok ponam doolung esim ngo nyokmomayé.

²²Menape elo gíla, no dugpít suto langka. Nokke elo pííma tetedem ngo atí ilamang.” Lot bí doolung dem améne emkolok, doolung delokke amínem Joar emto.

²³Joarlo Lotke píídudelo doonyie saato.

²⁴Delo RUUTUM bí, taleng telok eme dorna líídorem Sodom lolang Gomorrahlo pedongpe olík moto.

²⁵Bí yiibe delo duuna doolung tabungem, ami tabungem, neyi-neyang tabungemte nyokyinmoto.

²⁶Idola Lot ke mimede kaangkut sulangkula, bí alo siitung kope ikai.

²⁷Rokompe Abraham gíla, RUUTUM kíng dakbo suko delo dagato.

²⁸Bí, Sodom delo Gomorrah pe delokke yiibe dan tabudem kanggoto. Delo bí kaatoname, among delokke míkkí kídíde bottena medung aralok míkkí saana kísape kaato.

²⁹Edílo Shédíbí yiibe delokke doolung kídíem nyokmo todí, bí Abrahamme míípasula Lot me simomape dugsimoto.

³⁰Lot bí Joar delo duunamdem pesola, díítumlo bíkke ome annyiem gíbola bupík kolo duubosuto.

³¹Ome abíyanade bírme dem sipe lupoto, “Ngonyike yaibí mijing kai, delokke ngonyim mimepe bomla, tani ikampe ipena kamang.

³²Kaju ngonyi yayime apong tíngír sumola, yayi kelok otíng-oyine kadope immín gelape.”

³³Depeila bínyi abudem tíngír sumopala, yoh dem abíyade immín geto, idola bí tíngír delok atí kénmato.

³⁴Longe kondem agude bírme dem poto, “Meyo bíkkíng ngo immín geto. Su yumemkom bím tíngír sumopala no immín getopíam; depe imílo yayi kelok ngonyi koo kayé.”

³⁵Dekepe bínyike abudem lekoda bínyi tíngír sumo kupala delo aníyanade immín geto, idola bí tíngír delok atí kénmato.

³⁶Depeila Lot ke ome annyide bíkkelok koo geto.

³⁷Ome abíyade ooko ola, bím Moab emla mínto. Bí silo meloke Moab ami kídíke abue.

³⁸Aníyadete ooko ola delokke amínem Benammi emto. Silo meloke Ammon ami kídíke bí abue.