Read Alladian KEYUM KERO 2 Bible Online

KEYUM KERO 2 - Alladian bible

KEYUM KERO 2

¹Dekepe taleng kuppo simlang amosim delokke sokke takamem píyinto.

²Delokke longe kínídnana longe delo, Shédíbí bíkke ibomnam agér takamem iyinto. Depeila bí longe kínídnana longe delo bíkke agér inam takamlok apééto.

³Delo Shédíke ruulenla, pílen sunam agér tabunglok bí apééla ikolok, dem longe kínídnana longe dem Shédíbí utepooroem ruulíkla deemoto.

⁴Taleng kuppo simla among sim pílen delokke dooyinge sikepe idung: Taleng kuppo emla among sim píyinla iro longe delo,

⁵RUUTUM Shédíke among so pedong omomape ila among so esing-ééng atíe kamape delokke nesi-neyang atí-siríe garsamape ila among sim arík ibompena tani atí kamape idoem;

⁶asi aapamko among ara belok saala among tabusim asipe balyin gooto.

⁷Delo RUUTUM Shédíbí amolokke demullok taniem pílen geyéla bíkke nyobung arung delok turgenam nganamem ngalíkto. Delo tanide turna amikope ikai.

⁸Depe irodem RUUTUM Shédíbí sanggodanlo duuna Edenlo etorko torgoopala, bíkke pítonam amidem delo meto.

⁹Delokke RUUTUM Shédíbí among delok deddína dope-tíípenam emlang atí-atípe ina kampona esing-ééng kídíem garsamoto. Delok teyonglo torgong raadang delo ainemlang atímanem kénpan sumona esing elang turmonake esingete kato.

¹⁰Delo Edenlok korongko biilenla torgoonam dem asi bito, delokke depe irodem de biipan sulangkula korong appikope ikaku.

¹¹Kerangke korong delokke amíne Pishon: de uun kako Kabila amongem enggo bomdung.

¹²Among delokke uune aidung delokke teyolo nampona paaramnam Bellium elíng elang asirna Oniks elínge kato.

¹³Korong annyinana delokke amíne Gihon. Si korong si Kush amongem enggo bomdung.

¹⁴Korong angumnana delokke amíne Tigris. De Assiria among lokke sanggo danlok tokdung, delokke korong appinana delokke amíne Euphrates.

¹⁵Delo RUUTUM Shédíbí, kampope ibín-sabínla kaabomdope Eden lokke etor torgongko aradelo amidem langaala meto.

¹⁶Delo RUUTUM Shédíbí amidem sipe poto, “No etor torgong arasokke esing ayé takamem dolado,

¹⁷idola ainemlang atímanem kénpan sumona esing delokke ayém domapeka, kapeila ingkona longelo no deme doyédí; delo longe delo no arorupe siyé.”

¹⁸Delo RUUTUM Shédíbí poto, “Amisi atelpe yésunam si aimang. Bík legape angongpe, bím igulnako, ngo píyéku.”

¹⁹Depe emla RUUTUM Shédíbí among delokke kédéng lok atí-atípe ina simon-sili emlang kebung pettangem pílento. Depe irodem bí ami kerang delo amín míndope lengkan bila aaboto. Delo turna ato-siro kídíem kape kísa amide gogtodí, dekepe buluke amín kídíde ikai.

²⁰Dekepe amide simon-sili kídíem, kebung-pettang kídíem delokke monkír-tangkír kídíem amín mínyinlíkto. Idola ami delokke legape bíkkíng gyabbosuna, igullana atí kamato.

²¹Dekepe ikolok RUUTUM Shédíbí ami dem yagorupe immimola imngakmoto. Ami delokke ibdungem, bí ami delokke ínmo along akonem laala, laarong delo adínlok iyanlík pala laalento.

²²Ami delokke ínmo laalennam deloge, RUUTUM Shédíbí mimeko pílenla, ami kerang delo mimedem bomato.

²³Delo amide poto, “Supak simin ngokke along kídíke alonge; delokke adín lokke adíne. Bím mime emyé, kapeila bím milolok laalenname.”

²⁴Depe ikolok milokong tanie ane-abuem mepak sugeyéla bík mimelo leko bosula bínyi adín atelkope ibosudung.

²⁵Milo delang mimede mílípe yéto, idola bínyi annying mato.