Read Alladian KEYUM KERO 21 Bible Online

KEYUM KERO 21 - Alladian bible

KEYUM KERO 21

¹RUUTUM bí agí pésunampe, Sarahke teyolo bí ayala bíkke utepooroem ruulíkto.

²Depeila RUUTUM ke potonam moodí pagem, Sarah bí koo gela ooko, eejo dola oto.

³Sarahke Abrahamme obinam oodem, Isaak emla amínem mínto.

⁴Bík oo Isaakke longe píínyiko idoem, bí RUUTUM ke pokampe Isaakme dínbíng iyodto.

⁵Bíkke oo Isaakme odo delo Abrahamke dítage takying língkoto.

⁶Sarah poto, “Shédíbí ngom ashéng emla ngilnamem bito. Séko bulu sim tatyédí, bulute ngok teyonglo ngilmín geyé.”

⁷Depe empala bí potemtoku, “Sarahbí ooko anyun sunyé emla Abrahamme séko polatuan? Idola ngo bík mijing longeso ooko obito.”

⁸Koode minela siisato. Edílo bí anyunem metodí, delo Abrahambí botterupe domanko iboto.

⁹Ijipt lokke mime Hagarke Abrahamme obinam oo de Isaak kíng lekope iman bosudope Sarahbí longeko kaala,

¹⁰bí Abrahamme poto, “Ngokke oo Isaak kíng lekope ruutum dobo sumadope, abíl mime sim lang, bík oo sim ekum sok lulen toka.”

¹¹Abrahambí sok oo sok legape yagorupe ankíto.

¹²Idola Shédíbí bím poto, “Nokke oo legape lang abíl mime sokke legape ankí mapeka. Sarahke pokampe no itoka, kapeila nokke otíng oyinem Isaak kelokmín hanyéne.

¹³Delokke nokke abíl mime sokke oo sokkom, ngo deddína opínem parlen moyé, kapeila bíkom nokke ue.”

¹⁴Delo rokompe, Abraham gerepla ettíng lok laala, asi gadumem Hagarke gordulo joolíkla, oodemla bíme lulento. Bínyi delok gílenla, Beersheba lokke yépol mooruk amolo magoo lento.

¹⁵Edílo ayo gadum delokke asiem tííyin todí, delo bí koo dem moonam pasum kolo duumotola,

¹⁶bí delok gíla epuk appíng peko mootelo dunga dola, bí agíem posuto, “Ngo koo sok sinamem kaasupe míímang,” emla anín delo duudola bí kapto.

¹⁷Shédíbí koo kapnam dem tatto, tatla teyong among telok Shédíke kotoki kone Hagarme gogla poto, “Hagar, no kape ankídun? Pesomapeka, Shédíbí koo lokke kapdudem tatto.

¹⁸Gerepla koo dem nok alaglo botola, kapeila ngo bím bottena opín kope imoyé.”

¹⁹Delo Shédíbí, bím mikdar mola bí sirungko kaala, ayo gadum delo asiem kaabíla, koo demte tíímoto.

²⁰Shédíbí koo delo duumín gela, koode siisala, bí moonamlo yégola ityi epugem apjina amipe ikai.

²¹Bí Paran lokke yépol mooruk amolo duuto, delokke bík anede bím Ijiptlok mimeko laabito.

²²Depe yédo delo Abimelek lang bíkke sipaying ruutum Phikol bínyi Abrahamme emto, “Nok itíng-saatíng takamlo, Shédíbí duumín gedung.

²³Depeila supak no Shédíke keralo, ngom lang ngok ome-uem delokke otíng-oyinem yatmayé emla pésulangka, kapeila nom ngo kapekísa ai-kampope ibo sududí, dekepe noteng ngom lang ngok among sim, nok yégodusim ai-kampope iyé emla pésupe aido.”

²⁴Abraham poyansuto, “Ngo pésudung.”

²⁵Delo Abrahamke koonam asi déérung konem Abimelekke ami kídíe ralnamlok rotkamnamem popato.

²⁶Abimelek poyansuto, “Ngo sim legang sim sékodí itone atí kénmang, no ngom atí popamang, silo petom tatdung.”

²⁷Delo Abraham mér ekelang goorueke, Abimelekme bila bínyi daapong ibosuto.

²⁸Abraham mér bénbíl kínídko bíkke mér abam delok langusuto.

²⁹Abimelek ingkíto, “Mér bénbíl kíníd sim langu sunam legade ingkue?”

³⁰Abraham bím poto, “No mér bénbíl kíníd sim ngok alaglok laatoka, depe no laamílo, asi déérung sim ngo kooto emla nokke hakii binampe iyé.”

³¹Depeila moolop delokke amínem Beersheba emkai; kapeila bínyi delo pébosuto.

³²Depeila Beershebalo bínyi daapongko ibosuto. Depe irongem Abimelek lang sipaying ruutum Phikol bínyi buluke Philistia amongpe enkaku.

³³Delo Abraham bí Tamarisk esingko, Beersheba delo lela Duuyarna Shédíme kumsuto.

³⁴Delokrodem, deddína longeko, Philistia amolo Abrahambí yégoto.