Read Alladian KEYUM KERO 22 Bible Online

KEYUM KERO 22 - Alladian bible

KEYUM KERO 22

¹Sikepe irongem, Shédíbí Abrahamme ikangpe gogto, “Abraham.” Delo bí, “Sina ngo,” emyansuto.

²Delo Shédíbí bím poto, “Nok uem laalangka, nokke ayasunam oo atel, Isaakme gíbola Moriah amolo, ngokke díítum polík kolo, no bím ngok legape romnam amanpe ipaklíklangka.”

³Depe pokolok rokomope, Abraham gerepla romnam aman ipak legape esingem natala, gadolo éélíkla, Isaak mela béérang annyiko gíbola, Shédíke políknam mooloppe gílento.

⁴Longum nana longe delo Abraham mootepe políknam among dem kaato.

⁵Delo béérang annyidem Abraham poto, “Gado sim kaabomla, nonyi lekope so dooya langka. Koo sila ngo, mooteng elo gíla, ngonyi kumsupala aalat suyéku.”

⁶Delo Abraham ipaklo romnana esingdem, Isaak kíng joolíkla, bí yoksik kola emem bomla, bínyi gíbosuto.

⁷Gíbo sudungem Isaak abudem lupoto, “Yayi,” Abraham poyansuto, “E ingkoko, ngok ue.” Isaak poto, “kaatola eme lang esinge kadung, idola ingkoloda ipaklo romlík penam mére?”

⁸Abraham poyan suto, “Shédíbí agísue ipaklo romlík penam mérem bilenyé,” dekepe manbosula, bínyi enbosuto.

⁹Edílo bínyi, Shédíke poko moolop delo pííbo sutodí, delo Abraham rungguko mola, esingdem runggu teyong delo paalíkla, Isaakme yééla esing teyong delo melíkto.

¹⁰Delo Abraham bí bíkke yoksik dem laasatsula níkpetpe idoem,

¹¹RUUTUM ke kotoki kone teyong among telok, “Abraham, Abraham,” emla gogto. “Sina ngo,” emla Abraham poyan suto.

¹²Bí pokai, “Koo dem tarí moketla demangkom atí imapeka. Supak ngo kénkai, no Shédíme pesonako, kapeila no agíke oo atel emte ngok keralok mesiisumato.”

¹³Delo Abraham kanggo sula méélam danlo kaatoname, mérboko pasum kolo bíkke areng delok yéksula dagdupe kaato. Delo bí gíla dem laala, bíkke oo ayanpe runggu delo romnam amanpe ipakpe ilíkto.

¹⁴Depeila moolop dem, Abraham bí RUUTUM Bí Bisune, emla amín mínlíkto. Silo pete, “RUUTUM ke Díítumlo Bí Bisune” emla mandung.

¹⁵Teyong among telok lennyinape RUUTUM ke kotokide bím

¹⁶potoku, “Ngo agísulok pésudung, no agíke oo atelsuem ngok keralok mesiisumape ila, sikepe ikolok,

¹⁷nokke teyolo arope utepooroem rulíkla, siyéng robeng lokke sulli kísa pelang taleng telokke takar kísape, nok otíng-oyinem, ngo parmoyé. Delokke nok otíng oyine buluke miru kídíemkom ikumyé.

¹⁸Ngok lulígem tatnam legape, nokke otíng-oyin lok tani amo sokke opín kídíe buluke teyolo utepooro ruunamem paayinyé.”

¹⁹Dekepe irongem Abraham bí, béérang kídí delo aalangkula bulu Beershebalo gíbo sulang kula delo duutoku.

²⁰Sikepe irongem, bík bíro Nahor kíng Milkahbí oo píínyiko obito emnamem tatto:

²¹Uj obíng yalume, Buj bík bíroe, Kemuel bí Aram,

²²Khesad, Hajo, Pildash, Jidlaph delokke Bethuel buluke abue.

²³Bethuelbí Rebekahke abupe ito. Abrahamke bíro Nahorme Milkahke obiname si bíro kumsu píínyisi.

²⁴Sok teyong loote Nahorke éémé Reumahbí, Tebah, Gaham, Tahash delokke Maakahme obito.