Read Alladian KEYUM KERO 24 Bible Online

KEYUM KERO 24 - Alladian bible

KEYUM KERO 24

¹Abraham deddína dítagem turla, mijing alongkai delokke bíkke ato takamlo, Shédíbí utepooroem ruulíkto.

²Abraham bí, bíkke mikuyalum béérangpe ila, bík ekurang tabungem kaayin bina deme poto, “Nokke alag annyie ngok letíkso pida sudola pésuto.

³Ngo nome RUUTUM, taleng kela amongke Shédíke amínlok pésumodung. No ngokke yégongko, Kanaan ami kídí arasok, ngok oo sokke legape mime tombimapeka.

⁴Idola no ngokke amolo gílangkula, ngokke edung-erang arang lok, Isaakme mimeko tombi langkuka.”

⁵Béérang de bím poto, “Nokke gílenko among telokke mime penade tokmín gekulímapekom iyépe, dekepe imílo, nok gílenko among telo nok uem enbokupía?”

⁶Abraham pokai, “No ngok oodem enbo kumape itoka.

⁷RUUTUM, teyong telokke Shédíbí, ngokke abu ekum lokla ngom olenko among lok, ngom laalenla, ‘Sim among sim, nokke otíng-oyinem biyé,’ emla toge sula inabí; bíkke kotokiem nok keralo melík geyé, depeila no ngok oo sokke legape mimeko, ngok erang lok tombi langka.

⁸Idola mimede enmín gelíng kumayémílo dan, no sok pésunam sok apít araayéku, idola ngokke uem dan enlat bokumapeka.”

⁹Depeila béérang de Abraham ke letík delo alag annyie pidasula pobo sunam kídí sok legape pésuto.

¹⁰Delo béérang de, bík ato lokke uut simon íyingko laala, gaina aman ekurangem bomla, Nahorke dungko, Mesopotamia luunepe enlento.

¹¹Bí doolung delo, mime kídí lokke asi joodí moodílo, adeng danem pííla, asi déérung anín delo uut kídíem apéémoto.

¹²Bí delo kumsuto, “E RUUTUM, ngokke ato Abrahamke Shédí, no ayala ngok agér mííbomnam sim aiyope ipíí modak yika.

¹³Kaatola, ngo supak asi sirung ampeng so dakdung, delokke doolung sokke mime kídíe asi kaape emla aayé.”

¹⁴Dekepe aayém, ingkona mimem ngo, “Ngom asi tíídope nok peking dem déérung lo meyibi emkolok, ‘Sa tíítola delokke uut kídíemte, ngo asi biyé,’ emyédí, dekepe emna mimedem, Isaak keepe nokke rubinam mimepe imolangka. Sogei ngokke ato Abraham ke teyolo no ayadung emla ngo kényé.”

¹⁵Bíkke kumyin mangadapei, Abraham ke bíro, Nahorke méng Milkah kelok onam oo, Bethuelke ome, Rebekah bí asi pekingko gordulo joola aato.

¹⁶De mime koode kamporuna kuai, delokke milokong atí kénbo sukímape, deenampe yénakuai. Bí oila, asi sirung delok edílo peking delo asi kaalíkla saatokudí,

¹⁷Delo béérang de gíríkla poto, “Ngom nok peking delok asi anyongko tíídope bitola.”

¹⁸Bí delo poto, “Tíítola,” depe empala peking dem menape jooyi sula bím asi tíímoto.

¹⁹Bíkke asi tííyin rodem mime koode poto, “Ngo nok uut kídíemte asi tíídope joobiyé.”

²⁰Depe manla, bí asi tííngodem simon-sili tíngko dotko delo purlík pala, sirung delo dugtok langkula asi kaabítoku; dekepe uut kídí emte asi tííyin moto.

²¹Amide dekepe inam kídíem asoope kaatídola, RUUTUM bí bíkke enbom namem apíng motudí, apíng momadí emla mííto.

²²Uut kídíde asi tííyin rodeme, amide are kanarung uun koosi kolang biisamna uunlok monam koopung annyiko bidola

²³lupoto, “No sékoke ome? Delokke nok abuke ekum delo, ngolu doopeko kayédí?”

²⁴Bí delo poto, “Ngo Nahorke mime Milkahke oo, Bethuelke ome.

²⁵Ngolukíng ammung elang neyange kadung delokke doopekuete kadung.”

²⁶Delo amide ngemgípla, RUUTUM me kumdola

²⁷poto, “RUUTUM ngokke ato Abrahamke Shédíme yidgedung. Bí ngokke ato teyolo, bík ayange kala, agí pésunamem apíng-píílí bomyardung. Ngomteng, ngok ato eranglo RUUTUM bí apíngpe gílíktung.”

²⁸Delo mime koode, bíkke ane ekumpe duglang kula legang takamdem poyin toku.

²⁹Rebekahbí Laban emnam bíro ko katuai. Laban sirung delo dooyana ami delo duugato.

³⁰Bí Rebekahke alag delo koosi koopung kídídem kaala, delokke “Amide, dekepe ngom podo,” emla Rebekahke ponamem tatla, ami delo aatoname, sirung delo amidem uut simon kídí ampelo lekope dagdupe kaato.

³¹Bí amidem tomto, “RUUTUM keelok utepooro kana amino, kape luyulo dagdune. Kaju aatola. Ngo nok doopeko ekumem lang uut kídíke duupekuem irutung.”

³²Depe pokolok amide ekum delo aato. Laban uut kídí delok ekurangem layila, uut kídídem ammung, neyang em bila, mibodem alem arbín sudope asi joobila ito.

³³Delo donam-tíínam em bík kerang delo lenga bito, idola amide poto, “Ngokke enbomnam legasim pomape atí dopoo-tíípoomayé.” Delo Laban “Potola,” emto.

³⁴“Ngo Abrahamke béérange.

³⁵RUUTUM bí ngok atoem bojérupe utepooroem ruulíkla, bí mirem alongkai. Shédíbí bíme gooruem, mérem, uunem, nokdiem, uut simonem, gadoem delokke pakne-pakboem bojéko bitung.

³⁶Ngok ato ke mime Sarahbí, bíkke eejo dolo oo ko obito. Oo dem bíkke bomnam tabungke atope imoto.

³⁷Ngokke atoe, ngome pésu mopala, sipe lulígdo, ‘Ngokke yégongko Kanaan among sok ngokke uem mime laabi mapeka.

³⁸Idola ngok abu lokke edung-eranglok, ngokke opín odonglok, mimem laabi dope en-gong toka.’

³⁹Delo ngom dekepe lulíg rodem, ngo ngokke atodem sipe íngkíto, ‘Ngokkíng mimede enmín gekumamílo?’

⁴⁰Delo bí emkai, ‘Ngokke agom-aang tatbila, yébinam RUUTUM bí bíkke kotokiem melíkla, nokke bedang entíngem aimola, ngok abuke edung-eralok, ngokke opín odonglok, ngokke oo lok legape mimeko laamoyé.

⁴¹Edílo no ngokke opín-odonglo pííyédí, bulu delo nom tadmala bimayé mílo, nokke ngokkíng pésunam sok apít-arayéku.’

⁴²“Edílo ngo asi sirung anínso píítodí, ngo kumsuto, ‘E RUUTUM ngokke ato Abrahamke Shédí no míído mílo, ngokke enbomnam sim apíng molangka.

⁴³Kaatola, ngo asi sirung so dagdung, mime koo kone asi kaape emla aayém, “Nok peking delok ngome asi anyongko tíímoi,” emla ngokke poyém,

⁴⁴“Tíítola delokke uut kídíemte ngo asi biyé,” emla agom mannako kayé mílo, bí ngok ato lokke oo keepe, RUUTUM ke ruubiname emla ngo kényé.’

⁴⁵Ngok aapíso dekepe kumyin mangadape, Rebekah, bík gordulo pekingem joola aadak. Bí asi déérung delo asi kaape emla tokla asi kaarodem, ‘Ngom asiko tíímoi,’ emla ngo poto.

⁴⁶Delo bí menang asak pekingdem jooyisula, ‘Tíítola, delokke nokke uut kídíemte ngo asi biyé,’ emla bí ngom asi tíímopala uut kídíemte asi bito.

⁴⁷Delo ngo bím, ‘No sékoke ome?’ emla ííto. Delo bí ‘Nahor kelang Milkahke oo Bethuelke ome,’ emkai. Delo ngo bík nyobung delo pegoona tekbang dem ilíkla, alag delo koopungem ilíkto.

⁴⁸Ngo depe irodem gubdola, RUUTUM ngokke ato Abrahamke Shédíme, ngokke entíngem jonnampe ngok ato lokke bíro omem, bík oo keepe kaarík subidope gagbomnam legape yidgeto.

⁴⁹Supak nolu ngok ato teyolo delokke arope agérpe míídumílo pobilangka, delokke mííma mílote polangka, delo ngo kape ikumílodí emla míírung suyéku.”

⁵⁰Laban lang Bethuel poyan suto, “Sim ato kídí sime RUUTUM keelok inam legape ngonyi atí pokan yimangkai.

⁵¹Sina Rebekah duusudune, RUUTUM ke rungkampe, bím laala enbo kakuka; delokke nokke ato Abrahamke oo lokke mimepe imotokuka.”

⁵²Dem edílo tattodí, delo Abrahamke béérang de gubala RUUTUM me kumsuto.

⁵³Delok rongem béérangde uun, nokdi, lungguemlang ege galuk ekurangem laalenla Rebekahme bito.

⁵⁴Depe irongem bílang bíkkíng enmín gena ami kídíde dola-tííla yohdem iplíkto. Rohdem buluke gereprodem bí, “Ngok atolo ngome gílat sumotokuka” emla poto.

⁵⁵Delo bík bíro delang anede bím poto, “Mime koo sim looying atíko duumopotoka, delo bím enbo ladoku.”

⁵⁶Bí bulum poyansuto, “Supak RUUTUM bí ngok bedang entíngem apíng along mokolok, ngome lutum mayika, delokke atolo menape enlat sumo tokuka.”

⁵⁷Delo bulu, “Mime koo dem tomla, bím íngkílape,” emla manbo suto.

⁵⁸Bulu Rebekahme tomla ííto, “So amiso no enmín gekupía?” Delo bí “Ngo enmín geyéku,” emkai.

⁵⁹Delo bulu Rebekahme delokke bíkkíng igulna mime kolang, Abrahamke béérang demlang bík ami kídíem melíkto.

⁶⁰Bulu Rebekahke teyolo utepooro kadope, agom políkla sipe poto, “Ngoluke bírme no, mití-manglíngke anepe ila nokke oten ome-ue miru among emte ikumla yébom kalangka.”

⁶¹Delo Rebekah lang bíkke igulna mimede, buluke uut simon delo leemo sula resaato. Delo Abrahamke béérang de Rebekahme enbotoku.

⁶²Delo Isaakbí Birlahairoi among delok aala, Negeb mooruklo duuduai.

⁶³Longe arot kondem Isaakbí aríklo, asoope kumsukape emla gílen duem, uut kídíke angkunamem bí kaato.

⁶⁴Rebekahte Isaakme kaala uut simon delok oito.

⁶⁵Delokke béérang dem ííto, “Arík elokke ngolum gíríkna ami esi sékoda?” Béérang de poyan suto, “Bí ngokke ruutume.” Depe pokolok, bí gasorem laala agíem polum suto.

⁶⁶Delo béérang de, Isaakme legí-sigang tabungem popa bito.

⁶⁷Isaak bíme, bík ane Sarah ke turdung em dungko tombu delo aabo langkula, nyamran ila, Rebekah bík mimepe ikai, delokke bíme Isaak ayang alooto. Dekepe ane sinyo rongem, Isaakke aapí-aange eetet aloola yétoku.