Read Alladian KEYUM KERO 25 Bible Online

KEYUM KERO 25 - Alladian bible

KEYUM KERO 25

¹Abraham Keturah emnam mime konko bomtoku.

²Bí Jimran, Jokshan, Medan, Midian, Ishbak delokke Shua bulum obitoku.

³Jokshan bí Sheba keelang Dedanke abupe ito. Dedanke otíng kídíe Assurim, Letushim delokke Leummim.

⁴Midianke oo kídíe Ephah, Epher, Harok, Abida delokke Eldaah. Si takamsi Keturah keelok lenne.

⁵Abraham bí Isaak kelo, bík bomnam ekuserang ato kídí takamem melíkto.

⁶Idola bíkke turdungem, bíkke éémé kídílok onam oo kídíemte aman bila, Isaak kíng duubo sumadope, among delokke sanggodan amolo mepan sulíkto.

⁷Abraham apíípe dítak língko kolang tagying kíníd kolang takngoko yéto.

⁸Abraham bí mijing jingkakpe yérongem sikai.

⁹Bík oo Isaak lang Ishmael bínyi, bíme Mamre ayirlo duuna Hittit ami Joharke oo, Ephronke aríkpe ituana, Makhpela díítum bupík delo yuto.

¹⁰Aríkde Hittit ami lok Abrahamke rename. Delo bík mime Sarah kíng lekope Abrahamme yubo sulíkto.

¹¹Abraham ke sirodem, bík oo Isaak me Shédíbí utepooroem ruulíkto. Isaak Birlahairoi moolop anínlo duuto.

¹²Sarahke paknepe ina, Ijipt mime Hagarke Abrahamme obinam Ishmaelke odonge.

¹³Si okorpe odong signame: Ishmaelke opong yalumname, Nebaiot, delo Kedar, Adbeel, Mibsam,

¹⁴Mishma, Dumah, Massa,

¹⁵Hadad, Tema, Jetur, Naphis delokke Kedemah.

¹⁶Sikesi Ishmaelke oo kídíe delokke bulu opín íying kola annyi lokke buku kídíe. Buluke amín kídíem buluke duupom-dakpom delokke doolung amín pete mínlíkto.

¹⁷Ishmaelbí dítak língko kolang takying angum kolang dítak kínídko turpala sikai.

¹⁸Ishmaelke otíng-oyine, Assiria danpe gíyém, Ijipt sanggo danlo duuna Habilah kelang Shur pénsam amolo dungkai. Bulu Abraham keelok lenna abíd-abíd otíng kídíem dungusula dungkai.

¹⁹Si Abrahamke oo Isaak ke dooyinge, Abraham Isaakke abue,

²⁰delokke Paddan Aram lokke Aramean ami Bethuelke ome delokke Aramean ami Labanke bírme, Rebekahme mimepe laado delo Isaakke dítage takying appito.

²¹Isaakbí RUUTUM me, mime delok legape kumto, kapeila mimede negen kuai. RUUTUM bí kumnamem tadbila Rebekah koo gekai.

²²Koo kídíde, ane akii aralo nelmínsula anede agíem emsuto, “Ngokkíng kape sikepe ikan?” Depeila bí RUUTUM me íngkíto.

²³RUUTUM bím poto, “Opín annyiko nok akiide gedung. Nokke lok olen pename ami annyiko, de yépan suyé, akonem akone ralyayé delokke abíyade aníyangem agér ibinape iyé.”

²⁴Bíkke odí longe píírodem kaatoname oo annyiko bíkke akii delo gedung.

²⁵Kerang yape lennade yalíla, amíl tabunge amíd ege gena kísape, amíde ila bím, Esau emla amínem mínto.

²⁶Delok rongem bík bírode lenmín gela, Esauke leduem ummín gela ikolok, bím Jakob emla amínem mínto. Rebekahke bínyim odo dem Isaakke dítage takying akkéko ito.

²⁷Edílo koo kídíde sisaa todí, Esaubí apta miyokpe ila, moonam lokke amipe ikai delokke Jakob bí dengomna amipe ila, tombulo duutímínnape ito.

²⁸Isaak Esaume ayang yato, kapeila bí Esauke aptaem domín geto, idola Rebekah Jakob me ayang yato.

²⁹Longe konem Jakobke pééron amí raadungem, Esaubí aptalok akii keno runge ila enatoku.

³⁰Bí Jakobme poto, “Ngo keno aloodung, ngome líína pééron amí delok bitola.” (Sok legape bíme, Edom emlateng míntuai)

³¹Jakob poyan suto, “Kerape nokke oo obíng tarongem ngokkíng kolík tola.”

³²Esau poto, “Kaatola, oo obíng tarong de ngom ingkona aiko iyén, ngo kenolok sidakbong.”

³³Idola Jakob poto, “Kerape pésupoto.” Delo Esaubí pésula bíkke oo obíng tarongem, Jakob kelo kolíkto.

³⁴Delo Jakob bí, Esaume pééron amí delok lang burla goona ettíng eke bito. Bí dola-tííla ipala gíkaku. Dekepe Esaubí agíke oo obíng tarongem míípak suto.