Read Alladian KEYUM KERO 26 Bible Online

KEYUM KERO 26 - Alladian bible

KEYUM KERO 26

¹Abrahamke longe delokke dírí kísa delo longe delo díríe ila, Isaak bí Gerar lo Philistia roja Abimelek kíng gíto.

²RUUTUM bí Isaakme lengkan sudola poto, “Ijiptlo tokmape, ngokke duulangka, emko amonglo no duulangka.

³So amoso longko loonyi duupo langka. Ngo nokkíng yémín gela nome utepooroem ruulíkyé. Kapeila ngokke, nok abu Abraham keelo ingkoko toge sutuadí dem ipíng líkpe, nok otíng oyinlo lang nokkíng sim asi among sim ngo biyé.

⁴Ngo nokke otíng-oyinem taleng telokke takar kísa bojémoyé, delokke sim asi-among sim biyé. Nokke otíng-oyinlok tani among sokke opín tabunge, ngokke utepooroem paayé.

⁵Kapeila, Abraham ngok agomem tatla, ngok míínampe yéla, ngok ngiitomem, ngok polígem delokke ngokke podu-potok ségupe yéto.”

⁶Depeila Isaakbí Gerarlo duuto.

⁷Edílo delokke ami kídíe, bík mime legangem íngkí todí, delo bí sipe poyan suto, “Bí ngok bírme,” kapeila bí “Ngok mime,” emla pope pesoto. Legade, “Rebekah bí kampodung, iname bík legape ngom ami kídísi mokapelo,” emla bí míísuto.

⁸Isaak delo longe delo bojéko yérongem, Philistia lokke roja Abimelek bí, longe konem kirki lok, Isaak mela Rebekahme mííbo sudupe kaatokto.

⁹Delo Abimelek Isaakme tomla poto, “‘Bí ngokke bírme,’ emla kape no mankan? Bí nokke mime pelal idune.” Isaak poyan suto, “Bíkke legape ngom moka pelo emla ngo mííto.”

¹⁰Delo Abimelek poto, “Ngolum no kape sikepe ikan? Ngoluke amikone nok mime delo ipmín getuamílo, ngoluk teyolo no ebínko ilíkyai.”

¹¹Delo Abimelekbí bíkke ami kídíem, “séko amiedí, sim ami sim demangkom bík mimesim ipusilééla iyédí, dem ngo mokayé,” emla pogo moto.

¹²Isaak bí delo among delo arík ila delo dítak delo bojérupe ali-ayém isito; kapeila, RUUTUM ke utepooroe bíkkíng kalíkto.

¹³Amide miremla bíkke ekuserange bojé momo ila remkín alongkai.

¹⁴Bí bojérupe gooru, sobén, mér delokke béérang kídíe kala Philistain kídíe bím neto.

¹⁵Depeila bíkke abu Abrahamke longelo, edítko abu lokke béérang kídíe asi déérungem kootodí, dem takam, Philistain kídíde kédélok gekap kapyinto.

¹⁶Delo Abimelek Isaakme poto, “No ngoluke sokke gígéé langkuka, no ngolum pemílo ralyana ami kope ikai.”

¹⁷Depe pokolok Isaakbí delokke gígéé langkula Gerar yiibelo duungatoku.

¹⁸Abrahamke sirongem, Philistain kídíke gepin kunam, Abrahamke longelo asi déérung koonam kídíem, Isaakbí lekoda koosi-koomo toku, delokke lembít amín mínkampe bí amín kídíemte mínlík toku.

¹⁹Isaakke béérang kídíe yiibe delo asi déérung aníko koone, sirung ko koopato.

²⁰Idola Gerar lokke taro kaabomna kídare, Isaakke taro kaabomna kídíem, “Si asisi ngoluke,” emla lumín sula asi déérung delokke amínem Esek [3] emla mínto, kapeila delo bulu bíme lumínsuto.

²¹Delo bulu angukon asi déérungko kootoku, demte ami kídíde lumín subomla, bí Sitna [4] emla amín mínto.

²²Depeila delokke bí gígéé langkula, moolop konkolo asi déérungko kootoku. Delo sékote lumín gemato, depeila, “RUUTUM bí ngolum among so sadínpe jéla remla idokupe moolobem bitung,” emla deme bí Rehoboth [5] emla amín mínto.

²³Delokke bí Beershebape saatoku.

²⁴Delo yoh delo RUUTUM bí, bíme lengkan sudola poto, “Ngo nok abu Abrahamke Shédíe. Pesomapeka, kapeila ngo nokkíng yémín gedung. Nok teyolo ngo utepooroem ruulík bila, ngom agér ibina Abrahamke legape nokke otíng oyinem parmoye.”

²⁵Delo Isaak rungguko píla, RUUTUM me kumsuto. Delo bík tombuem ilíkla, bík béérang kídíe asi déérung ko kooto.

²⁶Abimelek Gerar lok bím poyilna Ahujjath melang bík sipaying ruutum Phikolme gíbola Isaakme kaangato.

²⁷Isaak bulume ííto, “No ngok mirupe ipala, ngom lupak palang kula kape no ngom supak kaangadune?”

²⁸Bulu poyan suto, “Nokkíng RUUTUM bí kadung emla ngolu arope kaapato. Ngoluke lang nok pénsamlo daapongko ibosulape delokke elík bosunam kebangko baabo sulape.

²⁹Ngolu kape kísa, nom ipusilééla imape, ai-kampo ila nom aiyope melík tokudí, dekepe ngolumte no atímape ipe aimang delokke no RUUTUM ke utepooro ruulíknam emte paadung.”.

³⁰Delo Isaak bulum doman doboko ibola, bulu dola-tííla ibosuto.

³¹Roh kondem rokompe, bulu buluke aradelo agom-aangem elík bosula, pobosula ibosurodem Isaak bulum kaalíkla, bulu aapí-aange eetetpe enkaku.

³²Delo longe delo Isaakke béérang kídíde buluke kootonam asi déérung konggang em popadola, “Ngolu asiem paato,” emla bím poto.

³³Depeila bí moolop dem, Siba [6] emto delokke silo peteng doolung delokke amínem Beersheba emdung.

³⁴Esauke takying appi rodem, bí Hittit ami, Beerike ome Judith melang Hittit ami, Elonke ome Basemath bínyim mimepe laato.

³⁵Delokke bínyi Isaak keelang Rebekahke yénamem yényimoto.