Read Alladian KEYUM KERO 27 Bible Online

KEYUM KERO 27 - Alladian bible

KEYUM KERO 27

¹Edílo Isaak mijing along kadí delokke bík amige mikmol kadí, delo bí, oo obíng Esaume tomla sipe poto, “E ngok ua,” delo Esau, “Sina ngo,” emyan suto.

²Bí poto, “Kaatola, ngo mijingkai delokke ngo edílodí siyéne dem kénsumang.

³Depeila supak, nok apta-patanana ekurangem gela, moonamlo ngok legape aptatoka,

⁴delokke ngokke mííbang gamnam dokorpe, adínem keela, ngo dodope ngok keraso boma bilangka. Ngokke simang adape, dem dopala nok teyolo ngo utepooroem políkdope.”

⁵Esaume dekepe Isaakke podudem, Rebekah bí tatto. Depeila edílo Esau moonampe aptalo gíkadí delo,

⁶Rebekah Jakobme poto, “Nok yaike, nok abíng Esaume supak agom ponamko,

⁷‘Aptalo gíla, ngokke mííbanam ngamnam dokorpe adínem keela, ngok simang adape, RUUTUM ke keralo ngo dem dopala nome utepooro agomem polík dope,’ emnam em ngo tatto.

⁸Depeila ngok ua, ngok ponamem tallangka.

⁹Bénbamlo gíla, ngelna bénbíl annyiko laalen toka. Ngo nok abu lokke ngamnam dokorpe adín dem ibiyé.

¹⁰Dem no, nok abu keralo bík simangadape dola nom utepooroem políkdope bomabitoka.”

¹¹Idola Jakob, bík ane dem poto, “Kaatola, ngok abíng Esaubí amíd kanako, delokke ngo asig ayoe remyaknako.

¹²Ngok abue mengkí kolok, ngokke bím yadnamem gagla, utepooro paadumem pénamem agílo bomasupelo.”

¹³Delo ane de bím poto, “Ngok ua, pénam de ngokkíng kayémangalo, idola no ngok agomem tattola. Sa menape gíla ngokkeso dekedem langaatoka.”

¹⁴Delo bí gíla dekedem ane kerang delo langaala, bík anede abu delokke ngamnam dokor pakpe keebito.

¹⁵Delo Rebekah bí bíkke tombulo menam, Esauke gaiyalumna egedem Jakobme gemoto.

¹⁶Delo bénbíl kídí delokke asig ayoem bíkke alag annyi delola, mílína alíng delo airupe ilíkto.

¹⁷Delo Jakob kíng, ngamperung donam inam dem lang bíkke isunam burla goona ettíng dem bilíkto.

¹⁸Delo bí gíla, “Ngok Yayi,” emla poto. “Sina ngo, ngok ua, no sékoi?” emla bí pola ííyansuto.

¹⁹Jakob bí abudem poto, “Ngo nok obíng Esau moko, nok pokampe sina ngo itung, supak darepla ngok apta namem dola, ngom nokke utepooro polík penam eme polík langka.”

²⁰Idola bík oo dem Isaak poto, “Ngok oo no kape kísa menang asak apta laaton?” Bí poyansuto, “Kapeila nok Shédí ngom igulla sikepe ikai.”

²¹Isaak delo Jakobme poto, “Ngok ua, no Esau agíya ma angu koya, ukkídope ngok anínso aatola.”

²²Delo Jakob bí, bíkke abu Isaak kelo aanínto. Delo bím memdola poto, “Nok agom gomukde Jakobke kísa ido, idola alag kídísi Esauke alage.”

²³Bí Jakobme memkén maato, kapeila bík alag kídíde Esauke kísa amíd kato. Delo bí utepooro políkpe idola,

²⁴lekoda íísi-íímotoku, “No arope ngok oo Esau bía?” Bí poyansuto, “E, ngomin.”

²⁵Delo bí poto, “Apta adín dem bomato. Ngo dopala nok teyolo utepooro agomem políkdope.” Delo bí bomala, dem bí doto delokke onggur alang demte bomabila, bí tííto.

²⁶Delo bík abu Isaak, bím poto, “Ngok ua, ngokkíng aanínla ngom mumpuptoi.”

²⁷Delo bí bíkkíng aanínla, bím mumpupto delo bí galuk delok aríem namla bím utepooroem polík dola poto, “Kaatola, ngok oo sokke arísi RUUTUM ke arík teyolo utepooro ruulíknam arík arí kísa;

²⁸Shédíbí nok teyolo taleng telokke tangarem okat molangka, delokke among sokke ardaem ruubila donam-tíínamem bojé modakyika.

²⁹Nome ami kídíe agér ibi dakyika, delokke opín kídíe nome kumlangka. Nok ane lokke oo kídíe nom kumla, bíro kídí teyolo no ruutum bomdak langka. Nom péna teyolo péname kadak langka, delokke utepooro políkna kídílo utepooroe kadak langka.”

³⁰Isaakke utepooro políkname iyinpak rodem, Jakobke bík abu Isaakke delok gílenpak rongkuem, aptalok Esau píítoku.

³¹Bíkom ngamdope domíem ila, bík abu keradelo boma bito. Delo bí poto, “Ngok yaino gerepla, nok oo lokke geta domíem dobika, delokke ngom utepooroem polík bilangka.”

³²Bík abu Isaak bím ííto, “No séko?” Bí poyan suto, “Ngo nok obíng Esau moko.”

³³Delo Isaak yagorupe dan-gong sudola poto, “Dekemílo sékoda geta domíem ngokkíng bomala, nok angku mangadape, ngo dola utepooroem políknam bí? Aroe bí utepooroem pangkai.”

³⁴Dem tatyéname Esau ríríng emla séngépe kapla, bík abudem poto, “E ngok yai, ngom kom no utepooro agomem políktola.”

³⁵Idola Isaak emto, “Nok aníe aala, ngom yatla, nokke lok utepooroem laabomkai.”

³⁶Esau poto, “Bíkke, si ngom lennyinape yatname. Bík amínem emmumpe Jakob emmang. Bí ngokke obíng tarongem laalangala, supak ngokkíng utepooro emte langkamto. Ngok legape utepooroko apekpe mesiibimanía?”

³⁷Esaume Isaak poyansuto, “Kaatola, nok ruutum pe bím ngo ilíkto, bík bíro kídíem, bík béérangpe ngo bito, delokke donam-tíínam daadiloope pardope ngo utepooroem polík rodem, ngok ua, nok kepe ngo ingkoko ibilayén?”

³⁸Idokom Esau bík abudem rogu gugapto, “E ngok yai, no utepooro atelpak kokom mebila ngom utepooroem políkmayénía?” Depe pola Esau érla kapto.

³⁹Delo bík abu Isaak oo dem poyan suto, “Kaatola, among sokke ardako luyulo nok duupekue kayé, delokke kedonna taleng telokke tangar luyulo no yégoyé.

⁴⁰Nok yoksalok no turyé idola, bíro lokke béérangpe iyé. Idola edílo no akpé suyédí delo bík rumkílok no mopít suyé.”

⁴¹Esau Jakobme aklíng alooto, kapeila bík abue Jakobme utepooroem bilíkto. Depeila bí mííto, “Abu gíímang teyolo ankídíe píídak, delo ngo Jakobme mokayé.”

⁴²Idola edílo Esauke agomdem Rebekah tattodí, delo bíkke oo aníyang Jakobme tomla poto, “Kaatola, nok abíng Esaubí, nom mokape mííla agí aapíem eetet motungku,

⁴³depeila ngok agomem tattola, Haran amolo ngok bíro Laban kíng dugnyokla,

⁴⁴nok abíng sokke marname aikumang tetengem, oolko duupo toka.

⁴⁵Edílo bí maryimape, nokke bík teyolo inamem kénsu yimayédí, delo ngo nom tomyéku. Ngo kapekísa nonyike legape longe atello ankí kenoyén?”

⁴⁶Rebekah Isaakme poto, “Hittit nyameng kídí legape ngo aapíe ankíla apéé aloodung. Buluke kísana lok Jakobkom Hittit mime laabomílo, ngo turla yébomnam kayimang.”