Read Alladian KEYUM KERO 28 Bible Online

KEYUM KERO 28 - Alladian bible

KEYUM KERO 28

¹Delo Isaak Jakob me tomla, utepooro agom políkdola Jakobme poto, “Kanaan among soge no mime lamayé.

²No Paddan-aram amonglo, nokke ane lokke abu Bethuelke ekumlo gíla, nok ane lokke bíro Laban ke ome konem mimepe laatoka.

³Ralya yalumna Shédíbí nom utepooroem ruulíkla, ome-oo kamola, parmola milung amikope imo dakyika.

⁴Bí Abraham kelo utepooro políknamdem, nokke lolang nok otíng oyinlo bika langka, delokke supak ke yébomko amongsim Shédíke Abrahamme bipe emla tolík sunamsim nom bidak langka.”

⁵Depe emla Jakob me Isaak bí, Paddan-aram amonglo, Esau keelang Jakobke ane Rebekahke bíro Aramean ami Bethuelke oo, Laban kíng melíkto.

⁶Jakob me utepooroem políkla, Paddan-aram amonglo mime matadope Isaak bí melíkto emnamem Esau kénto.

⁷Delok teyonglo, ane-abu agomem tatla, Jakob Paddan-arampe enkai emnam emte bí kénkai.

⁸Dekepe ikolok Esaubí ane-abu si Kanaan lokke mimem nyamengpe míímanamem kénkai.

⁹Depeila bí Abrahamke oo Ishmael kíng gíla bík ome, Nebaioth ke bírme Mahalathme mimepe, bík mime kídí teyong lo laatemto.

¹⁰Beersheba lok Jakob gílenla Haranpe ento.

¹¹Yumepe irong dem bí moolop kolo pííla dooto.

¹²Delo bí immalo, bortakna ebangko amolokke ila teyong among telo píídope delokke teyong kotoki kídíe ebang delok tokdu-saatok dope kaato.

¹³Delo bík anín delo RUUTUM bí dakla sipe podope tatto, “Ngomino RUUTUM bí, nok abu Isaak kelang Abraham ke Shédíbí; nokke supakke ketko amongdem, ngo nom lang nok otíng-oyinlo biyé.

¹⁴Nok otíng-oyine kédéng lokke demul kísa iyé, bulu sanggo danpe, anggo danpe, línggí danpe lang sokko danpe gípan subomyé; delokke nokke loklang, buluke lok tani amonge utepooro ruulík namem paayé.

¹⁵Kaatola, ngo nokkíng yémín gela, no ingko-ingkolo yégo yédí, ngo nom gagbom ayaryé, delokke so among so aalat boyéku; kapeila nom potonam kídísim ipíngmang tetedem, ngo nokkelo yémín geyé.”

¹⁶Delo Jakob darngo sulangkula agíe mansuto, “Aropakpe RUUTUM so moolopso kadung, ngo sim atí kénmato.”

¹⁷Bí pesola agíe mansuto, “Si pesorían runam moolopko; abídmang, si Shédíke ekume delokke si teyong amongke eyabe.”

¹⁸Delo rokompe Jakob gerepla, bíkke dumtenpe bomtonam lííbyang dem gaangpe díípala, delok teyong delo tél lok pílíkto.

¹⁹Delo moolop dem Bethel[7] emla amín mínlíkto, idola kerape dem doolungdem Luj emtuai.

²⁰Delo Jakob pésudola manto, “Shédíbí ngokkíng arope duumín geyémílo, delokke ngok entíng-gítíng so kaabom yémílo delokke dope-tíípenam emlang ege-galuk gepenamem rubiyémílo,

²¹delok teyonglo, ngok abu ekumlo aiyope aalat sula imoyé kumílo, delo RUUTUM no ngokke Shédípe iyé;

²²delokke si gaangpe díínam lííbyang si Shédíme kumpompe iyé, delokke no ngom ingko-ingkoem biyédí delokke íying sanpegem, ngo nom biyé.”