Read Alladian KEYUM KERO 29 Bible Online

KEYUM KERO 29 - Alladian bible

KEYUM KERO 29

¹Delo Jakob endan tetela, sanggo lokke ami kídí yéko amonglo pííto.

²Delo arík arang delo asi déérungko delokke dem gargoola mér alung angum kokai ketbom dupe kaato; kapeila asi déérung deloge alungdem asi bidungai, delokke asi déérung delo bortakna lííbyang ko kato.

³Edílo mér alung dem asi bipe iyédí, mér kaabomna kídíe lííbyang dem jooyala, asi bila delokke lííbyang dem jootum langkula ito.

⁴Jakob mér kaabomna kídídem ííto, “Ngok bíro kídía, íngko lokkeda nolu?” Bulu poyan suto, “Ngolu Haran lokke.”

⁵Bulum bí ííto, “Nolu Nahorke oo Laban me kéndunía?” Bulu poyan suto, “Ngolu kéndung.”

⁶Bulum bí íítoku, “Bí aidunía?” Bulu poyansuto, “Bí aidung delokke kaatola, bíkke ome Rasel eena mér alungem asi bipe emla aadakne.”

⁷Jakob bulum poto, “Supak longe alume idung ada, nolu kape mér kídíem asi bipala, dota-tííta mokuman?”

⁸Idola bulu pokai, “Ngolu mér tabunge aadum suyin kumadem atí ilamang delokke lííbyang sim lobín palamin, mér alungsim asi biyéne.”

⁹Jakob ke bulum lupo sududem, Rasel bík abu mér kídíem goobomla pííto.

¹⁰Edílo Jakob bíkke ane lokke bíro, Labanke ome Rasel melang Laban ke mér kídíem kaatodí, Jakobbí gíla lííbyang dem jooya bila mér alung dem asi bito.

¹¹Delo bí Rasel me mumpup dola ashéng lok yagorupe kapto.

¹²Delo bí Rasel me popato, “Ngo nok abu lokke erange, Rebekah ke ue.” Dem tatla bí duglang kula bík abudem popatoku.

¹³Edílo Laban bí bíkke bírme oo, Jakob ke koborem tattodí delo bí dugríkla, gomrík sula, mumpupla ekumlo aabotoku. Jakob Laban me inam tabungem popa payinto.

¹⁴Jakob me Laban bí emto, “Arope no ngokke iyyi adínsue.” Jakob delo poolo apíngko duuto.

¹⁵Laban Jakobme poto, “No ngok erange emla asampe agér ibiyénía? Nokke ireem edítko emyédí ngom potoka.”

¹⁶Laban ome annyiko katuai, abíyade Leah delokke aníyade Rasel.

¹⁷Leah amige edíímanakuai, idola Rasel kampoe ila ayange inamkuai.

¹⁸Jakob Rasel me mííto. Depeila bí poto, “Ngo nokke ome aníyang Raselke legape dítak kínídko nome agér ibiyé.”

¹⁹Laban poto, “Angu amilo bidum dem pemílo, nom binamde ainame; ngokkíng duumín gelangka.”

²⁰Depe emkolok Jakob bí Raselke legape dítak kíníd ko agér ibito. Dekede, bíkke Raselme mííbom sunam legape longe anyong kísape ito.

²¹Depe irongem Jakob poto, “Ngokke nom yébidí longem yépíng bito. Ngokke méngem, ngo mimepe bomdope bitola.”

²²Delo Laban bík edung-erang ami kídíem tomdum sula domanko iboto.

²³Idola delo Raselke ayanpe Leahme melíkla, Jakob bím ketboto.

²⁴Leah ke béérangpe idope Laban abíl mimeko Jilpahme bitak suto.

²⁵Delo rodem kaaname Leah. Depeila Jakob Labanme poto, “Ngom no kape sikepe ikan? Ngo Rasel keepe agér ibimanía? Kapeda no ngom yadkan?”

²⁶Laban poyan suto, “Ngoluk among so abíyang kadudem aníyangem bipoomang.

²⁷No nyameng aranem sim hopta sim ipíng geyéla, dítak kínídko yépong bikumílo, ngo nom Rasel meteng biyé.”

²⁸Jakob agom dem elíkto. Depeila nyamran adeng-apede iyin rodem, Laban bík ome Raselme Jakobke mimepe bito.

²⁹Laban Raselke abíl mimeko Bilhahme bitak suto.

³⁰Jakob Raselme mimepe ila, Leah mempemílo, bojéyape Raselme mííyato. Delok rongem dítak kíníd konko Laban me agér ibitoku.

³¹Rasel mempemílo Leahme anyoyape ayanamem RUUTUM bí kaayédem, Leahme ome-oo odope ito, idola Rasel negenpe ito.

³²Delo Leah koo gela oo ko oto. Oo delokke amínem, Reuben emla mínto. Emgade Leah sikepe, “Ngok ankí kenoem RUUTUM bí kaabito. Supak lokke ila ngok miloe ngom ayang yéku” emla mansuto.

³³Lekoda bí koo ko gelangkula ooko odo langkula sipe emto, “Ngom ayang manamem RUUTUM bí tatla, sim koo sim kom bitoku.” Depe emla koo delokke amínem Simeon emla mínto.

³⁴Lekoda bí koo ko gelangkula ooko odo langkula, sikepe emtoku, “Supak ngok miloe ngokkíng ai-kamporupe gyapyéku, kapeila ngo bím oo angumnape obikai.” Depeila Lebi emla oodem amínem mínto.

³⁵Lekoda bí koo ko gelangkula ooko otoku. Delo bí sipe emto, “Supakke orum so dan ngo RUUTUM me yidgedung.” Depeila bí oo delokke amínem Judah emla mínto. Delokrodem Leah koo oyimang.