Read Alladian KEYUM KERO 3 Bible Online

KEYUM KERO 3 - Alladian bible

KEYUM KERO 3

¹RUUTUM Shédíke monkír-tangkír pínam aralo, tabíde ségu kayayalumna konpe ito. Bí mimedem ingkíto, “Torgong arasok ingkona esing lokke ayémte nonyim domarupeka emla Shédíbí potorunía?”

²Mimede tabídem poyansuto, “Ngonyi torgong arang sokke esing takamke ayé kídíem dolado.

³Idola torgong arasokke raadaso duuna esing lokke ayéme domapeka delokke ukkípete mapeka; depe imílo nonyi siyé emla Shédíbí potung.”

⁴Delo tabíde bím poto, “Nonyi arope simayé.

⁵Kapeila edílo nonyi dem doyédí nonyi amige daryé delokke nonyi Shédí kísa ila ainem lang atímanem kénpansula iyé.”

⁶Delo mimede esing ayédem dopo kalíkpe kaato. Delokke amiglok kaabola esing ayéde kénmoyé emla mííla, bí delokke ayédem pílla doto. Bí bíkke milodemte ayoko pílbila bíte doto.

⁷Delo bínyi amige mikdarla, bínyike araape yénamem kénsula; bínyi tapang esing annelok omdumsula gekap bosuto.

⁸Edílo torgong aradelo, longe lokke rengamdí moodílo RUUTUM Shédíke gígonam adudem bínyi tattodí, milo delang mimede, torgong delokke esing kídí arang delo RUUTUM Shédíke keranglok runyokgeto.

⁹Idokom RUUTUM Shédíbí amidem tomla bím ííto, “Ingkolo no?”

¹⁰Delo bí poyansuto, “Ngo nokke adudem torgong araso tatla, ngo pesola runyok gedung; kapeila ngo mílípe yédung.”

¹¹Delo Shédíbí ííto, “Nonyi mílídung emla sékoda nonyim potone? Nonyi ngok domapeka emnam esing ayém dotunía?”

¹²Delo amide poyansuto, “Ngome yébosudope nokke mime binam simin esing delokke ayéme bila ngo dotone.”

¹³Delo RUUTUM Shédíbí mimedem luto, “No kapeda sikepe ikan?” Mimede poyansuto, “Tabí bí ngom yadlamin ngo dotone.”

¹⁴Depeila RUUTUM Shédíbí tabídem luto, “No sikepe inam legape, simon-sili tabung keelang, monkír-tangkír kídí lokke, aralo nom pélíkdung; no nokke yénam tabungem, demullok doyé.”

¹⁵“Ngo mime sokkelang nok pénsamlo, delokke nok otíng-oyin lolang, mime sokke otíng-oyinlo mirupe imoyé. Bí nom dumponglok itjépyé, delokke no bím ledulok payé.”

¹⁶Mimedem bí sikepe luto, “Ngo nokke koo olenyé tabungem, yagorupe okii kimoyé, kilamin no kooem olenyén, idola nok míínam tabude, nok milo legape iyé delokke, bí nok teyolo ruutumbomyé.”

¹⁷Delo milodem bí sikepe luto, “No nokke mime agom-aangem tatgaape, delokke ngokke nom domapeka emla, lutumnam esing ayém no dogaape; amosim nok legape pélíkdung. Nokke yénam tabulo no agér itíla doyé.”

¹⁸“Nome amongsi taang emlang tanyum tatké, moonamem garsang biyé delokke no aríkke nesi-neyangem doyé.”

¹⁹“Nokke mikmo íílnamlok, no amolo aalat sukumang tetengem, donamem doyé. Kapeila no demule, nom demullok laalento iname no demullo gílatsuyéku.”

²⁰Delo Adambí, bíkke méngem Ib emla amínem mínlíkto, kapeila bí turna tabungke anepe ine.

²¹Delokke RUUTUM Shédíbí, Adam keepelang bík mime delok legape ayolok omla bínyim gekapsumoto.

²²Delo RUUTUM Shédíbí poto, “Kaatola ngoluke akampe tani bí ainemlang atímanem kénpansunape ikai. Bí turmona esing delokke ayémteng laala dola, turyarla yépelo.”

²³Depeila RUUTUM Shédíbí tanime pílenko amodem bí arík ila yébomdope, Eden baarike torgong delok monlento.

²⁴Bí tanidem Eden baarike torgong delokke sanggodanlo monlen rodem, turmona esingdem kaabomdope Sérubim emlang kiddung-kittoksuna emepe dorna yoksadem melíkto.