Read Alladian KEYUM KERO 30 Bible Online

KEYUM KERO 30 - Alladian bible

KEYUM KERO 30

¹Edílo Raselbí Jakob me ome-oo obimang emla, kaasukadí delo bí bíkke bírme Leahke teyolo nelenkai. Bí Jakobme manto, “Ngom ome-oo bilangka, demamílo ngo siyé.”

²Jakob delo bík teyonglo aklíla poto, “Shédí min nome ome-oo omomape idune, ngo bíkke ayanía?”

³Delo Rasel poto, “Sina ngokke pakne Bilhah, bíkke lok ngo ome-oo kala ekum-erang kadope bím ibbosutoka.”

⁴Depeila bíkke pakne Bilhahme, bím mimepe bommoto.

⁵Bí koo gela ooko oto.

⁶Delo Rasel poto, “Shédíbí ngomkom aipe kaabito, bí ngok kumnamem tatbila oo ko bito.” Depeila oo delokke amínem Dan emla mínto.

⁷Raselke pakne Bilhah kooko gelangkula, Jakobme ooko obitoku.

⁸Delo Rasel sipe poto, “Ngo ngok bírmem ralperung imín sula ikumto.” Depeila oo delokke amínem Naphtali emla mínto.

⁹Edílo Leah bí oo oyimang emla agíem kaasu kadí, delo bíkke pakne Jilpah me Jakobme mimepe bito.

¹⁰Delo Jilpah Jakobme ooko obito.

¹¹Leah sipe poto, “Ngo kompal ruunako.” Depeila oo delokke amínem Gad emla mínto.

¹²Leahke pakne Jilpah lennyinape ooko obitoku.

¹³Delo Leah sipe emtoku, “Ngo edítko ashénako. Mime kídíe ngome ashénako emyé.” Depeila oo delokke amínem, Asher emla mínto.

¹⁴Ali-ayé yiddílo, aríklo Reuben gíla mandrek neyang eke paala bík ane Leahme boma bitoku. Rasel Leahme, “Ayang sula nok oo delokke mandrek neyangem ngom anyongko bisui,” emla poto.

¹⁵Idola Leah bím poyansuto, “Ngok miloem laabínnamdem nokke aapí-aange apíímanía? Ngok oo lokke mandrek emte no langkampe míídunía?” Delo Rasel poyansuto, “Aiyé, oo lokke mandrek ayanpe, Jakob bí siyoh nom ibbosulado.”

¹⁶Yume dem Jakobke aríklok píídokuem Leah gíríkla bím poto, “No ngokkíng siyoh ippe aiyé, kapeila ngok oo mandrek lok nok areem bitung.” Depeila delo yoh delo Jakob bím ibboto.

¹⁷Shédíbí Leahke kumnamem tatbila bí koo gela, Jakobme pilngo nape ooko obitoku.

¹⁸Delo Leah posuto, “Ngo ngok paknem milolo bilík sunam legape, Shédíbí ngom amanem ruuyan subitung.” Depeila oo delokke amínem Issakhar emla mínto.

¹⁹Lekoda Leah koo gelangkula, Jakobme akkénape oo ko obitoku.

²⁰Bí potoku, “Shédíbí ngom asampe amanko bitoku, supak ngok miloe ngom torík suyéku, kapeila ngo bím oo akkéko obikai.” Depeila oo delokke amínem Jebulun emla mínto.

²¹Méélamdem omeko olangkula bím Dinah emla amínem mínto.

²²Delok rongem Shédíbí Raselme míípasuto. Bí Raselke kumnamem tatla bík akii dem ipít bitoku.

²³Rasel delo koo gela, oo ko ola, “Shédíbí ngokke annyingem laapak bito” emla poto.

²⁴Bí oo delokke amínem Joseph emla míndola, “Shédíbí ngom ookon kote bisukupe aido,” emla manto.

²⁵Josephme Raselke orodem Jakob, Labanme poto, “Ngok agíke ekum-eralo ngome enmotokuka.

²⁶Nom ngo agér emkom bojéko ibito, depeila ngom enmo dokupe ngok mime, ome-oo kídíem ngom bitoka.”

²⁷Laban bím poyan suto, “Ngo nok keralo aina amipe idumílo, no duupotoka emla nom rogudung. Ngo líímé-tagil ila kaaname, nok legape Shédíbí ngome utepooro ruulíktung.”

²⁸Bí potemto, “Nok agér irem potola ngo dekedem doryé.”

²⁹Jakob bím poyan suto, “No kéndung edítko ngo, nom agér ibila nok gooru, sobén, mér kídíe ngok kaabom kolok ardakane.

³⁰Ngokke so aadodem anyongko ituai, idola supak bojérupe parkai. Ngok yéko takamlo RUUTUM bí utepooroem ruulík bidung. Idola supak ngo agíke ekum-erangem kaasukupe aido.”

³¹Delo Laban ííto, “Kape kísa ila nom ngo dormíloi?” Jakob poyansuto, “Ngom atí dormangkom aiyé. Ngok ponam sim no tatbi mílo ngo nok taro kídíem kaabom biyé.

³²Silo ngo nok mér, gooru sobén kídíem kanggo dola, yorang atak-arak kana demangkom ponggana mér kídídem lang, yorana mér kídíem delokke ríjok-ríyok kana sobén kídíem langu sulen moi, dekede ngok arepe iyé.

³³Ngokke ai-kampope inamem no agísue nyampo-réh delo ngokke arepe laanam kídíem kaangayém no kaasuyé. Ngokkíng ponggana demangkom atak-arak kamana sobénko kaayémílo, demangkom yoramana mér atíko kayémílo no doppyoto emla ngom míílado.”

³⁴Laban poyansuto, “Dem tolíkdung. Nok pokampe ngonyi ibosulape.”

³⁵Delo longe delo ponggana demangkom atak-arak kana milokong sobén emlang ríjok-ríyok kana delokke atak-arakna delokke yasina kídíemte Labanbí laabínto, yorana mér kídíemte bí laabínto. Depe igeyéla bík oo kídíem kaabom mola,

³⁶Jakob keelok longum bedang mooteng nakolo mér sobén kídídem melíkto. Jakob dan Laban ke abíd mér sobén kídíem kaabom bito.

³⁷Delo Jakob bí Poplar, Almond, Plan esing loge aag kídíem yayipe papala asigem alop-aloppe séglenla yasina alobe lendope ila,

³⁸deke aag kídíem mér sobén asi tíípom dotko keralo leeto. Kapeila simon-sili kídíde asi tínga yékuem métbo sudungai.

³⁹Depeila edílo sobén kídíe esing aag kídí kerang delo métbo sutodí bulu arí-ajokna, atak-arakna, ponggana béno kídíem olento.

⁴⁰Jakob Labanke simon-sili alung lok mér kídídem, sobén kídí delok ingu sula atak-arakna, yorana mér sobén kídídem migmo geríksula yédope ito. Dekepe bí agíke supe mér sobénem ingusula, Laban ke mér sobénlo yéyél-yésél sumomadope ito.

⁴¹Edílo ngelna mér sobén kídíde métmín sutodí, delo Jakob bí esing aag kídídem asi tíípom dotko kerang delo leelíkla delok kerang delo métmín sudope ito.

⁴²Idola edílo songkekna mér sobén kídíde métmín suyédí delo Jakob bí esing aag kídíem leelíkmato. Depe ikolok ngelna mér sobéne Jakob keelo delokke songkekne Laban keelo kakai.

⁴³Sikepe ila Jakob mirem alongkai. Bíkkíng deddína mér sobéne, goorue, uut simone, gadoe delokke abíle kakai.