Read Alladian KEYUM KERO 32 Bible Online

KEYUM KERO 32 - Alladian bible

KEYUM KERO 32

¹Jakobkom bík entíngpe endungkuem, Shédíke teyong kotoki kídíe bím ríksuto.

²Jakob bulum kaarík sudola, “Si Shédíke duupomko,” emla manto. Depeila moolop delok amínem Mahanaim emto.

³Jakob bí Edom among lokke Seir doolunglo, kotoki kídíem bík bíro Esau kíng mege líkdola,

⁴sipe poyil líkto, “Ngokke ruutum Esaume, nolu sikepe polangka: ‘Nokke béérang Jakob bí sipe podung, ngo supak loope Laban kíng duumín getíto.

⁵Ngo mére, sobéne, gadoe, goorue, milokong béérange lang mime béérange kadung. No ayang kaapang suyékupe emla mííla ruutum nom agomem megedungku.’”

⁶Edílo kotoki kídíde píílat sutokudí bulu Jakobme, “Ngolu nok bíro Esaume kaaríksuto. Bí supak nom kaaríkpe midum língko appiko gíbola aadung,” emla pobitoku.

⁷Jakob dem tatla yagorupe míídírla pesoe ila, ami kídídem opéé annyikope ipansuto. Gooru sobén delokke abíd simon-sili demte depe ito.

⁸Legade, Esau bí opéé konem mimak iya bomyémílo, opéé kone dugpu gedokupe emla Jakob mííto.

⁹Delo Jakob kumsuto, “E ngok abu Abraham ke Shédí delokke ngok abu Isaak ke Shédí, ngom ‘Nok agíke amolo, agíke edung-eranglo gílat sulangkuka, ngo nom ardamoyé,’ emna E RUUTUM,

¹⁰nok béérang ngo, nok ayang emla míngkeng lengkanem paaba manako. Jordan korongem ngok kooduem, banggén petomem ngo bomto, idola supak ngo opéé annyi kope ikai.

¹¹Ngok bíro Esauke alaglok ngom mopítyika, ngo kumdung. Bí mimakpe, ngomla ngokke ome-uem itaksula buluke ane kídarsim iyabomyé.”

¹²“Nokke, ‘Nom ngo arope ardamoyé delokke nok otíng-oyinem siyéng asi robeng lokke yépol kísa, hanla yimadupe iyé,’ emla nok pésunamem míípang subilangka.”

¹³Bí adeng dem deloi doopong dola, bíkke sérang bomnam ara delok bík bíro Esauke aman legape ullento.

¹⁴Bénne líínyiko, bénboe íying annyiko, mérne líínyiko, mérboe íying annyiko,

¹⁵mime uute íying appi kolang buluke ngange, rune íying appi kolang ruboe íyingko, mime gadoe íying annyi kolang milo gadoe íyingko.

¹⁶Dekedem bí béérang kídíem opéé-opéépe kaabom moto. Delo bí bulum poto, “Nolu ngok kerape gíge dola opéé kídílo pénsam melangka.”

¹⁷Kerang gígena béérang dem bí sikepe poyilto, “Edílo ngok bíro Esau nom kaarík sula, ‘Nok ruutume séko? No ingkolo gídakne? Nok keraso yéna simon-sili kídísim séko bomdune?’ emla nom ingkíyédí,

¹⁸delo no sipe poyan sulangka, ‘Si tabung si nok béérang Jakob ke. Bí bíkke ruutum Esaume amanpe bidope melíktung, delokke bí agí sude, ngoluke méélam esi enmín gedung.’ ”

¹⁹Dekepe bí béérang annyi nana dem lang angumnana demte delokke simon-sili dem goomín gena tabung dem teng poyilto, “Nolu Esaume kaarík suyém sikepe polangka,

²⁰‘Aroe nok béérang Jakob bí ngoluke méélam esi.’ ” Kapeila Jakob sikepe mííto, “Ngo bím aman sok aapíem ashéng mola, ngokke bím kaaríksuyém bí ngom ayang mesam dokupe.”

²¹Depeila Jakobke aman kídíde bík kerape gígeto, idola bí agíe notko delo yoh dem duupoto.

²²Delo yoh delo Jakob gerepla, bík mime annyi demla béérang annyidem delokke bík oo íying kolang atel dem gíbola, Jabbok korong dem konggemoto.

²³Bulum kooyin morodem bík ekuserang tabung dem teng kooyin líkto.

²⁴Idola bí agí atele duusu poto. Delo ami kone aala bíme roh doonyi saadolope laamín suto.

²⁵Amide bíme elkum lamape kaayéname bí Jakobke arkéng dem kídla along dem luddope ito.

²⁶Delo amide pokane, “Ngome gímo tokuka, longe angune píídak.” Delo Jakob, “Ma, no utepooro ruulíkmang tetedem gímokumayé,” emto.

²⁷Delo amide, “Nok amíne ingkue?” emla tatkíto. Bí “Jakob,” embisuto.

²⁸Delo amide poto, “Nok amíne Jakob pe iyimayé idola Israel emla iyé; kapeila no Shédí melang tani kídíem laamínsula ikumto.”

²⁹Jakob delo, “Ayangsula amínem pobi sutola” emla roguto. Idola bí poyan suto, “No kapeda ngok amínem íídun?” depe empala bí Jakob ke teyolo utepooroem políkto.

³⁰Delo Jakob, “Ngo Shédí me mikmope kaarík sulate turdung,” depe emla moolop delokke amínem, Penuel emla mínto.

³¹Penuel dem bík gíbongdoku delo doonyie saadobong. Bík arkéng delok legape bí lebyato.

³²Depeila silo-melo pete Israel ami kídíe arkéng lokke adínem domang, kapeila arkéngke adín oong delokmin Jakob me kídbettone.