Read Alladian KEYUM KERO 33 Bible Online

KEYUM KERO 33 - Alladian bible

KEYUM KERO 33

¹Esauke língko appi amiem, aabola aanamem, Jakob kaayédem bíkke ome-oo kídíemla Leah, Rasel delokke mimepe bomtem kunam béérang annyi delo orpan sulíkto.

²Kerayalumpe bíkke pakne bomtem kunam annyi demla bínyike oo kídíem delokke Leah melang bík oo kídídem delokke méélam yalumpe Joseph melang Raselme melíkto.

³Jakob bulum gígeyalumla, bík bíro anínlo, píínín dodem lemkíníd ko amolo gubala kumto.

⁴Idola Esau bím dugrík sula, gomla, mumpupla, bínyi kabbosuto.

⁵Edílo Esau kanggosula mime ome-oo kídídem kaasutodín, bí ííto, “Nokkíng gímín gekuna kídísi séko bulu?” Jakob poyan suto, “Bulu Shédíke ngome binam ome-oo kídíe.”

⁶Delo pakne bomtem kunam bínyi lang bínyike oo kídíde aala gubala kumto.

⁷Delo Leah lang bík ome-oo kídíde aato, delokke méélam yalumpe Rasel lang Joseph bínyi aala gubala kumto.

⁸Esau íngkíto, “Ngok kejoke ríksu tonam opéékon esi ingkueda?” Jakob, “Ngok ruutum, nok kangkolo, ngom ayang kaapang dokupe biname,” emla poyansuto.

⁹Delo Esau poto, “Ngok bíroa, ngo alum sumang, nokke dem no bomsu tokuka.”

¹⁰Idola Jakob poto, “Ma, depe emmapeka, ngo nokke ai-kampope torík sukunamem paato, depeila aman sim no torík subi yika. Nok migmoem kangku namde, Shédíme kaana kísa idung, kapeila no ngom ai-kampope torík sutoku.

¹¹Nok legape bombi kunam aman kídarsim torík subi langka. Ngok míínam tabungem, Shédíbí ngom ayala biyintung.” Dekepe Jakobke rogu-gugap kolok Esau dekedem laarík suto.

¹²Esau poto, “Supak kaju ngolu enlang kupe, ngo nom enbo yéku.”

¹³Jakob poyan suto, “Koo kídar sokke menape gílangkula manamem no kéndung. Delok teyolo sobén, mér, gooru kídar sokke nganga kídíem kom kaasupe aidung. Bulum lomla goobom kumílo lotel lokkom siyinyé.

¹⁴No en-getokuka, ngo koo kídí sim lang gooru, sobén, mér kídísim lekope, ngoluke gírí loorípe gíbo sulangkula, nom Edom lo píímín geyéku.”

¹⁵Esau potoku, “Dekemílo, nokkíng ngo ami ayoko melíkyé.” Jakob poyansuto, “Dekepe itímadokom aiyé, ngo ngok teyolo nokke ayang kaapang kunamde apíísudung.”

¹⁶Delo longe delo Esau, Edompe enlat sukaku.

¹⁷Idola Jakob Sukkoth pe enla, delo agí legape ekum ko mola gooru, sobén, mér kídí legang pete gual mola duupoto. Depeila moolop delokke amínem Sukkoth [10] emla mínto.

¹⁸Jakob Paddan-aram lok aiyope, Kanaan among lokke Sekhem doolunglo pííla doolung aníndelo notkoem ito.

¹⁹Notko ipom dem Shekhemke abu Hamarke oo kídílok nokdi abal língkolok reto.

²⁰Delo bí rungguko píla, El Elohe[11] emla mínto.