Read Alladian KEYUM KERO 34 Bible Online

KEYUM KERO 34 - Alladian bible

KEYUM KERO 34

¹Longe konem Jakob kelang Leah ke ome Dinah bí Kanaan mime angong kídíem yébo sukape emla gílento.

²Edílo among delokke ruutum pe ina Hibit ami Hamorke oo Shekhem, bím kaatodí, delo bí aala, bíme yééla ipusilééto.

³Idola Dinah bí kampoe ikolok, Shekhem bím míngkai delokke mííla bíme aiyope poyi-poyaatto.

⁴Bí abu dem sipe poto, “Sim mime sim, ngome mimepe tombi langka.”

⁵Edílo Jakob bí, bík omem ipusiléétung emnamem tattodí, delo bí koo kídí lokke píngkumang abuudem, bí aapíe haggapla, asoope doopoto, kapeila bík oo kídíde aríklo gooru, sobén, mér kídíem kaabomla yéto.

⁶Shekhemke abu Hamorbí Jakobme luposupe emla aato.

⁷Delopak Jakobke oo kídíe aríklok píítoku. Edílo bulu legangem tattodí, bulu tatlomsula agí margíkai. Kapeila Jakobke omem yéébila, Israel ami kídíem Shekhem bí ipusilééto.

⁸Hamor bulum poto, “Ngok oo Shekhem bí bím míngkai, iname bík mimepe ayasula, bím bitoka.

⁹Ngolu noluke aralo mime laabosudope ibosulaju. Ngoluke omem, noluke mimepe laatola.

¹⁰Ngolu kelo lekope nolu duulangka, delokke among sim nolum taaya bidung. So nolu duula pesi koret ila, ekurang kala itoka.”

¹¹Shekhemte Dinah ke abuem lang bíro kídíem poto, “Noluk kangkolo ngome ayang kaapang langka. Nolu ingkoko koyédí, ngo dem biyé.

¹²Noluke lukampe ngo dem biyé, idola mime sim ngok méngpe nolu ngom bilarungka.”

¹³Idola buluke bírme Dinahme ipusilééla ikolok, Jakobke oo kídíe, Shekhem melang bík abu Hamorme popu-polépe lupoto.

¹⁴Bulu bím poyan suto, “Dínbíng iyodsumana amilo ngoluk bírme dem mimepe bommo mayé. Depe imílo ngolu agíem ipusiléé sudung.

¹⁵Nolu milokong tabunge dínbíng iyodsula ngoluke kísape iyémílo ngolu torík sulado.

¹⁶Delo ngolu mime laabo sulado. Ngolu nolukíng duumín gela, noluke ami akonpe ibo sulado.

¹⁷Idola nolu, ngoluke podupe dínbíng iyodsula, ngoluk potonam sim torík sumamílo, ngolu bím laalang kula gínyok yéku.”

¹⁸Buluke ponamdem Hamor lang bík oo Shekhem aipe tatto.

¹⁹Abu lokke ekum-erang aralok, mííba yalumnam yaamé koode buluk ponamdem ilíng líyamkai, kapeila Jakobke ome dem bí yagorupe mííbomto.

²⁰Depeila Hamor lang bík oo Shekhem bínyi doolung delokke yapgo eyab delo gílangkula, doolung ami kídíem popatoku.

²¹“Si ami kídísi ngonyim doonyi daadépe iríkdung, ngoluk among so bulum duumotoka delokke bési-bépar emte imotoka, kapeila among site mobyakdung. Ngolu bulu kelo omum-nyameng em ibo suladung.

²²Idola ngoluke milokong kídíe, buluke kísape dínbíng iyod suyinmílo petom, bulu ngolu kíng duubo-dakbo sulado emla sim idong atel petom sim bulu mandung.

²³Buluke gooru sobén kídíe lang abíd simon-sili kídíe, delokke ekuserang kídíe ngolu kepe imayénía? Iname kaju ngolu bulum elíklaju, delo bulu ngoluk aralo yébo-dakbo suyé.”

²⁴Doolung yapgo delo lenna ami kídí tabungde Hamor kelang bíkke oo Shekhemke agomdem elíkto. Depeila doolung delokke milokong tabude dínbíng iyod suyinto.

²⁵Longum méélam delo ami kídí delokke dínbíng iyodsuko delok kidung adape, Jakobke oo kídí aralokke Dinah ke bíro annyi, Simon lang Lebi bínyi, doolungem atí kénko sumape, yoksem bomla doolung delo aala ami kídídem paka kayinto.

²⁶Bínyi Hamor melang bík oo Shekhem bínyimte mokato. Delo bínyi Dinahme, Shekhem ke ekum delok laalenla gíbotoku.

²⁷Sikepe moka rongem, Jakobke abíd oo kídíde, buluke bírmem ipusiléé arepe doolung dem lííla edo rayan sutoku.

²⁸Bulu mér sobén kídíem, gooru kídíem, gado kídíem delokke doolung delokke ato-siro kaanam takam emlang, arík lokkem laangum biyinto.

²⁹Bulu ekum lokke arekana ato-siro tabung emlang mime kídí delokke ome-oo kídíem laala gíyin botoku.

³⁰Delo Jakobbí Simon melang Lebime poto, “Nonyi ngokkíng ebínko ipaato. Supak Kaanan ami kídíe lang Perijjit ami kídíe delokke among sokke ami kídíe ngom akyé. Ngokkíng ami bojé kamang. Bulu tabunge magpé atelkope ila, ngom mimak aabom mílo ngoluke erang tabungem petyinyé.”

³¹Idola bínyi, “Ngoluke bírmedem, ami molokke notii mimepe ipusilééla imomayé,” emla poyansuto.