Read Alladian KEYUM KERO 35 Bible Online

KEYUM KERO 35 - Alladian bible

KEYUM KERO 35

¹Depe irodem Shédíbí Jakobme poto, “Gerepla Bethello byaklangka. Delo no, Esau keelok dugnyok geduem lengkan suna Shédíme rungguko píbitoka.”

²Delo Jakob, bík erang kídí dem lang bíkkelo yémín gena kídíem poto, “Noluk aralo mibo-miying arang lokke uyu kídíem mepak sula agíem deesu langka, delokke ege aníem ilík sulangka.

³Depe irongem ngolu Bethelpe byakla, ngokke ankíkeno duem igulna delokke ngokke enko-gíko tabulo yémín gena, Shédíke legape ngo rungguko píyé.”

⁴Depe pokolok bulu takame buluke alaglo bomnam, mibo-miying lok uyu mimang kídíem lang, nyorung tekbang kídí tabungem Jakobme bito. Jakob deke dem Shekhem anínke ok esing leríng delo yuto.

⁵Depe bulu gílento, delokke buluke ayir-agong lo duuna doolung kídí delo Shédíke reyubruna, peso-ríane kala bulum, bulu mimakpe monmín gemato.

⁶Delo Jakob lang bík ami kídíde, Luj emlate mínnam Bethel delo pííto. De Kanaan amolo kato.

⁷Delo Jakob bí rungguko píla, deme El Bethel[12] emto. Kapeila delo, bíkke bírolok dugnyok geduem Shédíbí bím lengkan suto.

⁸Delo Rebekahke nars[13] Deborah sikai. Bíme Bethel sokkolo duuna ok esing rumkíng kolo yuto. Depeila delok amínem Allon-Bakuth[14] emto.

⁹Depe irongem, Jakobke Paddan-aramlok aarongkuem, Shédíbí bím lengkan sulangkula utepooro ruulíkto.

¹⁰Shédíbí bím poto, “Supakke nokke Jakob emnam amín dem, no geyimayé, idola delok ayanpe nokke amínem Israel emla mínyéku.” Dekepeila, Shédíbí bím Israel emla míntoku.

¹¹Delokke Shédíbí, bím poto, “Ngomoko Ralya yalumna Shédíbí. No bojéko ome-ue kala parkalangka. Opín kídíelang deddína milung-mibame nokke lok lenyé, delokke roja kídíete nokke lok lenyé.

¹²Abraham melang Isaakme binam amongem, ngo nom biyé. Delokke nok otíng-oyin kídí emte, nok yérongem ngo biyé.”

¹³Delok rongem bím, Shédíbí agom pobo supala delok gíkaku.

¹⁴Depeila Jakob, Shédíme lupo pobo suko delo, lííbyang gaangko dííla, deme bí onggur alang lokla olib alang lok pídélíkto.

¹⁵Jakob bí, Shédíke bím lupo suko moolopdem Bethel emla mínto.

¹⁶Bethel lokke bulu gílen langkula, Ephrath em píípepak idoem Rasel koo ope emla okii kilento.

¹⁷Okii kinamde kitík dodem okii bonade, “Rasel no pesomapeka, si oo konko moko,” emla popabito.

¹⁸Delokke bík aide gílenpem idodelo, (kapeila bí sikai) bí oo delokke amínem Benoni[15] emla mínto. Idokom bík abude bíme Benjamin emla míntoku.

¹⁹Raselke sirodem Ephrathpe gína bedang abelo bím yuto; dem supak Bethlehem emdung.

²⁰Delo Raselke ago teyong delo Jakob bí lííbyang gaangko díílíkto. De silo peteng Raselke ago gaangpe idung.

²¹Depe irongem Jakob byakgoola, bík notkoem Ederke kedonna ekum arotkon delo ilíkla duuto.

²²Jakobke delo duuduem Reuben bí abu lokke mimepe bomtem kunam akon Bilhah me ibbosuto. Dem Jakob bí tatsula, yagorupe marto. Jakobbí oo íying kolang annyiko kato.

²³Leahke oo kídíe: Jakobke opong genam Reuben lang Simeon, delo Lebi, Judah, Issakhar delokke Jebulun.

²⁴Raselke oo kídíe, Joseph lang Benjamin.

²⁵Raselke pakne Bilhahke oo kídíe Dan lang Naphtali.

²⁶Leahke pakne Jilpahke oo kídíe, Gad lang Asher. Paddan-aramlo Jakobke olennam oo kídíe sikesi.

²⁷Delokke Jakob bí bík abu Isaak kelo, Hibron demangkom Kiriath Arba emlateng emnam Mamre doolunglo ingko lodí Abraham lang Isaak yégoongtone, delo pííto.

²⁸Delo Isaakke dítage língko kolang takying píínyiko ido.

²⁹Dekepe Isaak yénam apíngem miji-jingkak lope yépala sikai. Bíkke oo annyi, Esau lang Jakob, bíme bíkke ami kídílo laadum sulíkla yusito.