Read Alladian KEYUM KERO 37 Bible Online

KEYUM KERO 37 - Alladian bible

KEYUM KERO 37

¹Jakobbí bík abu dungko Kanaan amolo duuto.

²Si Jakobke edung-erang dooyinge. Dítak íying kolang kínídna yaamé koo Joseph bí, bík abuke mime Jilpah kelang Bilhahke oo kídí, delokke bík bíro kídarlo mér emla sobén kídíem kaabom bosuto. Depe ido delo Joseph bí, buluke atímana koborem abuem popa bidungkuai.

³Israel bí bík abíd oo kídídem pemílo Josephme ayang yatuai. Kapeila bí bíkke mijirongem okunam ue. Bí Josephme atí-atí moríkana lukdor bodonako ibito.

⁴Edílo bík bíro kídíde, bulum pemílo Josephme buluke abue ayang yadung emla kaatodí, bulu bím nego bomla ai-kampope agom emkom lurík-porík sula imaato.

⁵Joseph immangko maala, bík bíro kídídem pokan bito. Dem tatla bulu, bím pakyape nekai.

⁶Bí bulum sikepe pobito, “Nolu ngokke immang maanam sim tattola:

⁷Aríklo ngolu aamem ngotsum sula idungem kaatoname, ngok ngotsum sunamde dagrepkai; delo noluke ngotsum sunam kídí dete dagrepla, ngokke ngotsum sunam dem daggo bomla kumsukai.”

⁸Delo bíro kídarde bím poto, “No ngoluke teyonglo ruutum pe iyénía? Demangkom ngoluke teyolo no yébom yénía?” Depeila bulu pakyape, bík immang delokke agom kídí legape bíme nekai.

⁹Joseph immangko akoda maalang kula bulum pobitoku, “Ngo immang ako maatoku. So maarum sodan doonyie lang pooloe delokke takar íying kolang atelkone ngome kumsuto.”

¹⁰Sim immang sim bí abu emte pobitoku. Delo bík abude bím luto, “No ingkona immang koda maatone? Nok ane lang ngo delokke nok bíro kídíe nok keralo lebíng-koníla, amolo gubala nom kumsuyénía?”

¹¹Bík bíro kídíde bím akto, idola abude aapílo míísisuto.

¹²Shekhem anínlo bík bíro kídíde, abu delokke bénbam, rubam delokke mér kídíem gonggo bomla gíbokai.

¹³Depe irodem Israel Josephme poto, “Nok bíro kídíe Shekhem anínlo bénbam, rubam delokke mér kídíem goobomkai, iname ngo nom bulukíng lulígpe míídung.” Delo bí “Aiyé,” emla poyan suto.

¹⁴Depe emkolok bí Josephme poto, “No gíla, nok bíro kídíem lang gooru, sobén, mér abam kídíe aidudí, aimadí deke dem kaala ngom polangkuka,” emla bí lulíkla Hebron yiibe delok bím melíkto. Edílo Joseph Shekhem delo píítodí,

¹⁵amikone bím aríklo magoodupe kaala íngkíto, “No sékome matadune?”

¹⁶Bí poyansuto, “Ngo bíro kídíem mata godung. Bulu ingkoloda gooru, sobén delokke mér kídíem gonggo bomdune, no kéndunía?”

¹⁷Amide poyan suto, “Bulu sokke byakkaku. Buluke aralo, ‘Dothanpe gílape,’ embo sunamem ngo tatto.” Depeila, Joseph Dothanpe bík bíro kídíem matala delo kaarík suto.

¹⁸Idola bulu bím matape aanamem kaala, bím mokape emla manbosuto.

¹⁹“Eena immang maanabí píídakne” emla manbosudola,

²⁰“Kaju ngolu bím mokala déérung kolo líknyok pala, monkír kone bíme doto emla polaju. Delo bík immade kape kísa iyénadí, kaalape,” embosuto.

²¹Reuben dekedem tatla buluke alaglok, Josephme iturpe emla mííto. Depe mííla bulum bí, “Bím petmaju,” emto.

²²“Bím tarí-tape iketmape moonam sokke déérung konso líknyok lape, idola bím alag ukkímangkom,” emla bím mopít pala buluke abulo melík dokupe emla, míísisula Reuben dekepe poto.

²³Edílo Joseph bíkke bíro kídar delo píítodí, bulu bím atí-atí morílok ibinam lukdor galuk dem bítkutla,

²⁴bím yééla asi déérung kolo yobnyok líkto. Déérungde asi kamape ereenakuai.

²⁵Buluke apim dope emla duunga dodem, bulu kaadusula Gilead lok aana Ishmael amieke uut simonlok alungpe endakpe kaato. Bulu uut simon delo, molom kídí loklang, nesi-neyang kuséréng delokke kosana alang kídíem gela, Ijipt amongpe enbomto.

²⁶Judah bí bíro kídídem lupoto, “Ngolu, ngoluke bíro sim mokapala, bím petnamem rumnyokla, ingko are koda paayén?

²⁷Kaju, ngolu bím alag ukkímape, bépar ina Ishmael ami kídíso kolíklaju; kapeila, depe-epe emtuakom, bíkom ngoluke bíroe, ngoluke adíne.” Dem tatla bík bíro kídarde elíkto.

²⁸Depeila edílo Midian lokke bépar ina ami kídíe píítodí, Josephke bíro kídarde bíme déérung delok horep langkula, nokdi abal íying annyi kope Ishmael ami kídílo kolíkto. De ami kídíde bím Ijipt amongpe ennyok bokai.

²⁹Edílo Reuben déérung delo aalangkula Josephme kaapa matodí, bí ankílok agí galugem bétsula,

³⁰bík bíro kídí delo aalangkula poto, “Kooe kaimang! kape imíloi aiyén?”

³¹Delo bulu Josephke galuk dem laala, sobénko pala, galuk dem iyyi delo pyomlíkto.

³²Depe ipala bulu lukdor galuk dem buluke abu delo boma langkula popato, “Sim ngolu paato, nok oo lokke lukdor galugeya kangkén kíto.”

³³Bí dem kaangkénla poto, “Si ngok oo lokke lukdor galuge. Monkír kone bím dotonama. Josephme puké-puyéla arorupe dotonama.”

³⁴Delo Jakob agí egem bétsula ankí gasorem tulum sula, longe bojérungko bík oo legape ankí kenola duuto.

³⁵Bík ome-oo kídí tabungde bím ngiipe emla aato, idola ngingko sumaato. Bí poto, “Ngok siko amolope ngok uem ankíla ngo gíyé.” Dekepe bík abude kabbomto.

³⁶Dekepe idodelo, Midian kídíde Josephme Ijiptlo, Pharaohke sontori képtén akon Potiphar kíng kolíkto.