Read Alladian KEYUM KERO 38 Bible Online

KEYUM KERO 38 - Alladian bible

KEYUM KERO 38

¹Dekepe irodelo agí bíro kídíem megeyéla, Addulam lokke Hirah emnam ami kolo, Judahbí tokla duumín geto.

²Delo Kanaan ami Shuake omem Judah kaarík suto. Mimedem bí méngpe bomla ibbo-dobosuto.

³Mimede koo gela oo ko ola amínem Er emla mínto.

⁴Bí lekoda koo gelangkula ooko otoku. Delokke amínem Onan emto.

⁵Sok teyolo akoda kooko gelangkula, ooko otoku, delok amínem Shelah emla mínto. Koo otíl kunamdem Sejiblo duudoem Judahme obito.

⁶Judahbí bíkke oge yalumnam oo Er keepe mimeko laabito. Nyameng delok amíne Tamar.

⁷Idola Judahke obíng Er bí RUUTUM ke kangkolo atímana amipe ila, RUUTUM bí bím menape simoto.

⁸Judahbí Erke aní Onanme poto, “No gíla nok abíng mimedem méngpe bomla, nok bíroke legape ome-oo obitoka.”

⁹Idola Onanbí, ome-oo de bíkke sumayé emla kénsuto. Depeila bíkke abíng meyéng dem ketbosuyéme, bíro delokke ome-oo kamadope bí makmiem amolo ipaksuto.

¹⁰Bíkke dekepe inamdem RUUTUM bí kaanyipe kaala bímte RUUTUM bí simoto.

¹¹Depe ikolok bíkke nyameng Tamarme Judah potoku, “No ngokke oo Shelahke mimepe ima tetedem meyéngpe nok abu ekumlo duupolangka.” Bím pogade, “Bíkom bík abíng kídí akampe sipelo,” emla mííto. Delo Tamar agí abu ekumlo duusu potoku.

¹²Longe ayorungko doorongem Judahke méngpe bomnam Shuahke ome sikai. Ankí kenoem iyin rodem Addulam lokke bík angong Hirah bínyi, bík mér amídem ngíbínla iko Timnah doolunglo gíto.

¹³Legadem, “Kaatola, nokke ato abue Timnahlo mér amíd ngíbín kolo gíkai” emla Tamarme popato.

¹⁴Depeila bí meyéng egem ibínsula, gasor kolok agí amílem polum sula Timnape gína bedanglo duuna Enaim doolung gíída delo duuto. Kapeila Shelah bí minelateng, bím bíkke milope bimato emla Tamar kaasuto.

¹⁵Edílo Judah bím kaatodí, delo bí notii mimeko emla mííto, kapeila bík migmoem bí ikap sula duuto.

¹⁶Delo Judahbí bedang ampeng delo bíkkíng aaníndola bíme, “Aatola, ngo nokkíng aape míídung,” emla lupoto, idola bí bíkke nyamenge emla kénmato. Delo mimede bíme, “Ngokkíng nokke aamín gere aredem, no edít koda biyéne,” emla poto.

¹⁷Bí poyansuto, “Ngo nokkíng ngokke mér sobén abam lok bénbíl ko melík biyé.” Delo mimede potoku, “No bénbíl melíkmang adape nokke aang tosatnamko bipo layénía?” emto.

¹⁸Delo bí, “Ingkona atokoda aang amanpe nome bipopene?” emla poto. Delo mimede bíme potoku, “Nokke siil demlang lunggu gekedem delokke nokke alag banggén dem,” emla pobito. Delo bí, dekedem bím bila, mime delo aamín gela mimede bíkke lok koo ko gekai.

¹⁹Dekepe irodeme bí gílangkula, polum sunam gasor dem laabín sula, meyéng egedem getoku.

²⁰Judahbí bénbíl dem mime delo bido langkula, bíkke aang amanpe bitonam ekurang kídíem laado kupe, bíkke angong Hirahme lulígto. Idola mimedem Hirahbí mapaamato.

²¹Depeila bí Enaim ami kídíem íngkíto, “So bedang so duungana notii mimede ingkoloi?” Delo bulu, “So notii mime edílokom kakímang,” emla popa bito.

²²Dekepe emkolok Hirahbí, Judah kíng aalat sulangkula, “Ngo mimedem mapaamato, delokke so notii mime edílokom kakímang emla Enaim ami kídíe podung,” emla popa bitoku.

²³Judah delo poto, “Bíme ekurang kídíeme bommo toka, depe ikolok amie ngolum ngilkamayé, delokke ngo bím arepe bénbíl em bipe ituai; idola no bím mapaamato.”

²⁴Poolo angumko doorong dem amikone Judahme, “Nokke nyameng Tamarbí notiipe irugoola, kooko gedung” emla pobito. Delo Judah poto, “Bím yéélenla emelo romka toka.”

²⁵Bím yéélen bomdungem, bí ato abudelo agomem políkto, “Ekurang kídí sokke ato lokke koo komin ngo gedune. Sikesim kaatola, siil silang lunggu gekeng delokke banggén si sékoke?”

²⁶Judah dekedem kangkénla poto, “Bík agom kídísi aro berokdung. Imemnade ngo, kapeila ngok oo Shelahme bík milope bituamílo aiyai.” Depe irongem Judah edílote bím ketbo dobo kuyimang.

²⁷Mime delokke koo odílo, bí koo annyiko akiidelo geto.

²⁸Bíkke okii kidung delo koo kon delokke alage íglenla, okii bonade, menape gagríksula enno yalínako ginlíkdola emto, “Si lenpongyane.”

²⁹Idola bík hada rongkuem, bík bírode toggeto; depeila okii bonade, “No sike pesa agíe ilen sudune,” emla manto. Depeila bík amínem Perej emto.

³⁰Méélam dem bík bíro de, enno yalínadem alaglo gelangala toktílmínto. Depeila bík amínem Jerah emla mínto.