Read Alladian KEYUM KERO 4 Bible Online

KEYUM KERO 4 - Alladian bible

KEYUM KERO 4

¹Méélamdem Adam bí Ibme mimepe kénbo surongem, Ib bí koo gela Kainme odola poto, “Ngo RUUTUM ke igullok amiko paato.”

²Lekoda bí Kainke bíro Abelme olentoku. Abel bí mérem kaabomna amikuai delokke Kain bí amonglo arík ina amikuai.

³Longe bojéko irodem Kain bí arík lokke siipí-siiyé kídíem RUUTUMke keralo amanpe bomato.

⁴Abelkom otí-ogo genam mér kídílok pala, gaiyalumna adín, delokke oob kídíem bomaato. RUUTUM bí Abelke aman kídídem toríksuto.

⁵Idola Kainke aman kídídem, bí toríksumato. Delo Kain yagorupe marla bík migmue tuglíngkai.

⁶Delo RUUTUM bí Kainme ííto, “No kape mardun? Nok migmo nappange kape língkan?

⁷No ai-kampope itomílo kape nom toríksumayén? No ai-kampope imamílo paabe lamgélo kadung delokke paabde nom mííbomdung; idola no deme ruutumpe aido.”

⁸Kainbí agíke bíro Abelme aríklo gíbosudope tomla, bínyike aríklo gíbosudungem, Abelke mirolpe Kainbí irepla agí bírosudem mokasuto.

⁹Delo RUUTUM bí Kainme ííto, “Nok bíro Abel bí ingkolo?” Bí poyansuto, “Ngo kénmang, ngo ngok bíroem kaabomnía?”

¹⁰Delo RUUTUM bí poto, “No ingkokoda iton? Amolok nokke bíro lokke iyyie ngokkíng kapsadung.

¹¹Nokke alaglok, nokke bíroke iyyiem toríksuna among delok nom monpakdung, kapeila supak no béélíknam amikope ikai.

¹²Edílo no arík iyédí, de nom arda biyimayé. No tani amongso dungko-dakko kayimana dugnyokna amipe iyé.”

¹³Kainbí RUUTUM me poto, “Ngokke ajéngsi ngok gelanamem pemílo tebegyangkai.

¹⁴Arope no ngome amosokke monpak lendung delokke nok migmo keralok ngo runyok getíyé. Ngo dungko-dakko kamana dugnyokgoona amikope tani amongso ila, sékodí ngokke dugtíílo ngome kaaríksula iyéne de ngom mokayé.”

¹⁵Delo RUUTUM bí poto, “Depe imayé, sékodí Kainme mokayéne, bím dekena arelokke adu kíníd kokai edoem rayéku.” Delo RUUTUM bí sékote Kainme mokamadope bíkkíng iyodko ilíkto.

¹⁶Delo Kainbí RUUTUM ke keralok gílen langkula Eden lokke sanggodan Nod amolo duuto.

¹⁷Kainbí bík mimem kénla, mimede koo gela Inokme olento. Bí doolung luuneko ilenla delok amínem bík oo Inokke amínpe mínlíkto.

¹⁸Inokbí Iradme olento, Iradbí Mehujaelke abupe ito. Delokke Mehujaelbí Methusaelke abue delokke Methusaelbí Lamekke abupe ito.

¹⁹Lamek mime annyiko bomto, mimekon lokke amíne Adah delokke akonke Jilla.

²⁰Adah bí Jabelme oto. Bí tombulo duula tani bomnam simon-siliem bomgeyalumna abupe ito.

²¹Bík bíro amíne Jubal, bí miri lukolo konggangem batlíkla, tapungem ilíkla ilen gebona abupe ito.

²²Jilla bí Tubal Kainme oto. Bí arem, pitol, delokke atí atína ekurang mona amipe ituai, Tubal Kainke bírmeme Naamah emtuai.

²³Lamek bík mime kídíem poto, “Adah lang Jilla nonyi ngok agomem tattola; Lamekke mime nonyi ngok ponamem tattola. Ngome amikone tarí moketnam legape, delokke yaaméde kídnam legape, ngo amidem mokato.”

²⁴“Kainme lemkínídko edo rayémílo, arope Lamekme lemying kíníd kolang lemkínídko, mokanadem edo rayé.”

²⁵Adam bí bík méngem kénríksula, bí Seth emnam ooko otoku. Kapeila bí sikepe manto, “Kainbí mokanam legape, Abelke ayanpe Shédíbí ngom ooko bitoku.”

²⁶Sethte ooko ola bím Inosh emla amín mínto. Delo longe delo ami kídíe RUUTUM ke amínem mínlenla kumsukai.