Read Alladian KEYUM KERO 40 Bible Online

KEYUM KERO 40 - Alladian bible

KEYUM KERO 40

¹Longe ayorungko doorodem, asi-apongem idu-saatok bina ruutumdelang donam-tíínamem ibona ruutumde, bínyike roja ruutum,

²Ijipt lokke Pharaohme atímape ila marmoto. Depeila asi-apongem idu-saatok bina delok teyong lolang donam-tíínam ibona teyong delo Pharaoh bí marla,

³bínyim, sontori lokke képtén ekum delo, Joseph mete tumla meko patek delo melíkto.

⁴Sontori delokke képténde Josephke kaabom-tatbomko ara delo bínyim melíkla, bí kaabomto. Longo longkéko duurongem,

⁵asi-apongem idu-saatok bina ruutumdelang donam-tíínam ibona ruutumde; bínyi yoh atelem lekope angu-angupe immang eke maato.

⁶Roh kon delo Josephke aaduem, bínyim ankí-kenodupe kaala,

⁷bík ruutum ekum patek delo tumnam Pharaohke migom annyidem, “Nonyi kapei siro ankí-keno duune?” emla bí íngkíto.

⁸Bínyi poyan suto, “Ngonyi immang eke maato, idola delokke gomroem sékote pokén bina kamang.” Delo Joseph poto, “Shédímin immang lokke gomroem pobine, iname nonyik immang dem ngom pobitola.”

⁹Delo asi-apongem ibina ruutumde posukai, “Ngok immalo kaatoname, ngok keralo onggur aneko kaado,

¹⁰anedelo aag angumko kaado. Edílo anede sangkadí de appun punla, ayé lenla minkai.

¹¹Ngo roja lokke bati bottena dem bomdo, depeila ngo onggur ayédem pílla, alangem nyumlíkla deme rojem bito.”

¹²Joseph pobito, “Delokke gomroe simoko, aag angumde longe angume.

¹³Longe angumnalo roje nome ayang langkula, nokke kerang yékampe yémoyéku. Nokke kerangke kísape no bíme asi-apongem ibi-saabiyéku.

¹⁴Idola edílo ato-siro tabunge aiyékudí, ngom míípa subilangka delokke no rojem ngok legangem pobila, ngom sok lenmo dokupe rogubilangka.

¹⁵Kapeila ngom Hibru amolok umla so tokboto. Soote ngo pateklo duubompenam atí agér imang.”

¹⁶Edílo donam-tíínam iya bina ruutumde, Josephke aipe gomroem pobinamem kaayédem bíte Josephme popato, “Ngokom immang ko kaato. Ngok tukkulo ettíng eke aapé angumko kado.

¹⁷Teyong yalumke aapé delo atí-atípe inam eke Pharaoh keepe kado. Idola ngok tukku teyong delo, yobala pettange dekedem dobomkai.”

¹⁸Delo Joseph pobito, “Aapé angumde, longe angume.

¹⁹Longe angumnalo Pharaoh nome laalen langkula, nok dumpong em patung geyéla nome esing kolo pakyé. Delokke pettange aala nok simang amílem doyé.”

²⁰Longum nanade Pharaohke odí longe. Bí bíkke mite-migom tabungem doman ko doboto. Bí asi-apong ibina ruutum dem lang donam-tíínam ibona ruutum dem, takam mite-migom kerang delo laalento.

²¹Bí asi-apong ibina ruutum dem, Pharaoh kelo tíípe-dopenamem kaabi-tatbi dokupe imotoku.

²²Idola Josephke immang gomro pokampe donam-tíínamem ibona ruutum dem paksulto.

²³Idola asi-apong ibina ruutumde, Josephme míípa suyimala kénsuyimato.