Read Alladian KEYUM KERO 41 Bible Online

KEYUM KERO 41 - Alladian bible

KEYUM KERO 41

¹Dítak annyiko apíípe irodem Pharaohbí immangko maato. Immang delo bí Nail korong abelo dagdo. Delo dagduem,

²korong delok ngella, kaalíkna rune kíníd ko lenla robeng delo neyangem naggongkai.

³Buluk méélam delo kekdírla, kaanyina rune kíníd konko korong delok lenla buluke anín delo korong abedelo dakkai.

⁴Delo kekdírla, kaanyina rune kídíde, kampona ngelna rune kídídem doyinto. Delo Pharaohbí darngo sutoku.

⁵Bí iplat sulangkula lennyinape immang konko maatoku. Ambeng atel kolo, kampona ngelna ampil kínídko batlenla saado.

⁶Buluk méélam delo mooruk asare mutpernam, remila suna ampil kíníd kone batlen mínto.

⁷Remila suna ampil kíníd de ngelna, kampona ampil kíníd dem méyyin bomkai. Delo Pharaoh darep langkula immang ko emla míísutoku.

⁸Rohdem bík aapíe genyiito. Depeila bí Ijipt lokke kénna-paana ami kídíem lang miri kídíem tomdum suto. Pharaoh bík immang dem pobisuto. Idola sékote bíme delokke gomroem pokén bina kamato.

⁹Delo asi-apong ibina bí Pharaohme poto, “Silo ngok míímemem míípang sudungku.

¹⁰Longeko Pharaoh no, nokke agér ibina kídíem marbomla sontori képténke patek ekumlo ngom lang donam-tíínam ibina ruutum dem pateklo líkto.

¹¹Ngonyi yoh atel kolo angu-angu gomro kasuna immang asak maabosuto.

¹²Delo sontori lokke képtén kelo agér ibina Hibru yaamé koo ko kato. Bí ngonyike immang gomroem pobito.

¹³Ngo agíke yébomnam em paasutoku, delokke bíme paksulto.”

¹⁴Delo Pharaoh Josephme, patek delok laalen langkula bíkkíng aadope tomto. Joseph bí dumídem ngísula, ege-galugem anípe ilíksurongem Pharaohke kerang delo dagato.

¹⁵Josephme Pharaoh poto, “Ngo immangko maato, idola sékote gomroem pola bimang. Idola no edílo immangko tatyédí delokke gomroem pobidung, emnamem ngo tatdung.”

¹⁶Joseph poyansuto, “Dem ngo ilamang, idola Shédíbí Pharaoh nom, nokke ííbomnam gomroem biyé.”

¹⁷Delo Pharaohbí Josephme pobito, “Ngok immalo, Nail korong robelo ngo dagdo.

¹⁸Delo korong delok ngella kampona rune kínídko lenla, robeng delo neyang dogoto.

¹⁹Buluk méélam delo kekdírla kaanyiruna, kaangu-kaangakna rune kínídko lenmín geto. Dekena kaanyina runem, ngo Ijipt among so kaangkímang.

²⁰Kekdírla kaanyina rune kídarde, ngella kampona rune kíníd dem dobomkai.

²¹Bulu dekepe dolate, kerangke, akampe atí domana kísa, kaanyipe ika dada. Delo ngo darngo sutoku.

²²Lekoda immang maadoku delo kaatoname, ambeng atel kolo, kampola ngelna ampil kínídko batsaadupe kaato.

²³Buluke méélamlo mooruk asare mutpernam, remila suna ampil kínídko batsaa míndo.

²⁴Delo remila suna ampil kínídde ngelna kampona ampil kíníd dem méyyin bomkai. Sim ngo miri kídíem pobiname, sékote pokén bina kamang.”

²⁵Delo Pharaohme Joseph poto, “Pharaoh nokke immang annyide akame delokke atele, Shédíbí, bíkke agér ipenamem Pharaoh nome lengkanto.

²⁶Gairuna rune kínídde dítak kíníde, delokke gaina ampil kíníd dete dítak kíníde. Dekede immang atele delokke akame.

²⁷Kekdírna, kaanyina rune kíníd lenmín gena delang mooruk asare mutpernam agér kamana ampil kínídde dírí-keno dítak kíníde.

²⁸Nome ngokke ponam kísa, Pharaoh nome Shédíke ipenamem bí lengkan sudung.

²⁹Ijipt amolo dítak kíníd ko yagorupe jéyé.

³⁰Deme dírí-keno dítak kínídko píímín geyé. Delo Ijiptlo jénam kídíem mitpan suyé, delokke dírí-kenoe ibomyé.

³¹Aamín gepena dírí-keno dítak kínídde yagorupe ila, jétonam dítak kíníddem atí míípa suyimayé.

³²Pharaoh no lennyi pekai immang atelem maanam si, Shédíbí sim imone delokke menarupe imoyé emla lengkantung.”

³³“Depeila supak Pharaoh no airupe kénjing kénmala kénna amiko ullenla Ijipt amongem kaabom dope itoka.

³⁴Delok rongem jédo dítak kíníd araso ali-aam lokke ole pilngo lokke akonem laayin godope abíd migom kídí emkom ullen toka.

³⁵Bulu aapena jédo dítak lokke dope-tíípenam em laadum sugeyéla Pharaoh nokke agom polík aralok kumsung suunem botterupe mola doolung luune kídí tabunglo mesiisiyin dope itoka.

³⁶Dem donam kídar dem Ijiptlo dírí-keno dítak kínídde aayéme agér inadope mesiipe aiyé. Depe imílo amosi dírí-kenolo nyokmayé.”

³⁷Josephke popaanam agom-aang kídíem Pharaoh lang mite-migom kídíe airupe tatto.

³⁸Depeila Pharaoh bulum poto, “Shédíke aidem kaana ami sokke kísana amiko ngolu mapa layénía?”

³⁹Delo Pharaohbí Josephme poto, “Shédíbí nome sike takamem kénmo kolok, nok kísana kénjing kénmala kénna ami kamang.

⁴⁰No ngokke roja ekum sokke ruutum pe iyé, delokke ngokke ami kídí tabunge nokke polígem tatyé. Roja paleng petom so duuna, ngo nom boro yayé.

⁴¹Nom ngo supak lokke ila Ijipt among tabungem yébodope ruutum pe ilíkdung.”

⁴²Depe empala Pharaohbí agíke lakkéng delok bíkke siil kana koosiem laalen sula Josephke lakkéng delo bíllíkto, delo bí kampona ege lukdorko píllíkla uun lungguko Josephke alíng delo tulíkto.

⁴³Pharaohbí, bím nítmín gena, ukum bina ruutum pe Josephme imola, roja guré gaari delok bíme dugmola, ami kídíe, “Gígébito,” emdope, Ijipt among tabungem yébona ruutumpe ilíkto.

⁴⁴Pharaohbí Josephme poto, “Ngo Pharaoh, Ijipt among takam so nok agom kamape sékote ale demangkom alage bele mayé.”

⁴⁵Pharaohbí Josephme Japhenath Paneah emla amínem mínlík dola, uyu Onke miri Potipherake ome Asenathme bík mimepe bito. Delokrodem Joseph bí, Ijipt among tabunglo mayinto.

⁴⁶Ijipt lokke roja Pharaohke agérlo Josephke iyadoem, bí takying angumto. Josephbí, Pharaohke keralok gílenla Ijipt among tabunglo mayinto.

⁴⁷Jédí dítak kíníd delo among de bojérupe ali-ayé kato.

⁴⁸Ijipt delokke jédo dítak kíníd delo, donam ilennam tabung em Joseph bí laadum suyinla, doolung luune takamlo mesiisiyin gooto, doolung luune miyoo lokke dego miyoolo, arík-anam inam tabung lokke ali-aam kídíem doolu luune miyoo delo mesiito.

⁴⁹Siyéng asi lokke sulli kísa idope deddína ali-aamem Joseph mekumto. Dekede bojé aloola, sanam yimala bí atsap kote iyimato.

⁵⁰Dírí-keno dítage píímang adape, uyu Onke miri, Potipherah ke ome Asenath bí Josephme oo annyiko obito.

⁵¹Joseph bí kerangpe opoonam dem Manasseh emla amín mínto. Depe mín-gadem bí sipe emsuto, “Shédíbí ngokke ebín takam emlang ngok edung-erang kídíem kénsu moimape imoto.”

⁵²Otílnam oo dem bí Ephraim emla amín mínto. Mín-gadem bí sipe emsuto, “Ngokke adír pangko amolo Shédíbí ngome edíí-sirímoto,”

⁵³Ijipt lokke jédí dítak kínídde gíyinkai.

⁵⁴Josephke pokampe dírí-keno dítak kíníde píngkai. Abíd amolote díríe kato, idola Ijipt amode doname kato.

⁵⁵Edílo Ijipt tabude dírílok keno kadí, ami kídíde donam legape Pharaohme kapkan suto. Delo Pharaohbí Ijipt ami kídíem poto, “Joseph kíng gíla, bí kape poyédí dekepe nolu ilangka.”

⁵⁶Edílo díríe among tabung delo aayin kadí, de yagorupe Ijipt among delo ila, Joseph bí kumsung sune kídíem iya bila donam em Ijipt ami kídílo koto.

⁵⁷Tani among tabuso díríe aala, among takam rego mipílok amie aadumsula Joseph kelok donamem reyinto.