Read Alladian KEYUM KERO 42 Bible Online

KEYUM KERO 42 - Alladian bible

KEYUM KERO 42

¹Edílo Ijipt amonglo ali-ayé paadung emla Jakobbí tattodí delo bí oo kídíem poto, “Noluk aralo kape kaamínsula idune?

²Ijipt amolo ali-aame kadung emnamem ngo tatdung. Delo nolu enla ngoluke legape, ngolu simape turdope ali-ayém retoka.”

³Dekepe ila Josephke bíro íyingde Ijiptlo ali-aam repe emla ento.

⁴Idola Jakobbí Benjamin me abíng kídí delo melík mato. Bí Josephke bíroe delokke bík teyolo entíng gítílo atímangko kapelo emla Jakob bí pesoto.

⁵Kanaan amolote díríe kala ali-aamem reana kídí aralo Israelke oo kídíete aamín geto.

⁶Delo Joseph ami kídílo ali-aam kona, among delokke gobonorpe ila yéto. Depeila edílo Josephke bíro kídíe píítodí, bulu bík keralo dumponge amope ila, bulu lebíng kooníla gubala kumato.

⁷Edílo Joseph bulum kaatodí, delo bí bulum kangkénto, idola bí miying ami kísape irula bulume tolpe agomem pola, “Ingkolok nolu aadune?” emla ííto, “Ngolu Kanaan among lokke donam repe emla aadung,” emla bulu poyan suto.

⁸Joseph bí bulum kangkénto idola bulu bím kangkén maato.

⁹Delo bí bulum immang maabomnamdem míípasula bulum luto, “Nolu miru kotokieke, nolu, ngoluke among sokke edíngmape elukuem yirkangpe emla aadung.”

¹⁰Bulu poyan suto, “Ma, ngoluk ruutuma, nok béérang kídí ngolu donam repe emla min aadune.

¹¹Ngolu abu atel lokke oo kídíe. Nok béérang kídí ngolu miru lokke kotokipe ila aamang, aina amie.”

¹²Bí bulum manto, “Ma, nolu among sokke edíímape elukuem kanggope aadung.”

¹³Idola bulu poyan suto, “Nok béérang kídísi, Kanaan among lokke abu atel lokke, bíro kumsu íying kolang annyiko kadung. Bíro aníyalume abulo duumín gekai, delokke akone kaimang.”

¹⁴Joseph podan teteto, “Ngokke potonam kísape nolu miru lokke amieke.

¹⁵Noluke aroem nolum sok kaangkényé, Pharaohke amín lok ngo pésudung, noluke bíro aníyalumde so pííma tetedem, nolu sok gílen kumayé.

¹⁶Noluke aralok akonem melík tokuka, bíro dem laadokupe, delokke abíd nolum pateklo mepoyé. Sim noluke agom kídíem aroe emla kangkén nanape idung. Depe nolu imayémílo Pharaohke turname aronam kísa, nolu miru lokke kotokie.”

¹⁷Depe emla bí bulum longumko mepoto.

¹⁸Longumnana longe delo bulum Joseph poto, “Nolu ngok ponampe itoka delo nolu turyé, kapeila ngo Shédíme pesodung.

¹⁹Nolu aina amieke mílo, nolu akonem so patek mepala abíd nolu, akii kenona edung-erang legape ali-aamem gebi kakuka.

²⁰Idola nolu, aní yalumna bíro dem ngokkíng boma langkuka depe imílo, noluk agom kídíem aroedí aromangedí dem kaayé, delokke nolu simayé.” Delo bulu depe ipe emla togekai.

²¹Buluke aralo pobosuto, “Arope ngolu, ngoluke bíro delok legape sikepe adír pangkai. Bíkke yénam legape edítko bí adírla ngolum roguton. Idola ngolu tatmato, depeila sikena adíre ngolukíng kakai.”

²²Reuben bulum poto, “Koo delokke teyo delo paab imapeka emla ngo nolum pomanganía? Idola nolu tatmato; iname ngolu supak bík iyyi adumpe areme bikupe aiyé.”

²³Josephbí poya bina amiko mekolok, bulu tatkényé emla míímato.

²⁴Buluke kera delok bí daksisula kapsito, delokke bí bulum lekoda ngéba dokula lupotoku. Bí Simeonme laala buluk kera delo yééto.

²⁵Joseph bí buluke mun kídílo ali-aam lok dunbí bidola, buluk nokdi abal emte mipil mun delo itak sulík langkula idope delokke buluke en-gekunana pimpu kídíemte ilíkdope políkto. Buluke legape dekepe ibirodem,

²⁶bulu buluke gado kídílo ali-aam kídíem pyalíkla entoku.

²⁷Buluke endak langkula yumedem dongkuko alop delo akone, bíkke mundem, gadoem donam bipe emla taalen doem bík mun nappa delo bíkke nokdi abalem kaapato.

²⁸Delo bí bíro kídíem, “Ngok nokdi kídíem bilat sutungku, sina ngokke mun si duune,” emla popato. Delo buluke aapí-aangde pokla, buluke aradelo peso kolok danla, “Shédíbí kapei ngolum sikepe itone?” emla pobosuto.

²⁹Kanaan amolo buluke píírong kuem buluk abu Jakobme kape-kape ituadí deke takamem popa bitoku, bulu poto,

³⁰“Among belokke ruutum pe ina amide ngolum tolpe agomem lula, ngolum miru ami lokke kotokipe ina kísa míngumla bík ségue ikando.”

³¹Idola ngolu bím, “Ngolu aina amieke, ngolu miru amike kotokipe rugomang.

³²Ngolu abu atel lokke oo íying kolang annyiko kadung, bíro kone kaimang delokke aníyalume, Kanaan amolo abulo duumín gedung emla pobito.

³³Delo among delokke ruutum pe inade ngolum poto, ‘Nolu aina ami ekeya emla ngo kéndope, ngo sikepe ikayé: noluk ara lokke bíro konem so ngokkíng melangka, delokke noluk kenona erang legape donamem bomla enlangkuka.

³⁴Noluke aníyalum bíroem aabola aalangkuka, depe imílo nolu miruke kotokipe rugo nekeya, ma aina ami ekeya emla ngo kényé. Delo ngo noluke bírodem melen langkula, nolu amoso bési-bépar igolayé.’ ”

³⁵Edílo bulu mun kídíem irong tokudín, mipile agíke abal munangem paayintoku, delo bulu lang abude abal nyogon kídíem kaala pesolok mamam sukai.

³⁶Buluke abu, Jakob bulum poto, “Nolu ngom ngok koo legape ankíeme bidung. Joseph bí kaimang, Simeonte kaimang delokke supak Benjamin mete bomkupe emdung. Ato takamsi ngok mirupe ikai.”

³⁷Abudem Reuben poto, “Ngo Benjaminme nokkíng boma bikumayémílo, no ngok oo annyiem mokalado. Bím ngokke kaabomko aralo melíktoka, ngo bím aaboyéku.”

³⁸Idola Jakob poto, “Ngok oode nokkíng belo enmín gekumayé. Bík bíroe sikai, delokke supak bí petom dungada. Nok enboyém, bedung-bedang entínglo atímanako kamílo mijing ngom, nolu dumpue pemonge ila, ankí kenolok ago aralo aamoyé.”