Read Alladian KEYUM KERO 43 Bible Online

KEYUM KERO 43 - Alladian bible

KEYUM KERO 43

¹Dírí-kenoe Kanaan amolo yago yayang ila,

²buluke Ijiptlok bomang kunam ali-aamem doyin-tííyin surodem, Jakob oo kídíem, “Gílangkula ngoluk legape donam retokaku,” emla polík toku.

³Judah bím poto, “Ngoluke bíroem aabo kumadem bík migmoemte kaarík sukumayé emla amide séngépe podo.

⁴No ngoluke bíro dem ngolukíng melík kumílo ngolu enlangkula donamem nom rebiyé.

⁵Idola no melík mamílo, ngolu enmayé kapeila de amide, ‘Nolu bíro dem bomang kumape ngok migmoemte kaarík sukumapeka,’ emla ngolum pogapdo.”

⁶Israel bulum poto, “Nolu bíro konko kadung emkanla kape dem amidem, ngok teyolo ebín-eson imokan?”

⁷Bulu poyan suto, “De amide ngolum lang, ngoluk erang doolungem ínggapla, ‘Noluk abue turdung adanía? Nolu bíro konko kadunía?’ emla íído. Ngolu bíkke íngkínamem poyan suto. ‘Noluke bíroem bomala aalangkuka,’ emla bí poyépesa emla ngolu atí míímato.”

⁸Delo bík abu Israelme Judah poto, “Koo dem ngolukíng menape melík tola, ngolu menape endope. Depe imílo, no lang ngolu delokke ngoluke koo kídíe simape turyé.

⁹Koo sime kaasi-tatsi dope ngo agíe toge sudung. Ngo bím aabo langkula, nok keralo duumo kumayémílo, delok daidem ngok teyolo ngo yégeyé.

¹⁰Ngolu sikepe adol mangamílo lennyi pekai enkup enlat sula supak iyai.”

¹¹Delo buluke abu Israel bulum poto, “Dekepe arope iperumílo sikepe nolu itoka: among sokke gaiyalumpe lenna, molom kuséréng anyongko, ngullang anyongko, nesi-neyang loklang kosana alanglok delokke pistasio amí loklang badam lok gela bíme amanpe gebitoka.

¹²Nolu nokdi abal demkom bojéyape bomtokuka, kapeila noluk mun nappalo abal ilík kunam dem bilat sukupe aiyé. Deme imemlok ilík ladoku.

¹³Nolu menape noluk bíro simkom enbotoka.

¹⁴Noluk bíro kon demlang Benjamin me nolu kelo lekope enbo mola dokupe Ralya yalumna Shédíbí, ami delokke kerang delo nolum ayang dakyika, idola ngokke pedan, ngok kooem nyokmorupe mílo ngo bulum nyokmope aiyé.”

¹⁵Depeila ami kídíde Benjamin melang aman kídíem delokke abalem bojéyape bomlangkula, Ijiptpe lomla entok langkula Josephke kerang delo bulu aabitoku.

¹⁶Edílo buluke aradelo Benjamin me Joseph kaatodí, delo bí ekum delo agér idu-saatok bina dem poto, “Sim ami kídí sim ngok ekumlo aabo langka. Taroko petla irungtoka. Si ami kídí si ngokkíng longe donamem dobosuyé.”

¹⁷Amide Josephke ponampe ila ami kídí dem bík ekum delo aaboto.

¹⁸Bík ekumlo aabododem ami kídíde pesoto. Bulu sikepe mííto, “Keradelo ngoluk mun kídí delo abal melík kunam lega pemino ngolum aabodune. Bí ngolum mirolpe ibomla, ikumla abílpe umla ngoluk gado kídíem bompe emla míídunape.”

¹⁹Depe mííla ekum lamgé delo píídoem, Josephke ekumem kaadung-tattok binadem sikepe poto,

²⁰“Ruutum no ayangsula tatbilangka. Kerape ngolu donam repe emla so tokto.

²¹Idokom ngoluk yoh dongkuko delo, mipil ngoluke munlo ali-aam lokke are abal kídíem paayin toku. Depeila dekedem ngolu boma bidungku.

²²Delok teyolo donamem rekupe ngolu abalem bomtem dungku. Ngoluk munlo sékodí abal kídíem líktokune dem ngolu kénmang.”

²³Bí bulum manto, “Nolu pesomapeka, de aiyé. Noluke Shédí delokke, noluke abu lok Shédí pemin, noluk mun aradelo abalem nolu kepe ruulíktone. Noluk abalem ngo paato.” Depe emrongem bí buluke kera delo Simeon me laalen bitoku.

²⁴Kaadu-tattok bina amide, ami kídí dem Josephke ekumlo aabola, lesuk-laksuk dope asiem boma bila delokke gado kídíem ammung bila ito.

²⁵Longe raadalo Josephke pííyékuem buluk amanem bidope bulu irung sarung suto, kapeila delo apim dobo suyé emnamem bulu tatto.

²⁶Josephke ekum delo píídokuem bulu ekum delo bomanam amanem bím bila, amope gubala bík kera delo kumsuto.

²⁷Bí buluke, ainam aimanam em íngkíla poto, “Noluke popanam noluk abu mijide aidudí? Bí turdung adadí?”

²⁸Bulu poyan suto, “Nok béérang ngoluk abubí supakkom aila turdung.” Depe pola bulu ngemgíbla bím kumsuto.

²⁹Bí delo kanggo sudola bík agíke ane lokke onam oo, bík bíro dem kaala íngkíto, “Noluke popanam noluke bíro aní yalum manía si? Ngok ua, Shédíbí nok teyonglo ayang dakyika.”

³⁰Delo bí anídem kaasu dola yagorupe aang ola, Joseph delok gílen langkula kapsi supeko matala, bíkke agíke ipko pírtek delo aalangkula kaptoku.

³¹Bíkke migmoem mamuk supala, lenlangkula bí aapíem hakjém sudola, “Donamem ilen boto,” emla políkto.

³²Joseph agíe angusupe dosuto, delokke bík bíro kídíde angu supe dongusuto, kapeila Ijipt ami kídíe Hibru kídílo dobo sumangai, kapeila de Ijipt ami legape belum nampe ito.

³³Bíro kídídem Joseph bí, dítak akorpe abíyalum lok ila aníyalum loope dungka sula duumoto. Depeila bulu kaamín sula míírí-míínyope mííto.

³⁴Donamem Josephke dopom delok bulum bito. Delo abídem pemílo Benjamin me lemngo adum kokai bojéyape donam em bito. Bulu delo bíkkíng lekope aapí-aange apíírupe dobo-tííbo sula ito.