Read Alladian KEYUM KERO 44 Bible Online

KEYUM KERO 44 - Alladian bible

KEYUM KERO 44

¹Joseph bí ekum dem kaabom tadbomna dem sipe poyilto, “Ami kídí lokke mun kídílo donamem edítko bulu gela yékudí, dekeko leemo líklangka. Delo mipilke mun nappa delo abalem melík bilangka.

²Delo ngokke baldín batiem, aníyalumke mun nappa delo melíkla, bíkke ali-aam are abal kídí demte metak sulík langka.” Josephke pokampe bí ibito.

³Rohpe irodem ami kídídem, buluk entípe gado kídí demla bulum enmotoku.

⁴Buluke doolung delok mooteng gíkumang adape, Joseph kaabom-tatbom bina dem poto, “No menape buluke méélamlo dugmín gela, bulum pííyém sipe polangka, ‘Nolu kape ainem atímape iyan sukan? Kape nolu ngok ruutum ke batiem pyongkan?

⁵Si bati si ngokke ruutum ke tíínala delokke líímé kaanana mangía? Nolu atírumana atoko ito.’”

⁶Edílo bí bulum píítodí, agom kídídem bulum pobito.

⁷Idola bulu bím poyan suto, “Ngolum ruutum no kape sikena agom mandun? Dekena agérem imang emla ngolu pésudung.

⁸Kanaan amolo ngoluk mun kídílo pangkunam abal kídí emte ngolu bomlat subi toku. Kape kísa ngolu nokke ruutum ke ekum lok baldín demangkom uun em doppyo yéne?

⁹Nokke béérang kídí arasok akone depe itupe paayé mílo, bí sipe aido delokke abíd ngolu ruutum ke abílpe iyé.”

¹⁰Bí bulum poto, “Dekemílo aiyé, noluke pokampe ipe aido. Séko kelok dekena atoko paayédí, bí ngokke abílpe iyé; nolum abíd em dan ipenam kamayé.”

¹¹Depeila bulu mipile mun kídídem amolo jooyila taaya yayinto.

¹²Josephme kaadu-tattok binade abíyalum lok malenla, aní yalum loope mato. Baldín batidem Benjaminke mun delo mapaato.

¹³Delo bíro kídíde ankílok agí egem bétsula, gado kídí delo ekurang kídídem joolík langkula doolung luune delo gílat sutoku.

¹⁴Josephke ekumlo duudung adadem, Judah lang bík bíro kídí de aalangkula, bík keradelo amolo gubala bím kumsuto.

¹⁵Joseph bulum poto, “Nolu kape sikepe ikan? Ngok kísana amie líímé-tagil lok atoem paalenyé emla nolu kénmanía?”

¹⁶Judah poyan suto, “E ruutum, nome ingkokoi ngolu poyékune? Kape kísa nome ngolu posu layékun? Nok keralo ngolu kape kísa deebín suyén? Shédíbí ngoluk imem em lengkan bito. Supak, batiem pangkuko bí petommang, ngolu takam nokke abíle.”

¹⁷Joseph bulum poto, “Ngok keralok dekena agére mooteng dakyika. Batiem pangkuko ami petom demin ngokke abílpe iyéne. Abíd nolu, noluke abu sulo ensu langkuka.”

¹⁸Delo Judahbí aanín dola poto, “Ngokke ruutum no, ngome agomko pomo langka. No Pharaoh agísuem akam sula ituakom, béérang ngok teyolo marmayika.

¹⁹Ruutum no ngolum, ‘Nolu abu kadun?’ delokke ‘Bíro kadun?’ emla ííto.

²⁰Delo ngolu nome, ngolu abu mijingko kadung delokke bík miji rongem okunam bíro ko kadung, bíro delokke abínge sikai, delokke bík ane lokke bí petom turdung, iname abu mijide, bím yagorupe ayadung embito.

²¹Ruutum no agíe, kaasu dope bírodem so enbo langkuka emkolok,

²²‘Koode abuem gínyo lamang, bí depe imílo bík abue siyé,’ emla ngolu nom poyan suto.

²³Delo no ngolum, ‘Noluke bíro aníyalumde aamín gekumang tete dem ngok keralo nolume aamo yimayé,’ emto.

²⁴Ruutum nokke ponam kídíem, ngolu ekum píírongku delo, ngoluke abuem popa biyin toku.

²⁵Delo bí ngolum enlangkula donam anyongko retoku emla polík langkula ikolok,

²⁶ngolu bím poto, ‘Ngolu, ngoluk bíro aníyanem enbo kumadem ami delokke keralo ngolum aamo kumayé. Iname bíro aníyasi enkumílo min ngolu enlayékune,’ emto.

²⁷Delo ngoluke abude ngolum poto, ‘Ngok mime Raselbí ngome oo annyi petomko obito.

²⁸Akonde ngok keralok nyokkai, bíme monkír-tangkíre donyok tope, kapeila bík gílen rodem bím ngo kaayimang.

²⁹Supak nolu ngokkíng bíme laabínla yétíng gítíng lo bíkkelo atímangko kamílo mijing ngom nolu dumpue pemonge ila ankílok ago aralo aamoyé.’

³⁰Depeila supak ngo, koo sim enbo kumape ngok abulo enlangkula, bí ngolukelo

³¹koo sim kaapang kumamílo bí silangkom iyé. Kapeila bí koo sim pansu lamape idung, delok teyolo bí mijing jingkak aloodung, iname ankíe bíme simoyé.

³²Sikena ebín legape koo sime kaasi-tatsi dope, ngo agíe toge sutung. Ngo bíme, ‘Koo sime ngo nokkíng boma biku mayémílo delokke daiem ngok yénam tabulo geyé,’ emla togesuto.

³³Depeila koo sokke ayanpe, ruutum nokke so ngo abílpe duuyé. Bíme abíng kídíso enmín gemo tokuka.

³⁴Ngo koo sim enbo kumape, kape kísa abu kerang elo ngok migmoem lengkan yékun? Ngok abu lokke ankí kenoem kaala, ngo hakjém lamayé.”