Read Alladian KEYUM KERO 45 Bible Online

KEYUM KERO 45 - Alladian bible

KEYUM KERO 45

¹Delo Joseph béérang kídí kerang delo agísuem hakjém sula yimala ami kídíem, “Mipile ngok kerasok gígépotoku,” emla lulen potoku. Depeila bík bíro kídí kerang delo bí agísuem popa subidodem bíkkelo sékote dakmín gena kamato.

²Bí borope kapla, kapdud dem Ijipt ami kídíe lang Pharaohke ekum erang kídíe tatyinto.

³Joseph bíro kídídem popa suto, “Ngo Joseph min, ngokke abue supak pete duudung adanía?” Idola bík kerang delo, bík bíro kídíde yagorupe pesola, bím atí poyan sula mato.

⁴Delo Joseph bí bulum, “Ngokkíng aanín tola,” emto. Buluke aanín rodem bí bulum poto, “Noluke Ijiptlo kolíknam, noluke bíro Joseph moko ngo.

⁵Supak nolu míídír mapeka delokke ngom so kolíkto emla agísu teyolo buulí mapeka. Dekede taniem turmope emla Shédíke ngome noluk kerape irung gebiname.

⁶Dítak annyiko díríe ikai, idola takngoko díríe ila ngiinam-repnam ipemaname kadungada.

⁷Idola noluke miliem tani amoso mesiila, nolum míngkén kíram sudope mopítla turmope emla, Shédíbí ngom noluk kerape megetung.

⁸Iname, nolu ngome so melíkmape, idola Shédímin melíktone. Bí ngome Pharaohke botteyalumna migompe imola, Ijipt among takamke ruutum pe imoto.

⁹Iname nolu supak ngok abulo menape enlat sulangkula, sikepe bím polangkuka, ‘Nok oo Joseph bí sipe podung: Ijipt among tabung lokke ruutum pe, Shédíbí ngome imoto. Adolmape ngokkíng menape toklangka.

¹⁰Goshen amolo, ngok anínso, no lang nok oo kídíe, nok oten kídíe, nok gooru sobén kídíe lang mér kídíe delokke nokke bomnam ato-siro tabungem lekope duubosula duulangka.

¹¹Ngo noluke legape amo delo irung biyé, kapeila díríe dítak pilngoko kadung dada. Demamílo no lang nok ekum-erang tabunge delokke bomnam takame aré-anyoyé.’

¹²Supak nolu agísue kaasudung delokke ngok aní Benjamin no kom kaasudung, ngo Joseph agí nappa lok arope posudung.

¹³Ijiptlo erbomla ngome borope mííbomnam emlang noluke agí amiglok kaasunam kídíem, nolu ngok abuem pokan bilangkuka. Delokke ngok abudem menape so tokbo tokuka.”

¹⁴Depe pola bí agí aní Benjamin me gomla kapto, delokke Benjamin teng bím kapdola gomrík suto.

¹⁵Delo bí kapdola bíro kídí tabungem mumpupto. Depe irodem bíro kídíde bím lupoto.

¹⁶Josephke bíro kídíde píídung emla Pharaohke ekumlo kobore pííyédem Pharaoh lang bíkke yébonam ruutum kídí tabude aipe míngkai.

¹⁷Pharaoh Josephme poto, “Nokke bíro kídídem sikepe idope polangka, ‘Noluke gado kídí delo eget em replík geyéla Kanaan amope enlangkula,

¹⁸noluke abu demla, noluke edung-erang kídíem so ngokkíng enbo langkuka, ngo Ijipt sok aiyalumna among em biyé, delokke nolu among so jéla-remla ila duulayé.’

¹⁹No bulum sike pete emlangka ‘Ijipt sok gaari bomlangkula, noluke mime delokke koo aména kídíem lang noluke abuem so aabo tokuka.

²⁰Noluke mekut sunam ekurang emlang amongem ankímapeka, kapeila Ijipt sokke gaiyalumna among de nolu kepe iyé.’”

²¹Pharaohke pokampe Israelke koo kídíde agérem ito. Joseph bulum gaari bila, delokke bedu-bedalo dopenam emte iru-saru bilíkto.

²²Bí bulum mipilem galuk anílok, abor asak bila delokke Benjamin me nokdi língko angum kolang galuk borngoko bito.

²³Bí abudem, Ijipt lokke gairuna atoem milokong gado íying kolo, delokke ali-aam em mime gado íying kolo replík bila, bedanglo endungem míípenam emteng bilíkto.

²⁴Depe ipala bíro kídídem, “Bedu-bedalo nolu lumín-manmín sumapeka,” emla buluk gílen dakkuem poyilla, bulum melík toku.

²⁵Bulu Ijipt lokke, Kanaanlo agí ekumpe buluke abu Israel kíng enatoku.

²⁶Bulu píílangkula abudem, “Joseph bí turdung, arope bí Ijipt tabung lokke ruutum pe idung,” emla pokan bitoku. Jakob dem tatlom sula aro menam kísa mííto.

²⁷Idola edílo bulu Josephke ponam kídí tabudem popala delokke edílo bulu Josephke bíme Ijiptlo langa dope gaari melíknam kídídem kaatodí, delo arope mííla bík aid-aloe dengekaku.

²⁸Delo Israel poto, “Ngok Joseph supak pete arope turdungada, supak ngo arope míngkai. Ngok simang adape ngo enla bím kaarík suyé.”