Read Alladian KEYUM KERO 47 Bible Online

KEYUM KERO 47 - Alladian bible

KEYUM KERO 47

¹Depe irongem Josephbí Pharaohme, “Ngok abue lang bíro kídíe, buluke ekurang tabung emla gooru, sobén, mér delokke simon-sili kídí tabungem bomla Goshen esi píídung,” emla popato.

²Delo bíkke bíro pilngo konem ulla Pharaohke keradelo dagmoto.

³Pharaoh bík bíro kídídem, “Nolu íngko agér ineke?” emla ííto. Bulu Pharaohme, “Nok béérang kídí ngolu, ngoluke abu ikampe simon-sili kaabomna amie,” emla poyan suto.

⁴Delok teyong lote bulu bím, “Kanaan amolo díríe yagorupe ila, nok béérang kídí ngoluke simon-sili kídíe dopenam neyi-neyang kaimala, ngolu so anyong moodí legape tokdung, depeila nok béérang kídí ngolum, Goshen amolo duupo motoika,” emla roguto.

⁵Josephme Pharaoh poto, “Nok abue lang bíro kídíe píídung,

⁶delokke Ijipt sokke amosim bulum taaya bidung; iname nok abuem lang bíro kídíem among sokke aiyalumna mooloplo duumo toka. Bulum Goshenlo duumo toka. Delokke buluke keralo aipe miríngna amie kadung emla no kéndumílo, ngok agíke simon sili emte kaabom dope imotoka.”

⁷Delo Josephbí bík abu Jakobme Pharaohke kerang delo aabola bím lengkanto, delokke Pharaoh me Jakob utepooroem políkto.

⁸Pharaohme Jakobke utepooro agom polík rodem Pharaoh bím, “No edít dítakko ikabon?” emla ííto.

⁹Jakob Pharaohme poyan suto, “Ngokke magongla iname dítak língko kolang takying angumko ikabong. Ngok abu kídí lokke magong-gígongla deddína yénam dítak kídíem ruupe suyém, ngokke yénam si ankí-kenola anyonako.”

¹⁰Delo Jakobbí Pharaohme utepooro políkpala bík keralok gítoku.

¹¹Delok rongem Josephbí, abuem lang bík bíro kídíem Pharaohke políklok Ijipt amolokke gaiyalumna moole, Ramesas distiklo duumoto.

¹²Sok teyong lote, Joseph, bík abuem, bík bíro kídíem delokke abu lokke edung-erang tabungem, ome-oo bojé-aso akorpe donam-tíínamem bito.

¹³Dírí-kenoe yagorupe among tabunglo ila donam-tíínam atí kaimato delokke Ijipt elang Kanaan amonge dírílok lorí alooyimape ito.

¹⁴Ijipt lokke lang Kanaan lokke donam-tíínam pe renana abal tabungem langkum sula Joseph bí Pharaohke ekum delo ginga biyinto.

¹⁵Ijipt lokke lang Kanaan lokke abal kídíem reyin sulík rodem, bulu Joseph kíng aala, “Ngolum donam bilangka, ngolum simo mayika, ngoluk abal kídíem rengum suyinnato,” emla rogu guyin aato.

¹⁶Joseph bulum poto, “Noluke abalem ikut sukamílo, noluke simon-siliem bomatoka, ngo noluke donam areem simon-silipe laayanyé.”

¹⁷Depeila bulu Joseph kíng buluke simon-siliem boma bito. Joseph bí buluke gooru, sobén, mér, guré, gado kídí ayanpe donamem bito. Dírí dítak delo bí dekepe donam are ayanpe simon-siliem laapésuto.

¹⁸Dítakde gírongem, dítakkon delo bulu Joseph kíng aalangkula rogutoku, “E, ngoluk ruutum, nok keralo ngolu atí rumnyok mape arorungem pokan sudung. Ngoluke abale kaimang delokke ngoluke simon-sili tabung ete nokkepe ikai. Supak nom ngolu, ngoluke among emla amíl kídí kékonlo atí bipenam kaimang.

¹⁹Ngolum turpenamem ibilangka, ngolum simo mayika, ngoluke arík among kídíemte nyokmoma dakyika. Ngolu lang ngoluke arík anamem ngoluk dore ayanpe retoka. Ngolu Pharaohke abílpe ila, ngoluke among sokke ato pete bí idope; idola ngolum donam-tíínamem bila turmo langka delokke díípe lepenam ali-ayém bila ngoluk arík kídíemte nyokmo mape ibilangka.”

²⁰Depe ikolok Josephbí Ijipt among tabung em Pharaoh kepe rebito. Díríde yagorupe ila Ijipt ami mipile agí amongem koyin suto, delokke among tabung de Pharaohke amope iyinkai.

²¹Delo Joseph bí Ijipt ami kídíem Ijipt among lokke kéényung kon lokke ila kéényung kon lope abílpe iyin moto.

²²Miri kídíke among petomem bí rebi maato. Legade bulu Pharaoh kelok bulum pííyin sudope donam igulem apekpe paadungai. Depe ikolok bulu buluke amongdem kogíng kamato.

²³Joseph ami kídíem poto, “Supak nolum lang noluke among kídíem Pharaoh kepe reto, noluke aríklo ledo kupe, sina ali-ayé amíe.

²⁴Ali-ayé isi-sasi dílo nolu Pharaohme pilngo lokke ole konem bilangka. Delokke abíd ali-ayé kídíem nolu, noluke edung-erang doga-tínggape ilangka.”

²⁵Bulu bím poyan suto, “Ngoluke yénamem no ipítto; ruutum no ngoluke teyolo ai alooto. Ngolu Pharaohke abílpe iyé.”

²⁶Depeila ngiilennam ali-aam lokke ole pilngo lokke ole konem Pharaoh kepe idope, Joseph bí Ijipt amolo dekena ayonko iboto. Silo melo pete dem ayon dem ige dungada. Miri kídíke among petome Pharaohke ekurangpe imato.

²⁷Israel kídíe Ijipt lokke Goshen moolelo duula miremla delokke ome-ue bojéko kakai.

²⁸Jakobbí Ijipt amolo dítak íying kolang kínídko duula, bík yéname dítak língko kolang takying appi kolang dítak kíníd ko ito.

²⁹Bíkke sidíe píírong dem bí, bík oo Josephme tomla poto, “Nok alage ngok arbyang rumkíso mela, no ngom ayasula Ijipt amoso ngok simangem yumayé emla pésuto.

³⁰Ngok abu kídí simang doopomlo ngome yudokupe, ngo míídung. Iname ngok simangem bulum yukolo yulangka.” “Nok pokampe ngo iyé,” emla Joseph pobito.

³¹Delo Jakob, “Ngok keralo no pésutoka,” emla pokolok Joseph pésuto delo Israelbí, bík dumpong kettak dan delo gubaato.