Read Alladian KEYUM KERO 48 Bible Online

KEYUM KERO 48 - Alladian bible

KEYUM KERO 48

¹Longe ayoko irongem, “Nok abue kidung” emla Josephme popato. Depeila bík oo annyi, Manasseh melang Ephraimme gíbola abu delo kaangato.

²Jakobme, “Nok oo Joseph nome kaangape aadung,” emla pobiyédem, Israel bí bíkke amíl ralnam tabungem idum sula dadape bíkke ketko delo duurepto.

³Jakob bí Josephme lupoto, “Kanaan amo lokke Lujlo Ralya yalumna Shédí ngom lengkan sula, utepooroem ruulík dola,

⁴ngom poto, ‘Nome ngo oten ome-uem ruulík bila, opínem bojéko kamoyé. Ngo sim amo sim nokke otíng-oyinem yéyar bomdope biyé.’

⁵Nokkíng ngokke tokmang adadelo Ijipt amoso nok onam oo annyi si, Reuben lang Simeon bínyi kape kísa ngokkepe idudí, dekepakpe Ephraim lang Manasseh bínyikom ngokkepe iyé.

⁶Bínyike kékonlo nokkíng okunamde nokkepe iyé. Buluke duubom kupeko moole kídí lokke amín emte bulu kelok imape bínyi kelok iyé.

⁷Sikesim ngo nok ane Raselke amínlok idung. Ngokke Paddan amo lokke enlat sudung kuem, Kanaan amo lokke yagope mooteng mangko Ephrath elo, ngo yagorupe ankí dope, bí sikai. Depeila ngo bíme Eprathke bedang abelo yuto.” (Ephrath dem supak Bethlehem emla míndungku.)

⁸Oo kídídem Israel kaayé dem bí Josephme, “Séko bulu si?” emla íngkíto.

⁹Joseph poyan suto, “Bínyi Ijipt amolo Shédíke ngome biname,” emla pobito. Delo Israel bím poto, “Ngo bínyik teyolo utepooro polík dope bínyim ngokkíng aamoto.”

¹⁰Israelbí mijing kolok amige mikmole ila, ai-sii kaapa yimato. Depeila Joseph bí bík oo annyidem anínlo aaboto. Delo abude bínyim gomrík sula mumpupto.

¹¹Israel Joseph me poto, “Nom ngo lekoda kaarík suyéku emla mííyimatuai. Idola Shédíbí, nok oo kídí emte ngom kaamoto.”

¹²Delo Joseph oo annyidem Israelke lebíng delok laabín pala, migmoe amope ila kumsuto.

¹³Depe irodem Joseph Ephraimme bík lakbík danpe huala, Israelke lakké danlo delokke Manassehme bík lakké danpe huala Israelke lakbík danlo ila, bínyim Israelke anínlo aaboto.

¹⁴Idola Israelke lakbíge aníyapedan ituakom, Ephraimke dumpo delo Israelke lakbíge pilíkla delokke bík lakké dane Manassehke dumpo delo pilíkla bí abíyatuakom, lakpé sula pijém bomto.

¹⁵Delo bí Josephme utepooro agomem lubéé líkto: “Ngokke abu Abraham lang Isaakke yékeng Shédíbí, silo loope ngok yénamem kaabomna Shédíbí,

¹⁶ngome sipe-nyokpeko takamlok mopítna teyong kotoki bí, sim koo annyi sime, utepooroem rubidakyika. Bínyike lok, ngok amíne lang ngok abu, Abraham delokke Isaak ke amíne duuyar kalangka; delokke bínyi, tani amoso oten ome-ue bojéko kaka langka.”

¹⁷Josephbí abu delokke lakbík alage Ephraimke dumpo delo pijém bomnam dem aipe míímato. Depeila bí abu alag dem Ephraimke dumpo lok laabínla, Manassehke dumpolo laalíkpe ito.

¹⁸Abudem bí lupoto, “Yai no depe imapeka. Simino kerape ogename, nok lakbík alage bík dumpong teyolo pijém toka.”

¹⁹Delo bík abude tatmape idola poto, “Ngok ua, ngo dem kéndung, bí kom bottena opín ali amipe iyé; idola bík aníyang bíro si bím pemílo botteyape delokke bík otíng oyine bottena opín abampe iyayé.”

²⁰Delo longe delo bí, bínyim utepooro agomem polík dola poto: “Nonyike amínlok Israel kídíe utepooro agomem poyém, pokengsuyé, ‘Sikepe Shédíbí, Ephraim kelang Manassehke kísape nome imo daklangka.’ ” Depeila bí Manasseh mempemílo Ephraimme kedon yape imoto.

²¹Delo Israelbí Josephme poto, “Ngo sidakbong idola Shédíbí nokkíng duumín geyé, delokke nokke abu kídíke amolo nome langaayéku.

²²Delokke ngokke yoksa loklang iyyi epuklok ikumla Amorit kídílok langkamnam, Shekhem moone etpang dem, nok abíng kídíemmang, nom ngo bidung.”