Read Alladian KEYUM KERO 49 Bible Online

KEYUM KERO 49 - Alladian bible

KEYUM KERO 49

¹Delok rongem Jakobbí oo kídídem tomdum sula “Noluke angkupena longelo kape kísa iyédí, dekepe ngo pobi dope ngokkíng aadum sutola,” emla poto.

²“Jakobke oo kídía, aadumsula tattola; noluk abu Israelme tatgap tola.

³Reuben no ngokke obíng yalume, ngokke ralname delokke ngokke siisang lokke kerang ue ila, no ngok oo kídí lokke mííyumsuge namelang éngge yalumname.

⁴Asi sipar taanam kísa, no mangkem yéku, kapeila no abu ketpomlo resaato delokke, ngokke kyare teyolo deemang-amo ilíkto.

⁵Simeon lang Lebi bínyi bíro kumsue, bínyike yoksade, midu-mimakke ekurange,

⁶ngo bínyike lupo manmolo elíkmín gemayé, bínyike kebanglo duumín gemayé, kapeila bínyi marlílok ami mokane, delokke iman legape ruboem lean patune.

⁷Bínyike marnam teyolo, péname kayé, kapeila de yagorupe eeríne, delokke bínyike kaníng teyolo, péname kayé, kapeila de atíru madung. Dekedem ngo Israel amolo, ipan sulíkyé delokke, ami kídílo orlíkyé.

⁸Judah, nok bíro kídíe nom yidyé, nok miru kídí alínglo nok alage nyumyé, nok abuke oo kídíe nome kumyé.

⁹Judahbí myomur simyo kísanako, bí simonem rekkala, agí duupomlo aalangkula, ale alage letar-yamtarla, ketkuna kísanako; séko bím ebín-ebonpe ilayén?

¹⁰Judah kelo roja banggéne duuyaryé, delokke bík otíng-oyine agínpe ruutum bomyé. Opín kídíe bím aman boma bila, bík keralo gubala, bím airupe kumyé.

¹¹Bí, bíkke gado eme gaiyalumna, onggur ane aaglo rínda suyé, bík egem líína onggur alang apong lo etbínyé.

¹²Bík amige onggur alangem pemílo yorayayé, bík iipange gakírem pemílo yasi yayé.

¹³Jebulun bí siyéng robelo duuyé. Bí asi jaji kídíke dongkepe iyé. Bík rísue Sidon loope iyé.

¹⁴Issakhar bí ralla, eget annyi pénsamlo iptína gado kísane.

¹⁵Bí aina apéé pekoem kaajine delokke among em erbomne. Depeila bí lamkue gubla eget gene, delokke agíem abíl kísape isula agér ine.

¹⁶Israel opín kídí lokke opín akonpe, Danbí agí ami teyolo aina ayonem ikan bonape iyé.

¹⁷Guré aleme bedang lo rekla, gurélo duuna amiem, méélam danpe olet dope rekna, bedang lokke tabípe Dan iyé.

¹⁸E RUUTUM, ngo nokke mopít namem toyadung.

¹⁹Gadme miru kídíe mimakpe magbomyé, idola bí bulum monlat bomyéku.

²⁰Asherbí donam miremyé, bí roja lokke dopo-tíípona donam kísanem itaboyé.

²¹Naphtalibí lenmo kunam sisuk kísa, bí tiido-ngamdope agom ponako.

²²Josephbí sirunglo duuna esing kísa, bí ayé éénarung esingpe ila, kedonna suppi lote íkda sugona aag kísane.

²³Bík miru kídíe kangkila, yagorupe iyyi epuk lok bím, mimakpe iya bomtuakom,

²⁴buluk iyyi epugem dírla, ammínpe ila, buluk lakbíng ralnamem sérpan sune. Dekedem Israelme Ipítna, Kaabomna, Jakobke Ralyayalumna Shédíke ralnamlok iyé.

²⁵Nok abuke Shédíbí nom iguldung, Ralya yalumna Shédíbí nome, utepooroem sutkin kédéng belokke eerína siyéng asi loklang, taleng telokke pedonglok ruulíktung. Nok teyolo, deddína simon-siliem lang, ome-uem kadope utepooroem bilíktung.

²⁶Nok abuke utepooro políknam si, konnyi-mennyingke dííte telokke, mirem kídí emlang agam kana, dííte kídíke utepooro lulík namem pemílo, botte yadung, si ute pooro tabusi, bíro kídí aralo boro yalumpe ina, Josephke dumpolo duuyin líklangka.

²⁷Benjamin bí marmonna sipyang kísanako, roem umnam atoem doola, yoem pukéla rekpan suyé.”

²⁸Si tabung si Israel lokke opín íying kolang annyie. Delokke si mino buluke abu lokke bulum mipilem agí-agí yékor supe utepooro agomem polík biname.

²⁹Delok rodem Jakobbí oo kídíem poto, “Ngok ami kídílo, ngom laadum sudíkue ikai. Ngome Hittit ami Ephron ke aríkke díítum bupík delo, ngok abu kídílo lekope yulangka.

³⁰De bupíkde Makphelah arík patat goorang, Kanaan amo lokke Mamre anínlo dung. Deme ago mooloppe Abrahambí Hittit ami Ephron kelok arík emte retaksula reto.

³¹Delo Abraham melang bík mime Sarahme yuto, delo Isaak melang bík mime Rebekahme yuto, delokke ngo delo Leahme yuto.

³²Arík demlang bupík dem Hittit amilok reto.”

³³Dekep Jakobbí oo kídíem poyil rodem bí ketko delo, ale isa langkula kedala sikai, delokke bíme, bík ami kídílo laadum sulíktoku.