Read Alladian KEYUM KERO 50 Bible Online

KEYUM KERO 50 - Alladian bible

KEYUM KERO 50

¹Joseph abu teyong delo gomjém dola, kapla abu migmoem mumpupla ito.

²Delok rodem Joseph bí bíkke béérang daktor kídíem, bík abu simang dem kuséreng lok pílup dope lulíkto.

³Daktor kídíde looying appikope simang amíl pílup namlo ilíkto. Pílup kolo dekena longeko ibom sudungai. Delokke Ijipt ami kídíe, looying kíníd kokai gíímang ankíem ibomto.

⁴Gíímang ankíem iyin rodem Pharaohke migom kídídem Joseph bí poto, “Noluke keralo ngo kaabape idumílo, Pharaohme ngok legangem sipe pobilangka.

⁵Ngok abue ngome pésumola sipe políkto, ‘Ngo sidakbong, Kanaan amolo ngok agíke koosunam agolo ngom yulangka.’ Depeila ngome abu simangem yumodope gímolangka; depe irongem ngo aalat suyéku.”

⁶Pharaoh poto, “Nom pésu monampe, no gíla nok abu simangem yusitoka.”

⁷Depeila Joseph, bík abuem agolo yukape saato. Pharaohke migom kídíe lang Ijipt lokke kebang migul kídíe bíkkíng gímín geto.

⁸Buluke kékon lote Josephke edung-erang tabunge enmín geto. Buluke koo kídíe lang gooru, sobén delokke mér kídí petome Goshenlo duuto.

⁹Guré gaari lokla guré teyong lote amie enmín geto, depeila milungde bojé alooto.

¹⁰Edílo bulu ali yikkol, Atad emnam Jordan lokke moole delo píítodí, bulu yagorupe kapla-rííla longe kíníd kokai Joseph bík abu legape ankí kenola ito.

¹¹Ali yikkol Atad delo, Kanaan ami kídíe edílo buluke anki-kenoem kaatodí delo bulu, “Ijipt ami kídíe ankí-keno gíímangem airupe nyola duudung,” emla pobosuto. Dekepe emkolok Jordan anínke moolop dem, Abel Mijjraim emla mínlíkto.

¹²Dekepe Jakobke oo kídíde bíkke políknampe ito.

¹³Bulu bík amíl dem bomla Kanaan lokke Hittit ami Ephron kelok agope Abrahamke renam arík gooralo duuna, Mamre lokke sanggo danke Makpelah díítum bupík delo yuto.

¹⁴Josephke abuem yusing rodem, bík bíro kídí emlang agolo gímín gena tabung dem gíbo sulangkula Ijiptpe entoku.

¹⁵Abu delokke sirodem Josephke bíro kídíde, “Bík teyolo ngoluke ipusiléé namem, Joseph bí aklíla edo rakumílo kape iyén?” emla pobosuto.

¹⁶Depeila bulu Josephme políkto, “Nok abue simang adape sim poyil kídísim pola meto:

¹⁷‘Nolu Josephme sikepe polangka: nok teyolo atírumape nok abíng kídí lokke paab imemem ayang mesam bilangka.’ Depeila, nok abu lokke Shédíke béérang kídí ngoluke, dai paab imemem ayang mesam bilangka.” Edílo buluke agomem bí paatodí, delo Joseph kapto.

¹⁸Depe políkrodem, bík bíro kídíde aala bík kerang delo gubala kumsudola poto, “Sina, ngolu nok abílpe nok keraso aadung.”

¹⁹Joseph bulum poto, “Ngo Shédíke ayanía? Nolu peso mapeka.

²⁰Nolu ngok teyolo atímape ito. Idola deme siro-meyumke idunam sok deddína ami lokke yénamem isinam legape, Shédíbí ainampe ilat toku.

²¹Depeila peso mapeka. Ngo nolu kepe lang noluke oo kídí legape kaabi-tatbiyé,” emla bulum aapí-aangem edíí dokupe aina agom lok posi pomoto.

²²Joseph bí Ijiptlo bík abuke edung-erangem duubola lekope duuto. Bí dítak língko kolang takyingko turla,

²³Ephraimke oo kídíem lang oten kídíem, delokke Manassehke oo Makirke koo kídíemte bí ekumlo kaasuto.

²⁴Yéyindí delo Joseph bíro kídídem poto, “Ngo sidakbong. Idola Shédíbí nolum arope kaabomla, sok amo sok gílen bomlang kula, bí ingkona amongem, Abraham, Isaak delokke Jakobke teyolo biyé emla pébi sutuadí, delo among delo bí nolum gíboyéku.”

²⁵Delok rongem Joseph bí Israelke oo kídíem pésu mopala poto, “Shédíbí nolum igulkape arope aayém, delo nolu ngok alongem sok among sok bomlangkuka.”

²⁶Delo Joseph bí dítak língko kolang takyingko irongem sikai. Delo bulu, bíme pílup rodem simang sonduk kolo Ijiptlo meto.