Read Alladian KEYUM KERO 6 Bible Online

KEYUM KERO 6 - Alladian bible

KEYUM KERO 6

¹Edílo tanie parlentodí bulu ome kídíem oto.

²Delo Shédíke oo kídíe ome kídíem kampope kaala bulu agí mííbangsupe mimepe laato.

³Delo RUUTUM bí poto, “Ngok aidde agínpe tanilo duuyarmín yimayé; kapeila tanibí adíne delokke tanike dítage língko kolang takying annyipe iyé.”

⁴Delo longe kídídelo Nephilim kídíe yédo delokke méélam loote edílo Shédíke oo kídíe ome kídílo yébosutodí, bulu ome-uem obosuto. De ome-oo kídarde konnyi-mennyingke amín kana miram ami kídíe.

⁵Tani amosokke ami kídíke atímange yagorupe bottela buluke aapí míídu-míítok kídíete atímape iyar teteng dope Shédíbí kaato.

⁶Delo Shédíbí amoso taniem pímemto emla aapílo ankíla bursuto.

⁷Delo RUUTUM bí poto, “Ngo ngokke pílensutonam tanime nyokmoyéku, taniem lang taroem, eggoona ato kídíemlang yopgoona pettang kídíem, ngo pímemsuto emla bursudung.”

⁸Idola Noahbí Shédíke keralo kaabape yéto.

⁹Sikesi Noahke opín-odonge: Noahbí deenampe yéna amikuai delokke paab kamanakuai. Noahbí Shédíkíng yébosuto.

¹⁰Noahbí oo angumko kato, Shem, Ham delokke Japheth.

¹¹Delo tani amongsi Shédíke kangkolo deemang alooto delokke tani amongsim midu-mimage bííbomto.

¹²Shédíbí kaatoname, tani amongso amíl-amo gena tabunge deemang aloope yéyinto.

¹³Shédíbí Noahme poto, “Ngo amíl-amo gena tabungem nyokyinmope emla míngkai; kapeila bulu kelok tani amosi midu-mimakpe bííbomkai, tani amoso lekope bulum ngo nyokmoyé.

¹⁴No Gopar esinglok etkungko omlangka; etkung delo pírtek kídíem pírlík geyéla arangemla luyuem mutkyonlok yolkap líktoka.

¹⁵Sikepe no motopíam: etkung delokke bodonge 133 mitarko, ape 22 mitarko delokke kedone 13 mitarko ipe aido.

¹⁶Etkung delok legape ekapko ila 44 sentimitarpe pénsam emla abe em medola kirki ilík langka. Etkung abedelo eyabem ilíkla, kumbang kísana adong angumko replíkla ilangka.

¹⁷Ngo turna takamem nyokyinmodope tani amoso puumuem melíkyé. Amoso yéna takame nyokyé.

¹⁸Idola nokkíng ngo daapongko ibosuyé. Etkung delo nolang nok mime, nok oo kídíelang nyameng kídíe aatoka.

¹⁹Delokke amíl amo kana, turna takamlok milo-mime pumsupe, nokkíng turmín gedope bomalangka.

²⁰Atí-atína pettanglok pumsupe, bulum turmonam legape no aabolangka.

²¹Delokke atí-atína donam-tíínamem bomala, dekede nokkelang buluke donam-tíínampe ibidope mekum langka.”

²²Shédíke pokampe Noah tabungem iruuto.