Read Alladian KEYUM KERO 7 Bible Online

KEYUM KERO 7 - Alladian bible

KEYUM KERO 7

¹RUUTUM bí Noahme poto, “Nolang nok erang takame etkunglo aalangka, kapeila so siirumso, no ngok keralo deena amikope yédung.

²Nokkíng mime-milope pumsu kínídko deena simon-sili takamlok lang deemana pumsu kínídko simon-sililok bomtak sulangka.

³Delokke pettang lokte pumsu kínídko, bulum turmola amoso ali kadope bomlangka.

⁴Kapeila longe kíníd nalo looying appi kolang yoying appikope ngo pedongem omoyé; delokke ngokke pítonam turna takamem ngo amosok nyokyin moyéku.”

⁵RUUTUM ke pokampe Noah tabungem iruuto.

⁶Tani amongso puumue engaabomdodelo Noah bí dítak língko akkénape yédo.

⁷Delo puumu legape Noah lang bík mime, bík oo kídíe lang nyameng kídíe etkung delo aato.

⁸Delokke deemana simon-silie lang pettang kídíe delokke amongso eggoona ato-siro takamlok,

⁹milo-mime pumsupe, Shédíke Noahme pokampe Noah kelo etkung delo lekope aamín geto.

¹⁰Delo longe kínídko irongem tani amoso asi puumue engaabomto.

¹¹Noahke dítak língko akké kolang poolo annyinana lokke looying kolang longe kínídko idoem, eerína siyéng takamke sirungem buklenmola taleng telokke puumu gípeko kídíke yabgo kídíem taayato.

¹²Delo tani amoso looying appi kolang yoying appikope pedonge obomto.

¹³Delo longepak delo Noah lang bík oo kídí; Shem, Ham delokke Japheth lang buluke mime angum delang Noahke mime etkung delo aato.

¹⁴Bulu lang atí-atípe ina monkír-tangkír, simon-sili delokke amoso eggoona kídar delokke atí-atípe ina pettang kídíe,

¹⁵pumsu-pumsupe amíl-amo gela ngakína kídíe Noah kíng etkung delo aamín geto.

¹⁶Depeila Shédíke pokampe amíl-amo gekína kídíe milo-mimepe aarongem, Noahke méélamlo RUUTUM bí eyabem sittumlíkto.

¹⁷Tani amoso puumude looying appiko eebomla, aside bojémomo ila etkungdem saabomla, amosokke kedonpe asi eeríe ibomkai.

¹⁸Amoso asie yagorupe eeríe ila etkungdem asi teyolo yutgoomoto.

¹⁹Asie yagorupe eeríe ila taleng rumkíng sokke kedonna dííte kídíemte pulumbomto.

²⁰Aside eeríe isaala dííte ponyuk kídíem mitar kíníd kokai eebong saato.

²¹Takam tanie, simon-silie, pettange delokke turna tabunge siyinkai.

²²Ngakína tabunge nyokyinkai.

²³Kebung-pettang, simon-sili, tani kídí delokke turna tabungem RUUTUM bí amosok nyokyinmoto. Noah lang bíkkíng etkung delo duumín gena kídí petomde turto.

²⁴Tani amoso asie língko kolang looying pilngoko eebomto.